I Yunus narau tapi TUPU naasi mataNa
4
I Yunus ledo ntoto nadamba rarana ante anu najadi haitu,
narau mpuu iaa.
2 Pade nosambayamo ia,
“O PUE,
apa ledo niuliku mami baipia,
dopame yaku tumai dako ri ngataku?
Natantumo rapakasalamaMiu ira.
Hitumo hii sabana nipalaikuka hau ri Tarsis!
Nisaniku Komiumo Alatala topepotove bo topepoasi,
nandoe posabara,
nalusu,
bo nasaro nasadia nombabaliki nia pehuku.
3 O PUE,
hitupa dekeikamo yaku mamate,
apa nabelopa yaku mamate pade matuvu.”
4 Nesana TUPU,
“Ledo masipato iko marau vetutu.”
5 Pade hau ri bagia mpandake nu ngatamo i Yunus bo nonturo ri sia.
Nipoviana sou bo niponturona,
nompopea anu majadi ri ngata mbaso Niniwe.
6 Jadi TUPU Alatala nompakatuvu tuda-tuda nendoo mompakalendu i Yunus lako ri kapane nu eo ala maluu raepena.
Nipokono i Yunus mpuu tuda-tuda haitu.
7 Tapi kabobayana,
nitudu nTUPUmo sambaa kaule nombatambasi kale nu tuda-tuda haitu,
sampe naluli.
8 Nebondapa eo,
nipopeburu nu Alatalamo poiri mpane meburu dako ri mpandakena.
Sakidepa nalipo rara i Yunus nivanta nu eo naporo,
eva mapapu balenggana.
Kaupuna,
naupumo rarana bo ia madota mamate.
Niulina,
“Aginamo yaku mamate mamimo!”
9 Tapi nanguli Alatala ka ia,
“Ledo masipato mabuku gaga raramu mantora tuda-tuda haitu!”
Nesanamo i Yunus,
“Nakuya yaku bo ledo marau?
Masipato mami yaku marau sampe mamate.”
10 Pade nanguli TUPU ka ia,
“Tuda-tuda haitu aga sambongi natuvu bo kaeona nalulimo;
ledo iko nompakatuvu,
ledo muni iko nompiarana.
Naupa ivesia,
nabuku raramu apa nalulimo.
11 Nemopa Yaku.
Nabuku mpuu raraKu nompekiri ka toNiniwe,
tupu ngata mbaso haitu.
Domo rauli binata-binatana anu domo natebila kadeana.
Ri sia nelabi saatu roapulu njobu ngana anu dopa nisanira nompoposisala anu nabelo bo anu nadaa.”