Pehuku ka tona ri ngata-ngata ntoMoab
2
Iveimo tesa nTUPU,
“Toponturo ri ngata-ngata ntoMoaba mpenggani-ngganimo novia dosa.
Sabana haitu kana Kuhuku ira bo domo Kuura pehukuKu.
Ira nompakaeya magau Edom anu namatemo,
apa nigerosira dayona bo nialasira buku-bukuna bo nipalabusira sampe najadi avu.
2 Sabana haitu,
kana Kuhuku ira.
Kupalabusi pakaupu ngata-ngata Moab bo bente-bente ngata mbaso Keriotb.
ToMoab mamate ri tatanga kagado nu posieva,
masinggeni ante nggati-nggati ntoposieva ri tempo tabue mposieva rapopomoni.
3 Kupatesi tona nakuasa ri Moab
bo tomaoge-tomaoge riara poparentana.”
Ivesiamo tesa nTUPU.
Pehuku ka tona ri kamagaua Yehuda
4 Iveimo tesa nTUPU,
“ToYehudac mpenggani-ngganimo novia dosa.
Sabana haitu kana Kuhuku ira bo domo Kuura pehukuKu.
Nipoarara atura-aturaKu bo ledo nituntunira pepangajariKu.
Ira nipakasalandala nu viata-viata anu nisomba ntotuara nggaulu.
5 Sabana haitu,
Kupalabusi pakaupu ngata-ngata Yehuda
bo bente-bente ngata mbaso Yerusalem.”
Pehuku ka tona ri ngata-ngata ntoIsrael
6 Iveimo tesa nTUPU,
“Komiu toIsrael,
mpenggani-ngganimo novia dosa.
Sabana haitu,
kana Kuhuku muni komiu bo domo Kuura pehukuKu.
Tona anu nanoa rarana nipobalumiu majadi batua,
apa ledo nipakulena nompopanjili peindana.
Ivesia muni nipoviamiu ka tona napakasi anu ledo nompakule mombasambei indana,
naupa indana haitu aga sakide eva ali sapasa solopu.
7 Tona ledo nompakule,
nipandasamiu,
bo tona napakasi ledo nipeilimiu.
Tona ntaliana nompogau saito batua mombine,
bo haitumo nompakaruto sangaKu nagasa.
8 Ri sinjori lanta-lanta pesomba,
komiu naturu ante pakea ntona napakasi anu nialamiu rapotagalaka indara haitu.
Ri banua nu Alatala nisombamiu,
komiu nanginu anggur
anu nialamiu dako nte tona noinda ante komiu.
9 NiropusiKumo toAmorid ka komiu,
naupa ira nalanga mpo kaiyou
bo naroso mpo kayu torosona ntotoe.
NipakaupuKumo vuana lako ri bavona
bo nipakaupuKumo kalena lako ri tambena.
10 Komiu nikeniKu nesuvu dako ri Mesir
bo nikeniakaKu nangose karava bai patapulu mpae kasaena
ala tana ntoAmori Kudekei ka komiu majadi ngatamiu mboto.
11 NipelisiKumo bara sakondua anamiu majadi nabi,
bo bara sakondua ngana kabilasamiu majadi toNazir.f
He,
toIsrael,
ledo nakana vesia?
12 ToNazir nojanjimo ledo manginu anggur ira.
Tapi komiu nompainu anggur ka ira.
Bo komiu nombatagi nabi-nabi mompapola petevai-petevaiKu.
13 Jadi hitupa komiu Kutamanaka ri tana,
sampe komiu mekakai eva gei nu kareta anu nantamo nangulaya gando.
14 Nau tona nagasi nangova ledo mamala malai;
tona naroso malipo karosona,
bo tona nalanggai ledo mamala mompakasalama karona mboto.
15 Tona natau nopana ledo matetida ri belana;
tona nagasi nangova ledo mamala malai,
bo topesavi jara ledo mamala mompakalasama karona.
16 Ri eo haitu tantara anu nabia ntoto
mangova malai nte kaboli-boli pareva mposievana.”
Ivesiamo tesa nTUPU.