Dade kabuku rara ka Israel
5
1-3 I Amos nanguli,
“Epemo,
todea Israel!
[Nabuku mpuu raraku] sabana tesa nTUPU anu Nalanga Kakuasana nanguli ivei:
‘Ane sanjobu tantara dako ri sangu ngata ri Israel hau riara mposieva,
damo saatu manjili.
Ane saatu tantarana hau mosieva,
damo sapulu manjili.’ ”
Haitu sabana kupopaepe ka komiu dade kabuku rara ivei:
“Israel nirapaka eva tona da nangura katuvuna
anu nadungga bo domo namala nembangu.
Ia nipalamba notuobo ri bavo ntanana mboto,
domo ria tona mombabangutaka ia.”
Pepatora ala manjili mpanjili mangoseaka TUPU
4 Iveimo tesa nTUPU ka toIsrael:
“Panjilimo tumai nte Yaku
ala matuvu komiu.
5 Tuumo hau ri ngata Betsyeba metupu.a
Tuumo metupu ri ngata Betel,
apa ngata Betel kana magero.
Tuumo hau metupu ri ngata Gilgal
apa todea ngata Gilgal rakeni ratavani.”
6 Pade nanguli i Amos,
“Panjilimo nte TUPU ala matuvu komiu.
Ane ledo manjili komiu,
Ia makava mpo apu anu mendele mompalabu pakaupu tona ri kamagaua Israel.
Ledoria saitoa tona ri Betel mamala mompepaya apu haitu.
7 Masilaka mpuumo komiu anu nombatenggoaka anu nanoa bo nombabanjereni anu nakana.
8 TUPUmo anu novia betue-betue ri laerava,
betue Malunu bo betue Totolongu.b
Ia nombabali landa najadi reme
bo eona najadi bongina,
Ia nombabusaka uve dako rantasi hau ri kabatana.
Anu novia pura-pura haitu SangaNa iamo TUPU.
9 Ia nompakaropu tona nakuasa
bo nombagerosi bente-bentera.”
10 TUPU nanguli ka toIsrael,
“Navuu matamiu nanggita topotangara nanoa
bo tona notesa nakana riara mpotangara.
11 Nipandasamiu tona napakasi
bo niagosimiu asele mpanggaviara.
Sabana haitu,
naupa komiu movia banua nagaya,
ledo raponturomiu.
Naupa komiu motuda anggur nabelo ri talua,
ledo rainumiu uvena.
12 NisaniKu,
mpendua ngganimo komiu novia nadaa
bo dosamiu nadea mpuu.
Komiu nompandasa tona nabelo,
bo nantarima doi mate.
Ledo nipeilimiu tona napakasi anu nekitulungi riara mpotangara.
13 Sabana pokainggumiu haitu,
tona anu natau nompekiri anu nabelo tempo haitu,
domo nokanano sabana ri tempo haitu,
tempo nadaa.”
14 Nanguli i Amos,
“Pasimbukumo mokainggu mabelo,
nemo movia madaa,
ala matuvu komiu.
Ane rapoviamiu ivesia,
ALATALA,
Tupu anu nompajadi dunia bo isina mpuu-mpuu momporoa komiu
eva anu nasaro niulimiu.
15 Povuu matamo anu nadaa bo potovemo anu nabelo,
pakabelo bo pakanoa mpuu motangara riara mpotangara.
TUPU anu nompajadi dunia bo isina,
bara da maasi mataNa manggita komiu toIsrael anu da maboli.”
16-17 ALATALA,
Tupu anu nompajadi dunia bo isina nanguli,
“Tempo Yaku makava mombahuku komiu,
tona mantangalu bo motumangi ri dala ra ngata,
sabana kabuku rara.
Topokarajaa ri talua raronde mosinggani-nggani ante tona anu nitambo mantangisi tona namate.
Nau tona ri talua-talua anggur motumangi puramo.”
Ivesiamo tesa nTUPU.
Nalentoraka Eo Potangara nTUPU
18 Masilaka komiu anu nalentora ka Eo Potangara nTUPU!
Nuapa gunana eo haitu ka komiu?
Eo haitu aga eo landa,
ledo eo reme ka komiu.
19 Ri eo haitu komiu ledo mamala makabasaka dako ri silaka,
eva tona anu nangova ka singa,
aga nosintomu ka beruang,
bo nakavapa ri banua,
nanjuko ri rindi
aga niteo nu ule.
20 Eo Potangara nTUPU mpuu-mpuu manggeni landa,
ledo reme,
tapi aga nagombu,
ledoria vantana.
Petupu ntoIsrael ledo nipokono nTUPU
21 TUPU nanguli,
“Narau raraKu bo navuu mataKu
nompeinta bago-bago nu posusa agamamiu!
22 Naupa komiu nanggeni pesomba rapalabu
bo gando rapesomba ka Yaku,
ledo Kutarima.
Domo Kutarima binatamiu anu naboya gahaitu,
binata anu rapesombakamiu ka Yaku majadi pesomba posinggabelo.
23 Taamakamo dade-dademiu nakanano;
domo Yaku mangepe kacapimiu.
24 Aginapa komiu batena mokainggu manoa
eva uve noili ledo ria kaupu-upuna,
bo batena mokainggu mabelo
eva binangga anu ledo sanggania nabai.
25 He todea Israel!
Tempo Yaku nanggeni komiu nangose karava bai patapulu mpae kasaena,
ledo ria komiu nombadekei pesomba ka Yaku.
26-27 Tapi komiu aga nombasomba tau-tau nu viata Sakutc,
anu najadi magau nisarumakamiu,
bo tau-tau Kewand sanga nu viata betue anu nisombamiu.
Sabana haitu,
Kutedeaka komiu makavao haunapa dako ri ngata Damsyik
bo tau-tau-tau-tau nu viata anu nipoviamiu haitu,
kana rasimbuakamiu mboto.”
Ivesiamo anu nitesa nTUPU,
anu nosanga Alatala anu nompajadi dunia bo isina.