<<    <     Malɨkɔ     15     >    >> 
Ba kʉwa na Yeso kambwa ka Pilatɨ
15
1 Na bʉsɔbɨ bibo, bokumu-kumu bolikilyo ndɨ bhulo pa imoti na bagʉgʉ, bowonisili ba mʉtʉʉ na bambɔkʉ basɨ nɨbɔ ba bhasa idhingi. Nɨyɔ bakondisiso ndɨ Yeso, baga na ɨyɨ, basʉta ndɨ ka Pilatɨ. 2 Pilatɨ amuuso ndɨ bɛ : « Ɨwɛ nɨ ngama ka Bayudha ? »
Yeso asikisyo ndɨ bɛ : « Ɨwɛ nɔ wakabɨkya bɛyɔ. » 3 Bokumu-kumu basʉngʉlya ndɨ kʉgbɛ. 4 Pilatɨ amuuso ndɨ bata bɛ : « Wakɛgʉ pɔ kosikyiso lɨkpʉmʉka limoti ? Wakɛgʉ kaʉkana bɛyɔ bo mino kaʉsʉngʉlya bɛnɛ ? »
5 Luki limoti, Yeso kosikisyogʉ ndɨ pɔ. Lɨkpʉmʉka ambanga ndɨ Pilatɨ.
Bokpomyini bɛ bamwɨ Yeso
6 Ka yɨnga wa Pasɨka wasɨ, Pilatɨ akʉlaga ndɨ mʉtʉ wa ligbito bemoti. Ikogo ndɨ mʉtʉ yi nɨnɔ ambaza ka bambanzʉ atwaga ndɨ. 7 Kʉ ka ligbito kʉ, a ndɨ na alʉkʉ bemoti nino ina ndɨ bɛ Bhalabha pa imoti na balʉkʉ bi nɨbɔ bʉmwɔgɔ ndɨ bambanzʉ. Bugwi ndɨ ngbingo yi nɨnɔ bavɨkɨmanaga ndɨ mino, bamwɔ mʉmbanzʉ. 8 Ambaza ka bambanzʉ ɨnda ndɨ kʉ ka Pɨlatɨ. Apʉnga kʉwa ndɨ kakʉnga bɛ ʉgyɨlyɨ mʉdɔngɔnɨ bɛyɔ ʉgyɨlyaga ndɨ mino ka bʉndɛlɨ. 9 Kʉwa wa, Pilatɨ umuuso ndɨ bɛ : « Makapa bɛ namʉkʉlyɨ ngama ka Bayudha ? »
10 A bɛyɔ, Pilatɨ a ndɨ kaibho bɨnza bɛ bokumu-kumu basʉta ndɨ Yeso ko bhulo ya imi aka. 11 Luki limoti, bokumu-kumu bakpamya ndɨ ambaza ka bambanzʉ kabɨkya Pilatɨ bɛ ʉkʉlyɨ nɔ ɨbʉ Bhalabha aka. 12 Pilatɨ umuuso ndɨ bata bɛ : « Ma nɛkɨ kapa bɛ nagyɨ ɨkɨ na alʉkʉ yi nɨmʉ mamakaga bɛ ngama ka Bayudha mʉ ? » 13 Bapamɨkanaga ndɨ bɛ : « Babhangɨlagɨ ka mʉsalabha ! »
14 Pilatɨ umuuso ndɨ bata bɛ : « Bʉnyɛ tino sɛ bɔ ogyi bi ? » Luki limoti, bidhukulogo ndɨ bata kapamɨkanaga pʉlʉ bɛ : « Babhangɨlagɨ ka mʉsalabha ! »
15 Kaungongoliso mambɛngɨ, Pilatɨ ʉkʉlya ndɨ Bhalabha. Atinisiso kʉwa ndɨ Yeso pimbo, ʉpá bɛ babhangɨlagɨ ka mʉsalabha.
Basʉdha bakatɨbha Yeso
16 Basʉdha baga kʉwa ndɨ na Yeso ka pa yangba kʉsɔ wa ɨmbaa ka ngama wa iwili. Kʉ bɛyɔ, balɨkyana ndɨ ɨbʉ basɨ. 17 Bamokisyo ndɨ kanzʉ wangbʉ, balʉka ndɨ muligi nɨmɔ a ndɨ no mowo biwilili, bamokisyo ka mʉ. 18 Kumbuso yi, bamuusogo ndɨ bɛ : « Ngama ka Bayudha, tumuusito ! » 19 Batɨnaga ndɨ na lɨgʉgʉ ka mʉ bingwengwengwe, babakyaga na botikito. Bobunogo ndɨ moli kambwa kakɨ, bodhidhikogo kadwɛ kʉ kwa kʉ ka lɨtɔmbʉ. 20 Nɨyɔ bama katɨbha bɛyɔ, banyɔ ndɨ kanzʉ yi nɨnɔ, bamokisyo bata botʉ kakɨ.
Bakabhangɨlaga Yeso ka mʉsalabha
Kʉwa wa, bɨnda ndɨ na ɨyɨ kunzi, babhangɨlaga ka mʉsalabha.
21 Alʉkʉ bemoti nɨnɔ bamakaga ndɨ bɛ Simoni, a ndɨ mʉtʉ wa Kʉlɛnɛ. Ɨyɨ Simoni a ndɨ abhakɨ Alikisi ɨbʉ na Lufu. Obyeku ndɨ wa nɨ anigoku ko tiko. Basʉdha babhinikiso ndɨ ka mapʉpʉ mʉsalabha ka Yeso. 22 Baga ndɨ na Yeso ka pa nɨyɔ balɨkyaga bɛ Gɔlɔgɔta, isi yi nɨ : « Pa ya Ɨkpʉkpʉkʉsɔ. » 23 Bapá ndɨ vinya wa muzabhibhu mʉmatanaga na ɨbhʉkʉsɔ nɨsɔ balɨkyaga bɛ milɛ, luki limoti, akya kamwo. 24 Kʉwa wa, basʉdha babhangɨlaga ndɨ ka mʉsalabha. Boipo ndɨ lɨbɛsɛ kakɨsa pisi tino yɔ mʉtʉ yɨkaka-yɨkaka inisono mino na kutuko kakɨ, kumbuso yi, bagbananaga kʉwa ndɨ. 25 A ndɨ saa-tatʉ ya bʉsɔbɨ ngbingo yi nɨnɔ babhangɨlaga ndɨ mino ka mʉsalabha. 26 Bokpiko ndɨ kʉgʉ wo mikya lɨbaʉ mobiso nɨmɔ a ndɨ katʉmbʉlaga isi ya kukwakʉ kakɨ bɛ : « Ngama ka Bayudha. » 27 Bʉbhangɨlaga ndɨ gɔnɨ batʉ bo kubakʉ baba ka kpɔlɔ ka Yeso. Bemoti ka kʉmbanzɨkanɨkɔ, wagɔgɔ ka kulekuke. 28 [ Nɨlɔ otulyoso Mobiso Motu nɨmɔ ikpikogo ndɨ bɛ : « Bamatanaga ndɨ na bagya-manyɛ. » ]
29 Bambanzʉ nɨbɔ ba ndɨ kakɨtaga wa, ba ndɨ katʉmbwa Yeso, banagbɨtya bamʉ, banabɨkya bɛ : « Ɛɛɛ, wa ndɨ kapa kapanza ndabʉ ko Kunzi, wopiko yagɔgɔ ka masyɛ masaa, 30 wiukuso nɛkɨ ɨwɛ mombukwono dhakɨ yi, wisisoku ka mʉsalabha ! »
31 Bokumu-kumu na bowonisili ba mʉtʉʉ ba ndɨ gɔnɨ lugo kabʉ katɨbha bɛgɛyɔ, banabɨkyana bɛ : « Uukuso ndɨ bɛngɛnɨ. Kakwananɨgʉ kaiukuso ɨyɨ mombukwono dhakɨ yi bɨkpɛ ! 32 Kilisito, ngama ka Baɨzalɛlɨ, osyikunɔ mbɨya wanʉ ka mʉsalabha, ibha tɨnɨ, tabɨnɨkyana kʉwa ! » Gʉtʉgʉ batʉ nɨbɔ bʉbhangɨlaga ndɨ ka kpɔlɔ ka Yeso, ba ndɨ katʉmbwa bɛgɛyɔ.
Kukwakʉ ka Yeso
33 A ndɨ saa-sita ya mʉsɨkatʉ, bhiti oumo ndɨ mugi masɨ kadhwɛ ka saa-tisa. 34 Na saa-tisa, Yeso apamɨkana ndɨ bɛ : « Eloi, Eloi, lama sabhakatani ? » Isi yi bɛ : « Hiii Kunzi kamɨ ! Hiii Kunzi kamɨ ! Ko bhulo ɨkɨ yɔ wesi mino ? »
35 Nɨyɔ batʉ bemoti-bemoti lugo ka nɨbɔ ba ndɨ wa bamʉkana mino bɛyɔ, babɨkya ndɨ bɛ : « Ukononi, akamakaga Ɨlɨya. » 36 Bemoti kabʉ ɨnda ndɨ mbangʉ, olubhoku luki limoti lafʉbʉ-fʉbʉ kʉsɔ wo vinya nɨnɔ wonzuwo-nzuwo. Kumbuso yi, amakyana ndɨ ka lɨgʉgʉ, ananɨlya Yeso bɛ omwi, anabɨkya bɛ : « Bundoni ! Tɨnɨ ikanɨ Ɨlɨya odhokuto kasiso ka mʉsalabha ! » 37 Luki limoti, Yeso apamɨkana ndɨ bata, osiso kʉwa lɨmbɛngɨ.
38 Kʉwa wa, kutuko nɨkwɔ ikogo ndɨ kubhongiso ka ndabʉ ko Kunzi, anʉɨka lugo katʉkya kʉgʉ kadhwɛ kusili. 39 Nɨyɔ ngama ka basʉdha ka Balʉma nɨnɔ a ndɨ wakamaga kambwa ka Yeso wa, ɨna mino bɛyɔ osiso ndɨ mino lɨmbɛngɨ, abɨkya ndɨ bɛ : « A bɛyɔ, mʉtʉ yi nɨmʉna a ndɨ Miko Kunzi aka ! »
40 Boko bagɔgɔ ba ndɨ kʉ gɔ kʉ, banɨna byɨ lɨkpʉmʉka li nɨlɔ. Lugo kabʉ, a ndɨ nɨ Malia mʉtʉ wa Magadhala, Malia amakakɨ Yakɔbɔ nɨnɔ a ndɨ mʉwanza na mamakɨ bɛyɔ ka Yɔsɛ, sɛ kʉwa Salʉmɛ. 41 Boko bi nɨba ba ndɨ kabɨbya Yeso, banasingyo ka mogubho ngbingo yi nɨnɔ a mbɛyɨ ndɨ mino ka Galilaya. Atʉ ndɨ gɔnɨ na boko bagɔgɔ budhingi nɨbɔ ba ndɨ kabɨbya kadhwɛ kʉ kwa kʉ ka Yelusalɛma.
Bakalumbo Yeso
42 A kʉwa ndɨ bʉgɔgɔ. Lɨsyɛ li nɨlɔ, a ndɨ lɨsyɛ nɨlɔ bibungusyogo ndɨ mino ka yɨnga. Ikogo ndɨ lɨsyɛ nɨlɔ a kambwa wa lɨsyɛ la kimumbiso. 43 Yɛzɛfʉ, mʉtʉ wa gʉdʉ wa Alimatia, a ndɨ mʉtʉ wa ɨbhɨbha ka Bhasa Idhingi, osiloku ndɨ. Ikogo ndɨ kabʉndaga Bʉngama ko Kunzi. Aga kʉwa ndɨ nɨ kɛgʉ na kʉbangakʉ ka ngama mudhingi bɛyɔ ka Pilatɨ kakʉnga manda ka Yeso. 44 Luki limoti, Pilatɨ ombomboyo ndɨ kaʉkana bɛ Yeso okwini bi. Amaka kʉwa ndɨ ngama ka basʉdha ka Balʉma, amuuso bɛ : « Okwini bi ndɛlɨ ? » 45 Nɨyɔ ʉkana mʉtʉmbʉlagɨ ka ngama ka basʉdha yi nɨnɔ, Pilatɨ akpamya kʉwa ndɨ Yɛzɛfʉ kava manda ka Yeso. 46 Yɛzɛfʉ oluwo ndɨ kutuko kwanza, asiso ndɨ ka mʉsalabha, otikyogo na kutuko kwi nɨkwɔ, amongoso kʉsɔ wa mbʉkʉ nɨyɔ bakpɔ ndɨ ka lɨtalʉ. Kumbuso yi, adhʉla ndɨ mupumi mi na lɨtalʉ lidhingi bingbufu. 47 Malia Magadhala na Malia nɨnɔ amakɨ Yɔsɛ ba ndɨ wa, banɨna pa nɨyɔ balumbo ndɨ mino Yeso.