Pompakita kaampana: Karanji noisi vua natasa
8
Hitumo anu nipopakita nTupu ALATALA ka yaku.
Nikitaku karanji noisi vua-vua anu natasa.
2 TUPU nekutana,
“Nuapa nipeintamu,
Amos?”
Nesana yaku,
“Karanji noisi vua-vua natasa.”
TUPU nanguli,
“Nakavamo tempona Kuhuku todeaKu Israel,
[evamo vua nasadiamo rakande.]
Domo Kuura niaKu,
kana Kuhuku ira.
3 Tempo Yaku mombahuku ira,
dade-dade ri banua kamagaua majadi tangi nggabuku rara.
Ri umba-umba maria mboa ntona aga ratedeaka nggalino.”
Ivesiamo tesa nTupu ALATALA.
Pepatora ka tona nompandasa singgamanusiana
4 He komiu topompandasa tona napakasi
bo topompatesi tona nasusa ri ngata hitu!
Pariaramo!
5 Komiu nompekiri,
“Maipia-piamo vei posusa bula ngura maliu ala mamala mompobalu gando?
Maipia-piamo vei maliu eo penonto ala mamala mompobalu-balu vai?
Nadota mpuumo rara mebagiu ante mompakakodi posuka,
mompakasuli alina bo mompake timbanga anu neonta.
6 Gando ledo nabelo mamala rapobalu ante ali masuli.
Bo raelo tona napakasi anu ledo rapakulena mombayari indana.
Ira raali rapajadi batua,
naupa indana aga sakide eva ali sapasa solopu.”
7 TUPU,
Alatala nisomba ntodea Israel nosumpa,
“Ledo ntoto Kukalingasi pokainggura nadaa.
8 Sabana haitu,
dunia mogoya bo pura-pura tona masusa rarara.
Njumangu tanara meore bo manau eva Binangga Nil nalono bo nakunju.”
Kamate mata nu eo bo kasusa rara
9 Iveimo tesa nTUPU Anu Nalanga Kakuasana,
“Makava ngena tempona,
Kupakalanda eo tempo tongo eo
bo Kupakalanda dunia tempo da maeo.
10 Posusa kadamba raramiu Kupajadi posusa kamate,
bo dade-dade kadamba raramiu Kupajadi dade tangi.
Komiu mombagau buluamiu bo mompasua baju nipovia lako ri karu tanda nggabuku raramiu.
Komiu mpo tona njamboko nantangisi kamate anana saito-itona.
Eo haitu mapumpu nte tangi.”
Nalentora mangepe tesa nTUPU
11 Iveimo tesa nTupu ALATALA,
“Makava tempona Kupakaara ngata hitu.
Tona maara ledo maara ka kandea
bo tona mabai tambolona ledo mabai ka uve,
tapi maara bo mabai tambolora mangepe TesaKu.a
12 Ira ngena hau tumai ri njumangu dunia mangelo TesaKu,
dako ri tasina hau ri puluna
bo dako ri mpadakena hau ri mpanauna
tapi ledo rakavara.
13 Bo eo haitu muni ngana-ngana randaa bo kabilasa
malimpu sabana nakabaisa [apa ledo nikavara Tesa nTupu.]
14 Tapi tona anu nosumpa ante sanga ntupu ntanina anu nisomba ntoSamaria,
madungga bo domo mamala membangu,
haitumo tona nosumpa ante sanga viata anu nisomba ntoDan bo toBersyeba.”