ALIMA POMPAKITA PEHUKU DAKO NTE TUPU
Pompakita pamulana: Nggaboro
7
Hitumo anu nipopakita nTUPU anu Nalanga Kakuasana ka yaku.
Nipeintaku Ia nompajadi nggaboro dea ri tempo tona naupu nosoe kavoko ka magau,
bo kavoko dako nompamula netumbu mpanjili.
2 Tempo kavoko haitu mapara maupumo rakandesi nggaboro dea,
nekakaimo yaku,
“Oh Pue ALATALA.
Nalanga mpuu KakuasaMiu!
Ampungimo ranga todeaMiu!
Kami tona nalente bo ledo naroso.
Berimba rapakule kami matuvu?”
3 Jadi TUPU nombaura niaNa bo nanguli;
“Anu nipeintamu haitu ledo majadi Kupovia.”
Pompakita karanduana: Apu
4 Hitumo anu nipopakita nTUPU Anu Nalanga Kakuasana ka yaku:
Nikitaku Ia nasadiamo mombahuku todeaNa nte apu.
Kapane apu haitu nompakabai tasi luo ri tambe ntanaa bo nompamulamo mompalabusi talua.
5 Nekakaimo yaku,
“Oh Pue ALATALA,
Nalanga mpuu KakuasaMiu!
Pakasi ranga kami!
Ane mamala,
taamakamo apu pehuku tutu!
Kami muli i Yakub nalente bo ledo naroso.
Bo berimba rapakule kami matuvu?”
6 Jadi TUPU nombaura niaNa bo nanguli,
“Hitu muni ledo majadi Kupovia.”
Pompakita katataluna: Kaloro pobeti
7 Hitumo anu nipopakita nTUPU ka yaku:
Nikitaku TUPU neangga ri sinjori tembo anu nipopeangga nompake kaloro pobeti.
Ia nanggingisi kaloro pobeti,
nompenoro kanoa tembo.
8 Pade nekutanamo TUPU nte yaku,
“Nuapa nipeintamu,
Amos?”
Nesana yaku,
“Kaloro pobeti,
PUE.”
Pade nanguli TUPU,
“Yaku nompake kaloro hitu mompopakita todeaKu nasimbayu eva tembo anu ledo nanoa peanggana.
Domo Kubaliki niaKu,
kana Kuhuku ira.
9 Ragerosi petupu-petupu ri bavo nu bulu
anu nipake ntoIsraelb mombasomba tupu ntanina.
Bo petupu ntoIsrael nipoviara mombasomba Yaku,c
raombosakasi.
Muli magau Yerobeamd Kupatesi ante guma.”
I Amos bo i Amazia
10 I Amazia pakeni ntopanggeni pesomba ri ngata Betel.
Nipakatuna kareba ka i Yerobeam magau Israel,
ivei,
“I Amos nompanesi todea mangeva i pua.
Tesa-tesana nompasusu todea aga mompakagero ngata hitu.
11 Apa niulina i pua mamate riara mposieva bo toIsrael rapali makavao dako ri ngatara mboto.”
12 Pade nanguli i Amazia ka i Amos,
“He nabi,
panjilimo hau ri tana Yehuda bo pasimbayumo tesa nTupu hamai.
Damo ira mombadekei pangande ka iko!
13 Tuumo mompasimbayu tesa nTupu [ri sii] ri Betel,
apa ngata hitu nitaniaka ka magau bo petupu ntodea.”
14 Nesana i Amos,
“Kakanana yaku ledo nabi anu nibayari nompapola tesa nTupu.
Yaku hii aga topompatuvu bimba bo topompupu vua kayu ara.
15 Tapi TUPU nombaronde yaku dako ri pokarajaaku haitu bo nantudu yaku mompasimbayu tesaNa ka toIsrael.
16 Jadi epemo tesa nTUPU.
Nitagimiu yaku mompasimbayu tesa nu Alatala ka todea Israel.
17 Sabana haitu iveimo tesa nTUPU ka komiu,
‘Bereimiu mompobalu karona riara ngata
bo ana-anamiu rapatesi riara mposieva.
Tanamiu rabagi-bagi ka tona ntanina
bo komiu mboto mamate ri ngata ntona anu ledo nangisani TUPU.
Todea Israel kana rapali makavao dako ri ngatara mboto.’ ”