I Yunus nangoseaka parenta nTUPU
3
Karongganina TUPU notesa ka i Yunus.
2 Nanguli Ia,
“Koimo hau ri Niniwe,
ngata mbaso haitu,
bo ulimo tesa niuliKu ka iko baipia,
ka todeana.”
3 Jadi nioseaka i Yunus mpuumo tesa nTUPU bo haumo ia ri Niniwe,
sangu ngata nambaso.
Kaluo nu ngata haitu sampe talu eo ntoto kasaena raose.
4 I Yunus nesua ri ngata haitu bo naupu nolipa njumaeo,
nipatolelenamo tesa nTupu ivei,
“Patapulupa eona,
mageromo ngata Niniwe!”
5 Toponturo ri Niniwe niparasayaramo tesa nu Alatala haitu.
Njumangu todea nopuasa puramo,
tona nalanga nturona bo tona biasa.
Nipasuara baju nipovia lako ri karu tandana najeamo dako ri dosa-dosara.
6 Tempo magau Niniwe nangepe kareba haitu,
nipari-parinamo nanau dako ri ponturo kamagauana.
Nivonjunamo baju kamagauana bo nipasuanamo baju nipovia lako ri karu,
pade nonturomo ia ri bavo nu sovua,
[tandana ia muni najeamo].
7 Naupusia nipatolelena muni parenta ivei:
“Parenta hitu nisuvuraka ante kabotu nu magau bo mantarii:
Pura-pura tona,
japi,
bimba bo binata ntanina nitagi mangande bo manginu.
8 Manusia bo binata kana mompasua baju nipovia lako ri karu,
tandana panjoso rara.
Pura-pura tona kana mosambaya ante mpuu-mpuu ka Alatala.
Kana rabalikira pokainggura nadaa bo rakabasakara dosa nipoviara.
9 Bara aga vesia rabaliki nu Alatalamo nianaNa bo domo marau sampe domo rapakamateNa kita!”
10 Alatala nanggita pokainggura,
nikitaNa nikabasakaramo pokainggura nadaa.
Jadi nibalikiNamo niaNa bo ledo najadi mombahuku ira.