3
Nanguli vaimo i nabi Amos,
“Hee komiu toIsrael!
Epemo Tesa nTUPU anu nanggeni totuamiu nggaulu nesuvu dako ri Mesir!
Iveimo tesaNa:
2 ‘Aga komiu nipelisiKu bo niparantaiKuka
dako ri pura-pura todea ri dunia.
[Tapi nisapuakamiu bo ledo najea komiu.]
Nambaso mpuu dosamiu.
Jadi haitumo sabana komiu Kuhuku.’ ”
Nabi nompapola tesa nTUPU
3 Ane tona randua ledo mosijanji ntani ruru,
natantumo ira ledo mosinggani hau manjayo.
4 Ane singa rakayu dopa rakavana anu rakandena,
natantumo dopa mosuara mamangga.
Ane singa muda ri bolona dopa rasakana anu rakandena,
natantumo dopa mosuara masana.
5 Ane tolia dopa rataa,
natantumo dopa matesoo tonji.
Ane dopa maria anu raoruna,
natantumo dopa mateoru tolia.
6 Ane mangepe tabue posieva,
natantumo molete rara ntona riara ngata mbaso.
Ane sangu ngata manggava silaka,
natantumo TUPU nombahuku ngata haitu.
7 TUPU anu Nalanga Kakuasana ledo movia nuapa-nuapa
ane dopa rauliNa ntani ruru ka nabi tona anu nompapapola tesaNa.
8 Ane singa mompopaepe suarana,
natantumo pura-pura tona maeka.
Ane TUPU anu Nalanga Kakuasana motesa,
natantumo nabi kana mompapola tesaNa.
Kareba kagero tana Israel
9 TUPU nanguli ka i Amos,
“Ulimo ka toponturo ri banua kamagaua ri tana Mesir
bo ri ngata Asdoda ivei:
‘Kasiromumo komiu ri bulu-bulu napara ngata mbaso Samariab,
ri tana Israel.
Kanotomo kagado mbaso bo tona nipandasa riara ngata haitu.’ ”
10 Nanguli vai TUPU,
“Tona ri ngata Samaria ledo nisanira nokainggu nanoa.
Banua mbasora niisira ante mbara-mbara niagosira bo nialara nggasara.”
11 Haitumo sabana Tupu ALATALA nanguli:
“Ngatara rapatiku bo bentera ragerosi nu balira,
pura-pura isi nu banua kamagauara raalasi nu balira.”
12 Ivei vaimo tesa nTUPU:
“Topoevu nompasimbuku nompakasalama bimbana dako ra nganga nu singa,
tapi damo ronggada kadana bo sambite tava ntalingana namala nialana.
Ivesia muni majadi nte toponturo ri ngata Samaria.
Hitu-hitu da nasana ira naturu ri paturu nabelo,
tapi makava ngena tempona domo madea ira maboli.”
13 Tupu ALATALA,
Alatala anu nompajadi dunia bo isina nanguli,
“Hitupa parantaikamo bo popatoramo ka [toIsrael,]
muli i Yakubc.
14 Yaku mombahuku toIsrael sabana dosa nipoviara.
Ri eo pehuku haitu Kugerosi pura lanta-lanta pesombara ri ngata Beteld.
Lanta-lanta pesomba haitu Kukotosakasi vuntu-vuntunae
sampe manavu ri tana.
15 Kugerosi banua niponturo ri tempo ranindi
bo banua niponturo ri tempo nggapane.
Bo Kuombosakasi banua-banua anu nipakagaya
ante ramba-ramba nipovia dako ri ngisiasu gaja.”
Ivesiamo tesa nTUPU.