Amos
Vamba nu Tesa
Nabi Amos nompapola tesa nTupu nitasere pituatu lima pulu mpae dopame nipoanaka Yesus. Tempo haitu, kamagaua ntoYahudi, natebagi randua. Kamagaua Yehuda ri sabingga puluna bo ngata mbaso kamagaua haitu ri Yerusalem. Kamagaua Israel ri sabingga tasina bo ngata mbaso kamagaua haitu ri Samaria. I Amos dako ri ngata Tekoa ri kamagaua Yehuda, tapi ia hau nompapola tesa nTupu ka tona ri kamagaua Israel (peinta Amos 7:10-12).
Tempo haitu tona nakalumana ri kamagaua Israel natuvu nasana. Tapi nadea tona nakalumana ledo nokainggu nanoa nte tona napakasi tapi aga nipandasara. Nadea toIsrael nombasomba viata-viata, ledo nisombara Tupu. Tapi tona anu nombasomba Tupu aga novia ada petupu, ledo netupu ante mpuu-mpuu rara.
I Amos mpuu-mpuu nabia nompapola Tesa nTupu ka toIsrael, niulina: Tupu mombahuku todea Israel, sampe ira rakeni ratavani ri ngata ntanina. I Amos nompopatora toIsrael mangoseaka Tupu mpanjili bo mokainggu manoa. Niulina, “Mbelaka da maasi mata nTUPU manggita tona anu naboli ri tana Israel.” (5:15) Ia nanguli mapara ri kaupu dunia, TUPU mompakabelo mpanjili kamagaua i Daud bo mompoporasi todeaNa (9:11-15).
Isi buku
Pamulana (1:1-2)
TUPU mombahuku todea-todea ngata ri sinjori ngata Israel, bo todea Israel mboto (1:3—2:16)
Pepatora pehuku (3:1—6:14)
Bara sakongaya pompakita notesaki pehuku (7:1—9:10)
Kamagaua Israel rapakabelo bo ngata-ngatana raponturo mpanjili. (9:11-15)