Yiib 12

Kum Maliak Gaadʋg malʋŋ yɛla

1 Ka Zugsɔb yɛl Moses nɛ Aaron ban da nan bɛ Egipt teŋin la ye, 2 “Nwadkaŋa aan ya yʋʋm la pin'ilʋg nwadig. 3 Alazug, yɛlim Israel nidib la wʋsa ye nwadig la dabpiiga daar, dau wʋsa ye o kʋnɛ pɛraugʋ tis o yidim, yir wʋsa mɔr pɛ'og yinne. 4 Ka yir si'a ya'a pʋ zu'oe ka kʋ nyaŋi ɔnb pɛ'og yinne, on la'asim nɛ o kpi'a pʋdig. Alazug li nar ye fʋ baŋ nidib la zem si'em yin, ka baŋ nid yinne na ɔnb si'em. 5 Bʋnkɔnbʋg la sʋm ye o paae yʋʋm yinne ka an bʋndaug ka ka' dɛŋŋa, o tun'e an pɛ'og bɛɛ bʋʋg, 6 ka ya gɔsi ba sʋ'ʋŋa gur nwadig la dabpiiga nɛ anaasi daar. Ka winnig ya'a ti bɔɔd kpɛn'ɛb, Israel nidib wʋsa na kʋ bʋnkɔnbid la. 7 Ka ba na nɔk kɔnbʋg la ziim la buoɛn gilig dɔɔg za'anɔɔrin, zin'ikanɛ ka ba ɔnb ni'im la. 8 Daakan la yʋ'ʋŋ ka ya ye ya sɛn' ni'im la ɔnb nɛ vantɔɔd, nɛ bodobodo kanɛ ka danbin pʋ gɛndigɛ. 9 Da ɔnbi ni'im la kansa, bɛɛ ya dʋg nɛ ku'om, amaa sɛn'ɛmi bugumin, la'am nɛ zug nɛ nɔba nɛ dinɛ kpɛlim la wʋsa. 10 Da kɛ ka ni'im kpɛlim nie bɛogɔ, ka li ya'a nie bɛog, asɛɛ ya nɔk linɛ kpɛlim la wʋsa niŋ bugumin ka li kanb. 11 Yanamɛ na ɔnbi li si'em nwa, ya na lɔɔ ya siaa nɛ sɛnbidis, ka pid ta'ada, ka ya dansaya na bɛɛ ya nu'usin, ka ya na ɔnbid tɔ'ɔtɔ bɔzugɔ, li anɛ Kum Maliak Gaadʋg malʋŋ.

12 “Ka yʋ'ʋŋ kan la m na gaad Egipt teŋ la pʋʋgin, ka na kʋ bikpɛɛm wʋsa, nidib nɛ bʋnkɔnbid wʋsa sʋʋgin, ka na kʋʋs Egipt bada la wʋsa bɛ'ɛd. Mam an Zugsɔb la. 13 Ka ziim la na an zanbinnɛ ya yaan la, ka m ya'a san'amid Egipt teŋ la, ka nyɛ ziim la m na gaad ka bas yikan la ka san'auŋ kʋ kɛn yin la naa.

14 “Ka ya na tiɛnd dabiskaŋa yɛla, yanam nɛ ya biis banɛ na ti kena, ka li na an di'ema malʋŋ ka ya na maannɛ tisid Zugsɔb la. Ya na tiɛnd malʋŋ kaŋa saŋa wʋsa. 15 Ya na ɔnbid bodobodo kanɛ ka' dabinnɛ paae daba ayɔpɔi. Yisimi danbin nɛ ya yaan, malʋŋ pin'ilʋg la daar. Onɛ di danbinni li pin'ilʋg daar la m paae daba ayɔpɔi la kʋ lɛn an Israel nida. 16 Dabisir kanɛ an yiiga la, ya na la'as taaba ka li an man Zugsɔb la la'asʋg. Da tʋmmi tʋʋma dabisbama pʋʋginɛ, ya'a ka' yanamɛ na maal diib ma'aanɛ. Din ma'aa ka ya na tʋm. 17 Maalimi bodobodo linɛ ka' danbin di'ema, bɔzugɔ li anɛ daakan ka m baki ya nɛ Egipt dim. Maalimi ala saŋa wʋsa, yanam nɛ ya biis banɛ na ti duoe na. 18 Yiiga nwadig la, lin yi dabpii nɛ anaasi zaam ti paae dabpisi nɛ yinne zaam, ya na ɔnb bodobodo kanɛ ka' dabinnɛ. 19 Ka daba ayɔpɔi la wʋsa da kɛ ka danbin bɛɛ ya yaanɛ, ka onɛ di si'el ka li mɔr danbin lɛn ka' Israel nida, baa o ya'a anɛ ya sankpan'as bɛɛ teŋin biiga. 20 Ya ya'a bɛ zin'isi'a wʋsa li pʋ sʋm ye ya di dikanɛ mɔr dabinnɛ. Dimi bodobodo kanɛ ka' dabinnɛ.”

21 Ka Moses buol Israel kpɛɛmnam la ka yɛl ye, “Kemi nannanna gaŋi Kum Maliak Gaadʋg malʋŋ kɔnbid la maali tis sɔ' wʋsa nɛ o yidim. 22 Ka ya na nɔk nyulinnyu'usi tʋm ziim la bɛ laan la buoɛn li giligi ya dɔɔd za'anɔya. Mid ka sɔ' naan o zakin yi yiŋ hali nɛ bɛogʋ na ti nie. 23 Ka Zugsɔb ya'a ti gat ye o kʋ Egipt dim la, o na nyɛ ziim la buoɛn la ka bas ka gaad ka kʋ kpɛn' yikan na kʋʋ. 24 Siakimi ka li na bɛ saŋa wʋsa tis yanam nɛ ya yaas. 25 Ya ya'a ti kpɛn' teŋ kanɛ ka Zugsɔb da kaanb ye o na tisi ya la, yanam on tiɛnm malʋŋ kaŋa, 26 ka ya biis ya'a bu'osi ya ye, ‘Ka malʋŋ kaŋa an bɔɔ tisi ya?’ 27 Yanam yɛlimi ba ye, ‘Li anɛ Kum Maliak Gaadʋg malʋŋʋ tis Zugsɔb, on da gaŋ Israel dim yaa bas ka keŋ Egipt dim ya pʋʋginɛ kʋʋ ba bikpɛɛmnam la.’ ” Ka nidib la igin ka wɔ'ɔg Zugsɔb la. 28 Ka Israel dim la keŋ maal ala; ba da maal wʋʋ Zugsɔbi yɛl Moses nɛ Aaron si'em la.

29 Ka yʋ'ʋŋ tisʋʋs ka Zugsɔb kʋ Egipt bikpɛɛmnam wʋsa. Lin yi Na'ab Faaro onɛ zin' na'am gbauŋ zug la bikpɛɛm hali paae onɛ bɛ sanrega ni bikpɛɛm, keŋ paae ba niigi bikpɛɛmnam wʋsa. 30 Ka Na'ab Faaro duoe, ka o kpɛɛmnam la mɛ duoe, ka Egipt dim wʋsa duoe yʋ'ʋŋ tisʋʋs la, ka li anɛ kukuma; bɔzugɔ yir da kae ka kum pʋ kʋʋ. 31 Yʋ'ʋŋ kan la ka Na'ab Faaro buol Moses nɛ Aaron ka ye, “Yimi ka basini m nidib, yanam nɛ Israel dim la wʋsa! Yim keŋ pʋ'ʋsinɛ ya Zugsɔb la wʋʋ yanamɛ sɔs si'em la. 32 Mɔri ya bʋnkɔnbid wʋsa yii keŋ; ka mɛ niŋ mam bareka.”

33 Ka Egipt dim la ye ba niŋim tɔ'ɔtɔ ka yi, ka ya'a ka' ala ba na kpii naae. 34 Ka nidib la nɔki ba bodobodo zɔm kanɛ ka danbin nam pʋ gɛndig la niŋ laasin. Ba da nɔk laas la lɔ nɛ fuudi buki keŋ. 35 Ka Israel dim la tʋm wʋʋ Moses n yɛli ba si'em la, ka yɛl Egipt dim la ye ba tisimi ba anzurifa, nɛ sanlima nɛ fuud. 36 Ka Zugsɔb kɛ ka Egipt dim la gɔsi ba sʋ'ʋŋa, ka tisi ba ban sɔs si'el la; ala ka ba da fan' Egipt dim la.

37 Ka Israel dim la yi Rameses keŋ Sukot. Ba da anɛ dap tusa kɔbisyuobʋ (600,000), ka pu'ab nɛ biis pʋ paasɛ. 38 Nidib bɛdegʋ da dɔlli ba yi, nɛ ba niigi nɛ bʋnkɔnbid la. 39 Ka ba nɔk bodobodo zɔm linɛ ka ba mɔri yi Egipt na la sɛn' maal bodobodo linɛ kae danbin nɛ, bɔzugɔ ba da kadi ba yis Egipt tɔ'ɔtɔ, ka saŋa kae ka ba na maal diibɔ.

40 Israel dim la da zin'in Egipt teŋin la yʋma kɔbisnaasi nɛ pistan' (430). 41 Ka yʋma kɔbisnaasi nɛ pistan' la daar ka Zugsɔb nidib la duoe dɔl taaba dɔɔg-dɔɔg n yi Egipt daakan la. 42 Yʋ'ʋŋ kan la Zugsɔb da gur Israel dim la mɔri ba yi Egipt teŋin. Alazug ban nɛ ba yaas nɔkid yʋ'ʋŋ kaŋa maan girima tisid Zugsɔb la.

Kum Maliak Gaadʋg malʋŋ la tiɛnr yɛla

43 Ka Zugsɔb yɛl Moses nɛ Aaron ye, “Malʋŋ la kisa nwa: Teŋ zʋŋ nid pʋ ditta. 44 Yammʋg ya'a pʋ kpɛn' baŋʋ o pʋ ditta. 45 Nid ya'a kena ye o bɛ dabisa bi'ela, bɛɛ fʋ nɔk sɔ' ye o tʋm si'eli tisif, o pʋ ditta. 46 Malʋŋ la pʋ dit samannin nɛ, ni'im la mɛ pʋ yit yiŋa. Da kɔ'ɔgi kɔnbir baa yinne. 47 Di anɛ tilas ye Israel nidib wʋsa maal di'ema malʋŋ la. 48 Ka saan kanɛ bɛ nɛ ya ka bɔɔd ye o maal Kum Maliak Gaadʋg malʋŋ la, on kpɛn'ɛsim dap banɛ bɛɛ o yin la wʋsa baŋʋ ka li nwɛnɛ ba du'a ba nɛ teŋin la. Amaa onɛ pʋ kpɛn' baŋʋ pʋ ditta. 49 Kisʋg la anɛ ala tis teŋin biis nɛ saam.” 50 Ka Israel dim la sid da maal nwɛnɛ Zugsɔb la yɛl Moses nɛ Aaron si'em la. 51 Ka daakan la ka Zugsɔb mɔr Israel dim la ka ba dɔl taaba dɔɔg, dɔɔgʋ yi Egipt teŋin na.