Posambaya i Yunus
2
Dako riara ntai nu bau haitu,
i Yunus nerapi nte TUPU,
Alatala nisombana.
Ia nanguli:
2 “O PUE,
riara kasusa raraku,
yaku nekakai nte Komiu
bo nipesanakaMiu yaku.
Tempo yaku sakidepa mamate,
yaku nerapi tulungi nte Komiu.
Pomperapiku niepe bo nipariaraMiu.
3 Yaku nitedakaMiu hau ri kandalana,
natudu ri kaupu ndala ntasi.
Hamai yaku nitoro uve naranggaa,
balumba mbaso nombarumpa yaku.
4 Yaku nanguli riara ntaiku:
Nipopalai nTupumo yaku dako ri ngayoNa.
Bara domo kukita vai banua ponturoNa anu nagasa.
5 Uve ntasi nombalongasi yaku,
tasi luo nombalomesi njumangu karoku,
lomo ntasi nombabeve balenggaku.
6-7 Yaku nekatudu sampe ri pantaa kandala ntasi.
Hamai yaku eva nesua ri ponturo malaeka ntomate bo vambana matetutui sampe ri kasae-saena.
Tempo nyawaku nalente ntotomo ri karoku,
pade yaku nantora bo nekakai nte Komiu.
NiepeMiumo perapiku,
ri banuaMiu nagasa.
Bo nipakasalamaMiumo yaku.
NisoreakaMiumo yaku dako riara ntasi
bo nipakasalamaMiumo yaku lako ri kamatea.
O PUE,
Komiumo Alatala nisombaku!
8 Tona anu nanjarumaka tupu-tupu ntanina ledoria gunana.
Ira nompalaisi bo domo natutu nangoseaka Komiu.
9 Tapi yaku modade mantoiya Komiu
bo kudekei pesomba ka Komiu.
Kupakadupa pura janjiku.
PUE,
Komiumo nompakasalama yaku.”
10 [Naupupa i Yunus nosambaya] nitudu nTUPUmo bau haitu mombaluasaka ia ri kabatana.