Yunus i

Nabi Yunus

Vamba nu Tesa

Sura hitu nosisala nte sura nabi ntanina ri Buku Gasa, apa ledo niisi petevai bara pepatuduki nu nabi. Buku hitu notesa katuvu Nabi Yunus tempo nisapuakana parenta nu Alatala.

I Yunus nitudu nu Alatala hau ri ngata mbaso Niniwe ri tana Asyur. Tupu ngata haitu bali ntoIsrael, todea i Yunus, jadi i Yunus ledo nadota hau mompapola tesa nu Alatala ka ira. Nisarumakana ane toNiniwe majeamo lako ri dosara, natantu Alatala domo madota mombahuku ira. Panguli i Yunus, aginapa ira rahuku. Jadi nipasimbukuna nalai tapi nadea kajadia nepakaviora najadi ri karona. Kaupuna najeamo ia bo nioseakana parenta nTupu hau ri ngata mbaso Niniwe. Nangepe tesa nu Alatala nipapola i Yunus, tupu ngata Niniwe najea mpuumo sampe ledo najadi ngatara nigerosi nTupu. Narau rara i Yunus nanggitana.

Buku Yunus nompopakita Alatala nakuasa nomparenta anu nipajadiNa. Tapi nelabipa vai pade haitu, nipoasiNa manusia bo nadamba Ia nombaampungi dosa. NipokonoNapa nombaampungi bo nompakasalama tona pade nombahuku bo nogerosi ngatara, naupa tona haitu bali nu todeaNa mboto.

Isi nu Buku

I Yunus nipokio tapi ledo nangoseaka parenta nTupu 1:1-17

I Yunus najeamo bo nipakasalama 2:1-10

Petevai nTUPU nipapola I Yunus ka toNiniwe 3:1-10

TUPU nombaampungi toNiniwe 4:1-11