Kum Maliak Gaadʋg malʋŋ
16
1 Tɛnri Abib nwadig la ka maal malʋŋ di'ema dinɛ an Kum Maliak Gaadʋg malʋŋʋ tisi ya Zugsɔb Wina'am la, bɔzugɔ Abib nwadig la ni ka o da yisi ya Egipt teŋin yʋ'ʋŋ na. 2 Gban'am naaf bɛɛ kɔnbʋgʋ maal Kum Maliak Gaadʋg malʋŋ la tisi fʋ Zugsɔb Wina'am, zin'ikanɛ ka Zugsɔb la na gaŋ ye o yʋ'ʋr bɛɛ anina la. 3 Da dii li nɛ bodobodo kanɛ ka ba maal nɛ dabinnɛ, amaa daba ayɔpɔi la wʋsa ɔmmi bodobodo kanɛ pʋ mɔr dabinnɛ. Li anɛ namisʋg diib bɔzugɔ, ya da gbirigi yi Egipt, din ka ya nyɔvʋr bɛllim wʋsa ya kʋ tam saŋa kanɛ ka ya da yi Egipt laa. 4 Da kɛ ka danbin bɛɛ ya teŋin la daba ayɔpɔi la wʋsaa. Maalim maan la dabiskanɛ an yiiga la zaam, ka da kɛ ka ni'im la kpɛlim nie bɛogɔ. 5 Da maali Kum Maliak Gaadʋg malʋŋ la tempʋʋd banɛ ka ya Zugsɔb Wina'am tisi ya la nii, 6 asɛɛ zin'ikanɛ ka o gaŋ ka o yʋ'ʋr bɛɛ anina la. Ani ka ya na maal Kum Maliak Gaadʋg malʋŋ la zaam, winnig ya'a ti kpɛn'ɛd, saŋkan nɔɔ ka ya da yi Egipt la. 7 Sɛn'ɛminɛ lii ɔnb zin'ikanɛ ka Zugsɔb onɛ aan ya Wina'am na gaŋ la. Ka bɛog ya'a nie yanam lɛn kuli ya sʋga la ni. 8 Daba ayuobʋ la pʋʋgin, ɔmmi bodobodo dinɛ ka' dabinnɛ, ka daba ayɔpɔi la daar yanam la'asim pʋ'ʋs Zugsɔb onɛ aan ya Wina'am la; da tʋmi ya tʋʋmaa.Bakuainam Malʋŋ yɛla
9 Dabisir kanɛ ka ya na nɔk kʋsiig bɛɛ gɔn'ɔgʋ pin'ili buni ya zʋʋd la, yanam kaalimi dabisa ayɔpɔi zin'isa ayɔpɔi, 10 ka ya yʋ'ʋn maal Bakuainam Malʋŋʋ tisi ya Zugsɔb Wina'am la, ka mɔri ya'amlɛog maan na tis o, ka li zemis nɛ albareka kanɛ ka Zugsɔb onɛ aan ya Wina'am tisi ya la. 11 Ka maali sumalisim Zugsɔb onɛ aan ya Wina'am la tuon, zin'ikanɛ ka o na gaŋ ye o yʋ'ʋr bɛ anina la, la'am nɛ ya dasam nɛ ya pu'ayuos, nɛ ya sankpan'as dap nɛ pu'ab, nɛ Levi dim banɛ bɛɛ ya tempʋʋdin la, saam nɛ kpiibis nɛ pʋkɔnya banɛ bɛ nɛ ya la wʋsa. 12 Tɛnri ye ya da anɛ yammis Egipt teŋin, gu'usimi ka dɔlis zi'elbama.
Sʋga Gbɛɛnb Malʋŋ
13 Ya ya'a ti bʋ' ya ki zieŋini naae, ka nwiaki ya tiis wala maal daam la naae, yanam on maalim Sʋga Gbɛɛnb Malʋŋ. 14 Maalimi sumalisim nɛ ya dasam nɛ ya pu'ayuos, ya sankpan'as dap nɛ pu'ab, nɛ Levi dim, nɛ saam nɛ kpiibis nɛ pʋkɔnya banɛ bɛɛ ya tempʋʋdin la. 15 Daba ayɔpɔi ka ya na nɔki maal nimmua malʋŋʋ tis Zugsɔb onɛ aan ya Wina'am, zin'ikanɛ ka o na gaŋ. Ala ka ya Zugsɔb Wina'am na niŋi ya bunib nɛ ya nu'ug tʋʋma bareka, ka ya sumalisim la na paae li bɛn.
16 Nɔɔr atan' yʋʋm pʋʋgin, ya dap la wʋsa na kɛn Zugsɔb onɛ aan ya Wina'am la tuon zin'ikanɛ ka o na gaŋ ka maal Di'ema Malʋŋ linɛ an; Bodobodo Dinɛ Ka' Danbin nɛ, nɛ Bakuainam Malʋŋ nɛ Sʋga Gbɛɛnb Malʋŋ. Sɔ' da kɛn Zugsɔb la tuon na nɛ nu'uzaalisɛ, 17 asɛɛ sɔ' wʋsa mɔr maan ka li zemis nɛ fʋ Zugsɔb Wina'am la tisif albareka si'em la.
Sariakatib yɛla
18 Gaŋimi sariakatib nɛ kpɛɛmnamɛ ya buudi dɔɔg wʋsa ni, nɛ tempʋʋgin wʋsa, dinɛ ka ya Zugsɔb Wina'am tisi ya la. Ka ba na kad nidib la saria ka li dɔl suor. 19 Da zan'asi sida la bɛɛ ya maal baregaŋa. Mid ka ya kɛ ka ba da' ya nɛ ligidi ka ya bas sida la, ka li kɛt nɛ ka ya'am sɔb lieb zu'om ka kɛt ka onɛ mɔr sida kɔ'ɔŋ bʋʋd. 20 Dɔl sida ma'aa, ka ala ka fʋ na vʋe ka sʋ'ʋg teŋ kanɛ ka ya Zugsɔb Wina'am tisi ya la.
Win sieba pʋ'ʋsʋg yɛla