Matius i

Kareba Belo nitulisi

i Matius

Vamba nu Tesa

Kareba Belo hitu nitulisi i Matius, saito lako sapulu randua anaguru i Pue Yesus. Dopame ia nangoseaka i Yesus, ia topesingara balasitee. Ri Kareba Belo anu nitulisi i Lukas bo i Markus, i Matius hitu niuli muni i Lewi (Lukas 5:27-32; Markus 2:14-17). I Matius notulisi Kareba Belo hitu ala mompakalanto i Yesus mpuu-mpuu Magau Topepakasalama anu nijanji nu Alatala nggaulu. Nadea nggani i Matius nompakalanto berimba katuvu i Pue Yesus nompakadupa tesa nu nabi-nabi nggaulu. (Peinta 1:23; 2:6,15,17-18,23; 3:3; 4:14-16; 8:17; 12:17-21; 13:35; 21:4,5; 27:9-10.) Nau i Yesus nipoanaka ri ngata ntoYahudi bo natuvu nangoseaka agama Yahudi, Kareba Belo ledo aga ka toYahudi, tapi ka pura-pura manusia (13:38; 28:18-20).

Buku hitu nisunju nangoseaka alima pepatuduki ndoe. Ri kolu sangu-sangu pepatuduki nitesa bara sako-ngaya kajadia anu rapakalanto ngena ri pepatuduki. Iveimo sunjuna: (1) Pepatuduki ka todea tempo Ia ri bulu (Pasal 5-7), (2) Pepatuduki ka anaguruNa dopame nituduNa ira hau mompatolele Kareba Poparenta nu Alatala (Pasal 10), (3) Porapa-porapa anu nompakalanto Poparenta nu Alatala (Pasal 13), (4) Pepatuduki ka anaguruNa berimba mangoseaka Ia (Pasal 18), bo (5) Pepatuduki ri Bulu Zaitun nombaboto kajadia-kajadia ri tempo makava (Pasal 24-25).

Isi nu Buku

Sunju sanga ntotua i Yesus, tesa pompoanaka Ia bo tesa tempo kanganaNa (Pasal 1-2)

Pamulana pokarajaa i Yesus (3:1-4:11)

Pokarajaa i Yesus ri bagia Galilea (4:12-14:12)

I Yesus nompamula pokarajaaNa ri Galilea bo nompelisi anaguruNa pamulana (4:12-25)

I Yesus nompatuduki todea ri bavo nu bulu (Pasal 5-7)

Kabaraka-kabaraka nipovia i Yesus (8:1-9:34)

I Yesus nompatuduki anaguruNa (9:35-11:1)

Kajadia-kajadia ri bagia Galilea anu nompakalanto i Yesus mpuu-mpuu Magau Topepakasalama (11:2-12:50)

Porapa-porapa mompakalanto Poparenta Alatala (13:1-52)

ToNazaret ledo nantarima i Yesus (13:53-58)

Kamate i Yohanes Topediu (14:1-12)

Pokarajaa i Yesus ri ngata-ngata napara bagia Galilea (14:13-17:21)

Pokarajaa i Yesus kaupuna ri bagia Galilea (17:22-18:35)

Polipa i Yesus hau ri ngata Yerusalem (Pasal 19-20)

I Yesus ri ngata Yerusalem (Pasal 21-28)

Panggavia bo pepatuduki i Yesus ri ngata Yerusalem (Pasal 21-22)

I Yesus nangonteaka pakeni agama Yahudi (Pasal 23)

Pepatuduki i Yesus ri Bulu Zaitun (Pasal 24-25)

I Yesus nisaka, nitangara bo nipatesi (Pasal 26-27)

I Yesus natuvu mpanjili (28:1-15)

I Yesus nombatudu anaguruNa manggeni Kareba Belo (28:16-20)