Yeso akanzɨna ko bhulo ya yɨgya ka batɨtɛ ndɨ
(Matayɔ 15.1-9)
7
1 Bafalɨsayɔ na bowonisili ba mʉtʉʉ bemoti-bemoti nɨbɔ botukyoku ndɨ ka Yɛlʉsalɛma, bamʉmʉkana buwobhi na Yeso. 2 Bʉmɨna kʉwa ndɨ babɨbya kakɨ bemoti-bemoti nɨ banalyalya na mabɔkʉ ma mokoku, isi yi bɛ nɨ bakisukusigʉ kabyɛnɛnɛ na yɨgya ya kanisa kabʉ.3 A bɛyɔ, Bafalɨsayɔ na Bayudha basɨ babangagatʉ ndɨ yɨgya ka batɨtabʉ nɨyɔ akʉngaga ndɨ bɛ bɨsʉkʉsɨ mabɔkʉ bɨnzaa kambwa kalyalya. 4 Na ngbingo yi nɨnɔ bigononogoku ndɨ mino ka sɔkɔ, bakalyalyagɨgʉ ndɨ nɨ bakisukusigʉ mabɔkʉ. Bobhibhisogotʉ ndɨ gɔnɨ yɨgya yagɔgɔ dhidhi dhi nɨyɔ ka batɨtabʉ mʉdɔngɔnɨ abhɛ kaʉsʉkʉsa bakɔpɔ, bambɨkɛ na basani ba bangwɛyɨ.
5 Kʉwa wa, Bafalɨsayɔ na bowonisili ba mʉtʉʉ bamuuso ndɨ Yeso bɛ : « Ko bhulo ya ɨkɨ yɔ babɨbya kakʉ bakabyɛgɨgʉ mino ɨbʉ yɨgya ka batitosu ? Wɨna mbɛyɨ, bakalyalya na mabɔkʉ ma mokoku aka ! »
6 Yeso usikisyo ndɨ bɛ : « Bugyalandʉ ka Isaya a ndɨ ba lɨngʉnʉ kʉgʉ kunu. Ma batʉ ba kʉbɔbɔkʉ, mʉdɔngɔnɨ bɛyɔ okpikogo ndɨ mino bɛ :
‹ Batʉ bi nɨba bebhibhisogo asɨ ka nɔkʉ aka,
luki limoti, ka mambɛngɨ kabʉ ba byɨ na ɨmɨb.
7 Bhibhiso yi nɨyɔ bebhibhisogo a payaya,
a bɛyɔ, mʉtʉʉ kabʉ,
ikogo asɨ yɨgya ka bambanzʉ aka. ›
8 Makaasa mʉtʉʉ ko Kunzi, manɨgʉmya ka yɨgya ka bambanzʉ. » 9 Yeso omotiloku ndɨ bɛ : « Ma bagala-gala kaasa mʉtʉʉ ko Kunzi ko bhulo ya yibuulyogo yɨgya kunu aka. 10 A bɛyɔ, Musa abɨkya ndɨ bɛ : ‹ Mʉbanga abhakʉ na amakʉ. › Na gɔnɨ : ‹ Mʉtʉ nɨnɔ agbusyogo abhakɨ ikanɨ amakɨ, okwononi bɛ bamwɨ. › 11 Luki limoti, ibunu mabɨkyaga bɛ : Mʉmbanzʉ kabɨkya abhakɨ ikanɨ amakɨ bɛ : ‹ Natʉ no luki nɨlɔ nakwanana bi nolu kabhɨnɨka buti kakʉ. Luki limoti a Kɔlɔbhanɨ. › Isi yi bɛ ‹ apɛpɛ ko Kunzi. ›, 12 makakpamya mʉtʉ yi nɨnɔ bɛ kobhinikonitɔgʉ buti ka abhakɨ ikanɨ amakɨ. 13 Kinili, molimogo lɨkpʉmʉka ko Kunzi pisi kapánana yɨgya ka batɨtonu. Na managya gɔnɨ makpʉmʉka magɔgɔ dhidhi dhi abhɛ nɨmɔ. »
Luki nɨlɔ apʉtaga mʉmbanzʉ
(Matayɔ 15.10-20)
14 Kʉwa wa, Yeso alɨkya bata ndɨ ambaza ka bambanzʉ, ʉbɨkya bɛ : « Ibunu basɨ, imukononi, motombisyo bɨnza lɨkpʉmʉka li nɨlɨ : 15 Kɛgʉ no luki la kunzi nɨlɔ kingyo kʉsɔ ka mʉmbanzʉ akwanana kapʉta. Luki limoti, nɨlɔ akwanana kapʉta mʉmbanzʉ a luki li nɨlɔ opupogo kʉsɔ wa lɨmbɛngɨ kakɨ. [ 16 Nɨnɔ apa kaʉkana, ʉkana. ] »
17 Ngbingo yi nɨnɔ Yeso atʉkya ndɨ mino buwobhi na ambaza ka bambanzʉ, ingyo ka ndabʉ. Babɨbya kakɨ bamuuso kʉwa ndɨ isi ya lizuni li nɨlɔ. 18 Ubɨkya ndɨ bɛ : « Gʉtʉgʉ ibunu aka, makɛgʉ nɛkɨ na yimibho ? Makɛgʉ kotombisyo bɛ luki lasɨ la kunzi kingyo kʉsɔ ka mʉmbanzʉ akwananatʉ kapʉta ? 19 Makpʉmʉka mi nɨmɔ kingyogigʉ kʉsɔ wa lɨmbɛngɨ ka mʉmbanzʉ, luki limoti, ka mʉma. Kumbuso yi, opupo, ɨnda ka lɨmbɨ. » ( Pisi ka mʉnzɨna mi nɨmɔ, Yeso a ndɨ kowoniso bɛ bakwanana kalya malɨlɨ masɨ. )
20 Yeso obikyoku ndɨ bata bɛ : « Luki nɨlɔ opupogo kʉsɔ ka mʉmbanzʉ lɔ apʉtaga. 21 A bɛyɔ, tamanaga yanyɛ opupogo kʉsɔ wa lɨmbɛngɨ ka mʉmbanzʉ. Akpamya kʉwa kagya bɨlya, kaibo, kamwɔ mʉmbanzʉ, 22 kasyɛ na muko nɨnɔ kɛgʉ wakakɨ, kaiko na lɨgbʉgbʉ, kaiko mʉdɨya, kaiko na bokoli, kagya bɨlya, kaiko no miso mopi, kaʉnzɨnzɨnya bɛngɛnɨ, kaɨbhɨnɨka na kaiko na bungingi. 23 Makpʉmʉka manyɛnyɛ mi nɨmɔ masɨ opupogo kʉsɔ ka mʉmbanzʉ, apʉta.
Wabasulia abinikyonini Yeso
(Matayɔ 15.21-28)
24 Kumbuso yi, Yeso atʉkya ndɨ wa, aga ka iwili ya Tilo. Kʉ bɛyɔ, ingyo ndɨ ka ndabʉ yimoti bɛnɛ. Kɛgʉ ndɨ kapa bɛ mʉmbanzʉ gʉtʉgʉ bemoti aka ibhito bɛ a kʉ, luki limoti, bambanzʉ bibho ndɨ aka. 25 Muko bemoti nɨnɔ mikakɨ muko yi a ndɨ kaigyogyiso na lɨlɨmba, ʉkana ndɨ gɔnɨ mongoni ka Yeso. Muko yi nɨnɔ akpudoku ndɨ bɨgala-gala, ogwo kambwa kakɨ. 26 Kɛgʉ ndɨ ɨyɨ Wabayudha. Ɨbʉkʉta ndɨ ka Foinikia ka iwili ya Sulia. Ɨtatanaga ndɨ na Yeso bɛ opupisi lɨlɨmba nɨlɔ a ndɨ kʉsɔ ko mikakɨ. 27 Yeso abɨkya ndɨ bɛ : « sa mbɛyɨ bomiki bikutogi. A bɛyɔ, kɛgʉ bɨnza kava malɨlɨ kabʉ, bumbimbilyo bomikya-bɛnva. 28 Muko yi nɨnɔ asikisyo ndɨ bɛ : « Mombukwono dhosu, a bɛyɔ ! Luki limoti, gʉtʉgʉ bomikya-bɛnva aka balyagatʉ gɔnɨ kumbo ya bamalɨlɨ nɨyɔ ʉnyʉkɨlyaga bomiki ka mɨza. » 29 Yeso abɨkya kʉwa ndɨ bɛ : « Ko bhulo ya mʉnzɨna mi nɨmɔ wosikisyi mɔ, wɨga kʉ kakʉ, lɨlɨmba apupini mikakʉ. 30 Nɨyɔ muko yi nɨnɔ ɨga ndɨ kʉ kakɨ, atakanya mikakɨ wakanga nɨ lɨlɨmba nɨlɔ apupini.
Yesu akaukuso adhʉka nɨnɔ a ndɨ gɔnɨ bobo
31 Kumbuso yi, Yeso atʉkya bata ndɨ ka iwili ya Tilo, akɨtaga ka Sidhoni, akɨtanaga ka Bagʉdʉ-Tɛkɛbɛ, igoku kʉwa ndɨ miso ya ibhombu ya Galilaya. 32 Kʉ bɛyɔ, badhulyoku ndɨ na adhʉka bemoti nɨnɔ a ndɨ gɔnɨ na bʉkpɛkɨ-kpɛkɨ bʉnzɨna. Bɨtatanaga ndɨ na ɨyɨ bɛ abhisilyi mabɔkʉ kyɛ aʉkɨ. 33 Yeso ɨtɛ ndɨ na ɨyɨ bɨkɛdɛ, amakya ndɨ bakpɛngbɛ ka motili, ɨbakya mabɔkʉ na botikito, avɨla ndɨ lɨsasʉ ka bobo yi nɨnɔ. 34 Kumbuso yi, Yeso ɨkwɛ ndɨ kʉgʉ wa lɨsyɛ, adhaka ndɨ mino biwo, abikyoku alʉkʉ nɔ bɛ : « Ɛfata » isi yi bɛ : « Ukwikono ! » 35 Wa aka wa, motili aukwikono ndɨ, lɨsasʉ apolimono, apʉnga ndɨ kanzɨna bɨngbanganya. 36 Yeso ʉgbɨtyaga ndɨ bambanzʉ bɛ bakatumbulyogonitɔgʉ mʉmbanzʉ. Luki limoti, ngbingo yi nɨnɔ Yeso ʉgbɨtyaga ndɨ mino bɛyɔ, bowowiso kʉwa bata ndɨ mongoni mi nɨmɔ kʉgbɛ. 37 Bambanzʉ bombomboyo ndɨ bata kʉgbɛ, babɨkya bɛ : « Masɨ nɨmɔ akagya a manza kʉgbɛ ! Akauukwo baadhʉka motili, anunziniso bobobo ! »