Yeso akaʉlʉmbɨlya babɨbya kakɨ
17
1 Nɨyɔ Yeso ama kanzɨna bɛyɔ, ɨkwɛ ndɨ kʉgʉ wa lɨsyɛ, abɨkya bɛ : « Bhabhaooo, ngbingo itulyonini. Mubhibhiso mikakʉ, kyɛ ɨyɨ ubhibhisi gɔnɨ. 2 Wapóni ndɨ bʉngama kʉgʉ ka bambanzʉ basɨ, kyɛ ʉpɨ́ batʉ basɨ nɨbɔ wapá ɔbɨlɨ wa bɛnzɛ na bɛnzɛ. 3 Ɔbɨlɨ wa bɛnzɛ na bɛnzɛ yi nɨ kaumibho ɨwɛ, Kunzi bemoti, nɨnɔ wa lɨngʉnʉ na ɨmɨ Yeso-Kilisito nɨnɔ wetikoku ndɨ. 4 Ɨmɨ, nubhibhisoni kʉnʉ ka ɔbɨlɨ. Nomoni ligubho nɨlɔ wetikoku ndɨ kagya. 5 Bhabhooo, mbɨya wanʉ, imigisyoku ɨbhɨbha buwobhi na ɨwɛ, ɨbhɨbha mʉdɔngɔnɨ abhɛ nɨyɔ nikogo ndɨ noyu kʉ kakʉ kambwa wagyɨ ɔbɨlɨ.6 « Numibhisikosoni ka batʉ nɨbɔ ʉpʉnaga ndɨ ka ɔbɨlɨ, wɛpá. Ba ndɨ batʉ kakʉ, wepóku, bobuulyogo lɨkpʉmʉka kakʉ. 7 Mbɨya yi nɨmʉ, bakaibho bɛ masɨ nɨmɔ wɛpá ndɨ, apʉnya kʉ kakʉ. 8 Kyɛ nukitisyogo ndɨ lɨkpʉmʉka nɨlɔ aka lɔ wɛbɨkyaga ndɨ, babɨnɨkyana. Bibho ndɨ ka lɨngʉnʉ bɛ nopunyoku kʉ kakʉ na kabɨnɨkyana bɛ ɨwɛ nɔ wetikoku ndɨ.
9 Ɨmɨ, nakaʉkʉngɨlya. Nakɛgʉ kaʉkʉngɨlya batʉ ba ɔbɨlɨ, luki limoti, nɨbɔ wɛpá ndɨ kyɛ ba kʉwa batʉ kakʉ. 10 Masɨ nɨmɔ na nomu a ma kakʉ na nɨmɔ kakʉ a ma kamɨ, ɨbhɨbha kamɨ akainisoniso ko pisi kabʉ. 11 Nakɛgʉ bata ka ɔbɨlɨ, luki limoti ɨbʉ ba mbɛyɨ kʉ kwa kʉ, wɨna sɛ, ɨmɨ nakaaga kʉ kakʉ. Bhabha Wotuooo, ubuulyogo ko ngu yo lino kakʉ. Lino nɨlɔ wɛpá ndɨ, kyɛ biki luki limoti mʉdɔngɔnɨ bɛyɔ ibusu to mino na ɨwɛ. 12 Ngbingo yi nɨnɔ nikogo ndɨ mino pa imoti na ɨbʉ, nubuulyogo ndɨ ko ngu yo lino kakʉ nɨlɔ wɛpá ndɨ. Nubuulyogo ndɨ bɨnza na gʉtʉgʉ bemoti lugo kabʉ kobungogogʉ ndɨ, kiki nɨnɔ aka nɔ obungogo ndɨ kyɛ Mobiso Motu ɨtʉlyanɨ. 13 Mbɨya wanʉ, nakaaga kʉ kakʉ. Nakabɨkya lɨkpʉmʉka li nɨlɨ nɨ na mbɛyɨ bata ka ɔbɨlɨ aka ibha ɨgyagya kamɨ iki bɨdɛ kʉsɔ kabʉ. 14 Ɨmɨ, nʉbɨkya ndɨ lɨkpʉmʉka kakʉ, na batʉ ba ɔbɨlɨ bʉmʉya ndɨ bɨkanganga kyɛ ɨbʉ mʉdɔngɔnɨ abhɛ ɨmɨ gɔnɨ takɛgʉ batʉ ba ɔbɨlɨ. 15 Nakɛgʉ kalʉmba ambɛ ʉtʉmba ka ɔbɨlɨ, luki limoti, ubuulyogo ka mumuyoniso. 16 Ɨbʉ mʉdɔngɔnɨ abhɛ ɨmɨ gɔnɨ takɛgʉ batʉ ba ɔbɨlɨ. 17 Ububiso bitu pisi ka lɨngʉnʉ, kyɛ mʉnzɨna kakʉ nɨ lɨngʉnʉ. 18 Nakaʉtɨka ka ɔbɨlɨ mʉdɔngɔnɨ bɛyɔ wɛtikoku ndɨ gɔnɨ mino ɨmɨ. 19 Nakaʉpá ɔbɨlɨ kamɨ abhɛ apɛpɛ ko bhulyo kabʉ, kyɛ bɨpɨ́ gɔnɨ ɨbʉ na lɨngʉnʉ kʉ kakʉ.
20 « Nakɛgʉ kaʉlʉmbɨlya babɨbya bi nɨbana aka ba, luki limoti, nakaʉlʉmbɨlya gɔnɨ batʉ basɨ nɨbɔ bʉkana ndɛkɛ mʉtʉʉ kabʉ, bɛbɨnɨkyana. 21 Nakalʉmba kyɛ ɨbʉ basɨ biki luki limoti, mʉdɔngɔnɨ bɛyɔ ɨwɛ Bhabha wo mino kʉsɔ kamɨ na ɨmɨ kʉsɔ kakʉ. Ɨbʉ gɔnɨ biki luki limoti kyɛ batʉ ba ɔbɨlɨ babɨnɨkyanɨ bɛ ɨwɛ nɔ wetikoku ndɨ. 22 Ɨmɨ, nupóni ndɨ ɨbhɨbha nɨyɔ wɛpá ndɨ kyɛ biki luki limoti mʉdɔngɔnɨ bɛyɔ to mino na ɨwɛ. 23 Ɔbɨlɨ kamɨ a kʉsɔ kabʉ na nɨnɔ kakʉ kʉsɔ kamɨ, ibha biki ka imoti na lɨngʉnʉ. A bɛyɔ, batʉ ba ɔbɨlɨ bibho bɛ ɨwɛ nɔ wetikoku na ʉpaga mʉdɔngɔnɨ bɛyɔ wɛpaga mino.
24 Bhabhaooo, ka batʉ bi nɨbɔ wɛpá ndɨ, nakapa ambɛ kʉ niko mino, biki ɨbʉ kʉ gɔ kʉ, kyɛ bɨnɨ ɨbhɨbha nɨyɔ kamɨ. Ɨbhɨbha yi nɨyɔ wɛpá ndɨ kyɛ wɛpatʉ ndɨ kambwa kagya ɔbɨlɨ. 25 Bhabhaooo, wa mʉtʉ wo ngbingbili. Batʉ ba ɔbɨlɨ bakumibhigʉ, luki limoti, ɨmɨ numibhotʉ pa imoti na babɨbya bi nɨbɔ babɨnɨkyana bɛ ɨwɛ nɔ wetikoku ndɨ. 26 Ɨmɨ, numibhisikosoni ko miso kabʉ na nidhukulogotʉ kaumibhisikoso, kyɛ sɨpananɨsɔ nɨsɔ wa nosu kʉgʉ kamɨ iki gɔnɨ ka mambɛngɨ kabʉ, na ɨmɨ niki gɔnɨ ka mambɛngɨ kabʉ. »