Nabi Yunus
I Yunus ledo nangoseaka parenta nTupu
1
TUPU notesa ka i Yunus ana i Amitai.
2 Ivei tesaNa:
“Koimo iko hau ri ngata mbaso Niniwe.
Ulikamo ira,
Yaku mombahuku ira,
sabana pokainggura nadaa.”
3 Tapi ledo nadota i Yunus,
jadi nalaimo ia hau ri ngata Tarsis.
Notua ia hau ri ngata Yopa ruru pade nikavana kapaa anu nanggalivo hau ri ngata Tarsis.
Naupu ia nombayari,
nipesavinamo kapaa haitu bo haumo ia nosinggani nte topokarajaa ri kapaa hau ri ngata Tarsis,
ala makavao lako nte TUPU.
4-5 I Yunus nanau hau ri tambena ntoto bo naturu.
Naluru mpuu ia namonjo ri sia.
Naupu sia,
nipopeburu nTUPUmo poiri rimboso ri bavo ntasi,
jadipa tasi nobalumba mbaso bo nombarumpa kapaa haitu,
sakidepa narupu.
Topokarajaa ri kapaa naviora rarara,
simbo nongare-ngare nerapi tulungi nte tupu anu nisombara.
Nitedakara rantasimo sanu pangulaya kapaa haitu ala mangaa bo domo matoyo.
6 Tempo topanggeni kapaa haitu hau nanau ri tombi tambena ntoto,
nikavana i Yunus da ranja nggamonjo.
Pade niulikana,
“Nakuya iko aga namonjo tempona vehitu!
Pembangumo!
Posambayamo!
Mekitulungi nte tupu anu nisombamu!
Bara maasi matana manggita kita bo ledo mamate kita.”
7 [Nompenepa i Yunus bo topanggeni kapaa],
nosiulikamo topokarajaa ri kapaa,
“Ratendetamo lamoro ala rasanita bara isema nasala sampe nikava nu silaka kita!”
Nitenderamo lamoro,
nambela sanga i Yunus.
8 Pade niulikaramo i Yunus,
“Ikomo sampe najadi ivehitu?
Dako ri umba iko?
Tonuapa iko?
Nuapa pokarajaamu?”
9 Nesanamo i Yunus,
“Yaku toIbrani.
Yaku nombasomba TUPU,
Alatala ri suruga,
anu nompajadi langi,
tasi bo kabatana.”
10 Pade nitesanamo nuapa sabana nipalaikana dako nte TUPU.
Nangepe tesana haitu,
nelabimo kaviora nu topokarajaa ri kapaa bo niulira ka ia,
“Nadaa mpuu poviamu!”
11 Balumba nantabaimo karimbosona,
jadi topokarajaa ri kapaa nompekutana ia,
“Nuapa rapovia kami ka iko ala menonto balumba hitu?”
12 Nesanamo i Yunus,
“Tedaka rantasimo yaku,
menontomo ngena balumba.
Apa nisaniku,
yakumo sabana sampe naria balumba hitu nanggava kita.”
13 Tapi ledo nadota topokarajaa ri kapaa.
Aga nipasimbukura nombavose kapaa haitu hau ri tinggi ntasi.
Tapi ledo nipakulera apa balumba aga nantambai karimbosona.
14 Jadi nekakaimo ira nte TUPU,
“O PUE,
neemo rapakamate kami sabana mompatesi tona hitu.
O PUE,
nipoviaMiumo anu nipodotaMiu,
jadi neemo rapakamate kami ane rapana tona hitu ledo nasala.”
15 Pade nitedakara hau rantasimo i Yunus.
Bo netaamo balumba haitu.
16 Topokarajaa ri kapaa naeka mpuumo nte TUPU.
Nesorepa ira ri kabatana,
nidekeiramo pesomba ka TUPU bo mpengaya-ngaya anu nijanjira.
17 Tempo haitu,
TUPU nantudu sambaa bau mbaso makava mangome i Yunus.
Jadi i Yunus nonturo riara nu bau talu-mbongi bo talu-eo kasaena.