Pupo ka Yeso ka mbʉkʉ
16
1 Kumbuso wa lɨsyɛ la Kimumbiso, Malia Magadhala, Malia nɨnɔ amakɨ Yakɔbɔ na Salʉmɛ boluwo ndɨ malazi kotutwokogu na imu manda ka Yeso. 2 Ka lɨsyɛ la Mʉngʉ na bʉsɔbɨ bibo, ngbingo yi nɨnɔ mangbamʉ ma mɔnɨ opupogoku mino, baga ndɨ ka mbʉkʉ. 3 Ba ndɨ kauusono bɛ : « Wanɨ sɛ kʉwa nɔ atitindikilyo lɨtalʉ nɨlɔ botikyi bi nolu mupumi ma mbʉkʉ ? » 4 Luki limoti, nɨyɔ bɨkwɛ, bɨna ndɨ lɨtalʉ nɨlɔ lidhingi lɔ kanɨ botini ka kpɔlɔ. 5 Kʉwa wa, bogulyo ndɨ ka mbʉkʉ, bamɨna mʉwanza bemoti wakimokisyo lɔpɔ wotu, ikini miso ya kʉmbanzɨkanɨkɔ. Kʉbangakʉ utumo ndɨ ba mama bi nɨbɔ bɨdɛ. 6 Luki limoti, ʉbɨkya ndɨ bɛ : « Makobongonitɔgʉ. Makakɨsa Yeso nɨnɔ mʉtʉ wa Nazalɛtɨ, nɨnɔ babhangɨlaga ndʉkʉ ka mʉsalabha. Opupini bi ka mbʉkʉ, kɛgʉ bata wanʉ. Winoni pa nɨyɔ babhisi bi mino. 7 Mbɨya wanʉ, ubikyoniku babɨbya kakɨ, gʉtʉgʉ Pɛtɛlɛ bɛ : ‹ Akamʉbʉndaga ka Galilaya. Maminoku banʉ kʉ, mʉdɔngɔnɨ bɛyɔ amʉbɨkya ndɨ mino. › »8 Bopupo kʉwa ndɨ, baga mbangʉ byɨ na mbʉkʉ, kyɛ nzʉyɨ a ndɨ kaʉtwa bɨkyakyakya, banombomboyo. Bakatʉmbʉlyagagʉ ndɨ mʉmbanzʉ gʉtʉgʉ bemoti aka likpʉmʉka li nɨlɔ, kyɛ ba ndɨ na kʉbangakʉ.
Yeso apuponilyini Malia Magadhala
(Matayɔ 28.9-10; Yuani 20.11-18)
9 [ Kumbuso Yeso kopupo ka mbʉkʉ ko mbolugo, ka lɨsyɛ la Mungu, apuponilyo mbɛyɨ ndɨ Malia Magadha nɨnɔ anyɔ ndɨ malɨmba madɨya na ɨka.] 10 Aga ndɨ kaʉpága batʉ nɨbɔ bikogo ndɨ pa imoti na Yeso mongoni mi nɨmɔ. Batʉ bi nɨbɔ ba mbɛyɨ ndɨ asɨ ka idhumasʉ aka, banagamana. 11 Luki limoti, nɨyɔ Malia ʉbɨkya bɛ : « Yeso a mubisi, naminito. » Bakabɨnɨkyanagʉ ndɨ.
Yeso upuponilyini babɨbya baba
12 Kumbuso yi, Yeso upuponilyo ndɨ babɨbya baba nɨ igomosyonini. Babɨbya bi nɨbɔ ba ndɨ kaɨnda ka mugi mumoti bɛnɛ. 13 Bigoku ndɨ kaʉpága babɨbya bagɔgɔ mongoni mi nɨmɔ, luki limoti, bakʉbɨnɨkyanagʉ ndɨ ɨbʉ bɛgɛyɔ.
Yeso upuponilyini babɨbya tɛkɛbɛ na bemoti
14 Yeso opipilo ndɨ kaupuponilyo babɨbya tɛkɛbɛ na bemoti wa ba ndɨ mino kalyalya. Uyoyiso ndɨ ko bhulyo ɨzanga bhaya na ko bhulo ya botumo ka mambɛngɨ, kyɛ bakɛgʉ ndɨ kaʉbɨnɨkyana batʉ nɨbɔ bamɨna ndɨ kanɨ opupini ka mbʉkʉ. 15 Kumbuso yi, ʉbɨkya ndɨ bɛ : « Windoni ka ɔbɨlɨ wasɨ, mobikyogoku Mongoni Manza ka batʉ basɨ. 16 Nɨnɔ abɨnɨkyana ndɛkɛ na babotiso, inisonotʉ ndɛkɛ na muukuso. Luki limoti, nɨnɔ kabɨnɨkyanɨgʉ, bamakya ndɛkɛ ka mʉngɨmbɔ. 17 Bumibhogo ndɛkɛ basɨ nɨbɔ babɨnɨkyana ka yɨgya yi nɨyɨ : ko lino kamɨ, bokpumyogo ndɛkɛ malɨmba, banzɨnaga ndɛkɛ masasʉ ma mbɨya, 18 bugwigo ndɛkɛ banzʉka ikanɨ komwo sʉmʉ, masɨ nɨmɔ kʉgyɨgʉ ndɛkɛ luki. Bubhisilyogo ndɛkɛ batʉ ba bokolobu mabɔkʉ, batʉ bi nɨbɔ baʉka. »
Yeso akaɨga kʉ ka Bhabha
( Luka 24.50-53; Lig.1.9-11)
19 Nɨyɔ Mombukwono dhosu Yeso ʉbɨkya bɛyɔ, Kunzi adokiso ndɨ kʉgʉ wa lɨsyɛ, ikoku ka kʉmbanzɨkanɨkɔ kakɨ. 20 Babɨbya baga kʉwa ndɨ kabɨkyaga Mongoni Manza ka bapa bayasɨ. Mombukwono dhosu a ndɨ pa imoti na ɨbʉ ka mogubho mi nɨmɔ masɨ. Lɨngʉnʉ la Mongoni Manza nɨmɔ bapága ndɨ, a ndɨ kainisono pisi ka mokingyosi mʉmbanga-mbanga nɨmɔ ba ndɨ kagya. ]