Pompakita kaalimana: TUPU neangga napara Lanta Pesomba
9
Nipeintaku TUPU neangga ri sinjori lanta pesomba.
Ia nanguli:
“Boba pakaroomo balengga-balengga ntinja ri BanuaKu ala mogoya pura banua hitu.
Bo dungganaka puramo tinja haitu mombarunju balengga-balengga ntona.
Ira anu ledo mamate tempo haitu,
Kupatesi riara mposieva.
Ledoria saitoa mamala mangova malai mompakasalama karona.
2 Naupa ira mompasimbuku mesua ri ponturo malaeka ntomate,
ira kana Kuala.
Naupa ira mompene sampe ri langi,
ira kana Kutauraka.
3 Naupa ira metabuni ri bavo bulu Karmel,
ira kana Kuelo bo Kusaka.
Naupa ira metabuni ri tambe ntasi,
Kutudu nagaa riara ntasi mombateo ira.
4 Naupu ira rakeni bo ratavani nu balira ri ngata nakavao,
kana Kutudu tona mompatesi ira.
PatujuKu nomparantaika ira ledo mompakasalama ira
tapi aga mombahuku ira.”
5 Nanguli i Amos,
“Tupu ALATALA anu nompajadi dunia bo isina,
nombatui dunia bo dunia nogoya.
Haitumo sabana pura-pura todea nasusa rarara.
Tana neore bo nanau,
eva uve binangga Nil nalono bo nakunju.
6 TUPU nompopeangga banuaNa ri langi,
bo nombatuu langi ri bavo dunia.
NipoposumoaNa uve ntasi
bo nipajadiNa uda nombadunggusi kabatana.
Anu nompovia pura-pura haitu
sangaNa TUPU.”
Alatala nompoara todea nipelisiNa
7 TUPU nanguli,
“He toIsrael,
ri mataKu komiu nasimbayu ante toEtiopiab [anu nibanjerenimiu].
Yaku nanggeni komiu nesuvu dako ri ngata Mesir,
nikeniKu muni balimiu toFilistin nesuvu lako ri levuto Kreta,c
bo toSiria nisuvurakaKu muni dako ri tana Kir.d
8 Yakumo,
Tupu ALATALA nomparantaika njuu tona riara kamagaua Israel anu nadosa,
bo Kuropusi ira sampe maupu.”
Tapi nau ivesia,
nanguli vai TUPU:
“Ledo Kuropusi pura toIsrael,
muli i Yakub.
9 Pariaramo,
Yaku mombakamburaka toIsrael ri tatanga ntodea ri ngata-ngata ntanina.
Kugaaraka tona nadaa dako ri todeaKu,
nasimbayu eva tona notapisaka gando nombataniaka isina bo kulina.
Tona nadaa rahuku pura.
10 Tona nadosa ri tatanga ntodeaKu nanguli,
‘Ledoria silaka manggava kami.’
Tapi kakanana ira mamate riara mposieva.”
Kamagaua Israel rapakabelo mpanjili
11 TUPU nanguli [muni],
“[Tapi] makava tempona ngena,
Kupakabelo mpanjili poparenta kamagaua i Daud.
Hitupa poparenta kamagauana nasimbayu mpo banua naombo.
Tapi pura-pura anu nagero Kupakabelo mpanjili
sampe masimbayu mpo tempo nggaulu.
12 ToIsrael mombakuasai mpanjili ngata Edome anu da naboli
ante pura-pura tana ntanina anu nggauluna nesua riara bagia ngataKu.”
Ivesiamo tesa nTUPU bo Ia mompakadupana.
13 TUPU nanguli,
“Pariaramo,
makava ngena tempona mabelo mpuu katuvu nu gando bo madea aselena
bo ledo maupu-upu mosoreaka aselena.
Anggur nituda madea aselena bo masalisa mambaso vuana,
sampe tona le maupu-upu movia uve anggur.
Anggur maoge mpuu uvena,
evamo uve mojeo bo moili dako ri bulu.
14 Katuvu ntodeaKu toIsrael Kupakabelo bo ira masana mpanjili.
Ira mombabangu mpanjili ngata-ngatara anu nagero,
pade maroo hamai.
Ira mombatuda anggur ri taluara bo manginu uvena.
Ira motuda mpengaya-ngaya tuda-tuda bo mangande aselena.
15 Kupoponturo todeaKu ri tana anu nidekeiKumo ka ira.
Domo rapopalai ira dako ri sia.”
Ivesiamo tesa nTUPU,
Alatala nisombata.