Panggaupu dunia
12
Nanguli vaimo malaeka nopakea kae lusua, “Ri tempo haitu meumba i Mikhael pakeni mbaso nakuasa mombasaliku todeamu. Pade maria muni ngena tempo mandasa mpuu anu dopa naria najadi dako ri pamulana ngatab sampe hitu. Tapi pura-pura todeamu anu nitulisi sangara riara buku nu Alatalac, kana rapakasalama. 2 Madea ira anu namatemo matuvu mpanjili, sanu ira manggava katuvu sampe ri kasae-saena, sanu vai mombarasai pepakaeya bo pepandasa sampe ri kasae-saena. 3 Tona nanoto pompekirina mevangga eva pevanta nu langi. Bo isema-sema nompatuduki tona movia anu mabelo bo manoa, mareme mpo betue-betue sampe ri kasae-saena.”4 Naupu sia, nanguli vaimo malaeka haitu ka yaku, “Daniel, tutuimo Buku tutu, bo dikamo tanda ala batena matetutui sampe mapara kaupu nu dunia. Madea tona hau tumai mangelo kakanana bo pangisani mantambai kadeana.”
5 Pade nikitaku naria randua malaeka ntanina neangga ri tinggi binangga. Saito neangga ri sambotena sii, bo saitopa neangga ri sambotena hamai. 6 Bo malaeka nopakea nalusu neangga ri bavo nu uve. Saito malaeka nekutana nte ia, “Sakuya kasaena pade maupu kajadia-kajadia nepakaeka hitu?”
7 Malaeka ri bavo nu uve nanganggataka palena ntimali-mali. Niepeku ia nosumpa ante sanga nu Alatala anu natuvu sampe ri kasae-saena bo niulina, “Kajadia-kajadia haitu majadi talu mpae santanga kasaena. Maupupa pompandasa topomparasaya Alatalad, pade maupu munimo kajadia-kajadia nepakaeka haitu.”
8 Pura-pura anu niulina haitu niepeku, tapi ledo nipahaku. Pade nipekutanaku, “Pua, berimba ngena kaupuna pura-pura hitu?”
9 Nesana ia, “Koimo Daniel, sabana anu niuli hitu kana ratabuniaka bo majadi rahasia sampe mapara kaupu nu dunia. 10 Madea tona kana rauji bo rapesoba ala majadi maroso bo mpuu-mpuu momparasaya. Tona nadaa pokaingguna batena mokainggu madaa; ledo ntoto mombapaha bo aga tona nanoto pekirina mombapaha anu nitesa hitu.
11 Nompamula dako ri tempo pedekei pesomba eo-eo nipopetaa sampe nipopeangga anu mompakaviora rara, anu niuli ‘Tona nadaa mpuu anu nipovuu mata nu Alatala’ haitu, matepaliumo sanjobu roatu siopulu eo [1.290]. 12 Masana mpuu tona batena manjarumaka Tupu sampe ri eo kasanjobu taluatu talupulu alima. [1.335]
13 Iko Daniel, pakaroso pomparasayamu sampe ri kaupuna. Iko mamate ngena, tapi kana matuvu mpanjili mantarima tambo ri kaupu nu dunia.”