TUPU nombatuenaka mombine-mombine Samaria anu aga nompokono mbara-mbara nagaya
4
“He mombine-mombine Samaria!
Epemo tesa nTUPU!
Komiu nantambai kaboyana eva japi-japi rumandaa ri tana Basan!a
Komiu nompandasa tona nalente bo tona ledo nompakule,
bo niagosimiu anu ntona napakasi.
Bo komiu nantudu bereimiu langgai
kana mompasadia panginu anu mompakalimpuno komiu.
2 Yaku Tupu ALATALA,
ledo ria kasimbayuna.
Yaku nosumpamo,
makava ngena tempona komiu rakeni mpalai rataja ntona ante mekab.
Komiu pura-pura ngena masimbayu eva bau mekai ri mata nu meka.
3 Komiu rataja mesuvu dako rangata modala ri olo-olo tembo anu nagero,
bo rakeni hau ri sabingga Bulu Hermon.”c
Ivesiamo tesa nTUPU.
Pesomba ntoIsrael pesomba anu ledo nakana
4 “He toIsrael!
[Nipokonomiu gaga novia dosa!]
Koimo komiu hau ri banua nipetupu ri ngata Betel bo povia-viamo dosa ri sia.
Koimo hau ri banua nipetupu ri ngata Gilgal bo damo dota-dotamiu movia dosa.
Kenimo isi pesomba ri tempo mpadondona
bo dekeimo asele mpoviamiu sangu bagia dako ri sapulu bagia.
Dekeimo talu eo sanggani!
5 Dekeimo roti noragi tanda posukurumiu ka Yaku,
[naupa roti noragi haitu nitagiKu].
Pangoemo komiu motesa ka tona ntanina,
nikenimiumo pedekei kamomi rara.
Apa haitumo nipokonomiu!”
Ivesiamo tesa nTupu ALATALA.
ToIsrael ledo nadota nanjili mpanjili nangoseaka TUPU
6 Iveimo tesa nTupu:
“Yakumo anu nompakaara mpai todea ri pura-pura ngatamiu.
Tapi komiu kana ledo nadota nanjili mpanjili nangoseaka Yaku.
7 Ledo nidekeiKu uda mombadunggu tuda-tudamiu,
naupa tuda-tudamiu moparaluu uve apa talu mbulapa pade rasoreaka aselena.
Sangu ngata nipakaudaKu bo ngata ntanina ledo nipakaudaKu.
Sanu talua nidunggu nu uda tapi talua ntanina ledo nidunggu nu uda.
8 Toponturo ri bara sakuya ngata nakabaisamo.
Ira hau ri ngata ntanina mangala uve,
tapi ledo nagana uve.
Naupa ivesia,
komiu ledo nadota nanjili mpanjili nangoseaka Yaku.”
Ivesiamo tesa nTUPU.
9 “Yaku nompakadua gandomiu,
bo nompakalele tuda-tuda bo talua-talua anggurmiu.
Kayu ara bo kayu zaitunmiu naupu nikande nggaboro.
Ivesiamo Yaku nompandasa komiu.
Naupa ivesia,
ledo muni nadota komiu nanjili mpanjili nangoseaka Yaku.
10 NipakatuKumo dua mpendai nadaa ka komiu
eva dua mpendai nadaa nipakatuKu ka toMesir baipia.
Kabilasa-kabilasamiu nipatesiKu riara mposieva.
Bo pura-pura jaramiu niagosi.
Sampe potendamiu nateisi ante mboa anu nesoamo.
Naupa ivesia,
ledo nadota komiu nanjili mpanjili nangoseaka Yaku.”
11-12 “NiropusiKumo sabagia komiu,
evamo pombaropusiKu toSodom bo toGomorad baipia.
Komiu anu da natuvu,
nirapaka eva tampa nu apu nilelakasi dako ri mata nu apu ala ledo mapuna.
Naupa ivesia,
komiu ledo nadota nanjili mpanjili nangoseaka Yaku.e
Hee komiu toIsrael!
Haitumo sabana kana Kuhuku komiu.
Jadi pakasadia-dia mami mantarima pehuku anu Kudekei ka komiu.”
Ivesiamo tesa nTUPU.
13 TUPU,
Alatala anu nompajadi dunia bo isina,
haitumo sangaNa.
Iamo anu nompajadi bulu-bulu bo poiri,
Ia nombatesaki niaNa ka manusia.
Ia nompajadi bongina bo eona.
Bo Ia nomparenta njumangu dunia.