Kagero nu Israel
6
Masilakamo komiu anu natuvu nasana ri ngata Sion,a
bo komiu anu nombarasai kasana ri ngata Samariab.
He komiu totua-totua nibila ri tana Israel!
Komiu anu nasaro nikakava ntodea nerapi tulungi!
2 Komiu [nangoe ka karoso bo kambaso ngatamiu sampe] nitudumiu tona hau mompeinta ngata Kalnec,
bo ngata mbaso Hamatd,
pade hau ri ngata Gate ri tana ntoFilistin.
Tantu mami ngata-ngata gahaitu ledo narosopa pade kamagaua Yehuda bo Israel.
Bo kamagauara ledo nambasopa pade kamaguamiu.
3 Jadi nisarumakamiu da masaepa eo silaka manggava komiu,
tapi pokainggumiu gahaitu aga mompakasalisa eo pepandasa makava.
4 Masilakamo komiu apa ledo nabuku raramiu nantora kagero nu Israel!
Komiu aga nompesana-sana naturu ri bavo mpaturu nabelo.
Komiu aga nompesana-sana nosusa netidombo
nangande bau japi bo bau bimba tobelona.
5 Komiu aga nompesana-sana nokacapi bo nodade dade nipoviamiu mboto.
Nisarumakamiu komiu nasimbayu mpo i Daud natau novia dade.
6 Komiu aga nompesana-sana nanginu anggur naoge mpuu
bo komiu aga nompesana-sana nompake lana tobelona anu navangi soana.
Tapi ledo nabuku raramiu nantora kagero nu Israel.
7 Sabana haitu,
komiumo pamulana rapali hau ri sangatana.
Posusa bo kasiromumiu nompesana-sana maupumo.
8 Tupu ALATALA,
Alatala anu nompajadi dunia bo isina,
nosumpa nte SangaNa mboto bo nodekei pepatoraNa,
ivei:
“Narau raraKu ante kalanga rara ntodea Israel.
Domo nasana raraKu ante banua-banua kamagauara anu nagaya.
Ngata mbaso Samaria ante pura-pura tona riarana
Kudekei ka balira.”
9 [Notesa vai i Amos,]
Nau damo sapulu tona metabuni riara sangu banua,
kana mamate muni ira.
10 Makava saito dako ri sampesuvura mompasiayu popatana ira,
bo rakenina mpesuvu mboa nu sampesuvuna gahaitu.
Rapekutanana tona anu naria ri bengo nu banua haitu,
“Da nariapa tona santanina natuvu ritu nte iko?”
Bo nesana tona haitu,
“Domo ria!”
Bo topompasiayu popatana haitu nanguli,
“Tuumo motesa!
Tuumo raulita sanga nTUPU [mbelaka marau Ia!]”f
11 Natantumo ane TUPU mombadekei parenta,
nau banua mbaso bara banua kodi kana ragerosi.
12 Ledo nesua ri akala jara mamala mangova ri bulu vatu,
bara tona mopajeko tasi ante japi.
Tapi komiu,
[nau ledo nesua ri akala],
natau komiu nombatenggoaka anu nanoa najadi eva racu mepakamate,
bo anu nakana najadi nasala.
13 Nalanga mpuu tesamiu,
apa nidagimiumo ngata Lodebar.g
Bo nangoe nanguli,
“Ante karoso kami,
kami namala nombaago ngata Karnaim.”h
14 ALATALA,
Tupu anu nompajadi dunia bo isina nanguli ivei:
“He todea Israel!
Yaku mombatudu tantara dako ri ngata ntanina
mombasuu njumangu ngatamiu.
Ira mompandasa komiu dako ri dala hau ri ngata Hamat ri bagia tasina
sampe hau ri Lemba Araba ri bagia pulunai.”