17
1 Da nɔk naaf bɛɛ pɛ'og kanɛ mɔr dɛŋi maal maannɛ tisi ya Zugsɔb Wina'am. Ka lin la anɛ kisʋgʋ tis o. 2 Dau bɛɛ pu'a ya'a bɛ nɛ ya tɛɛns banɛ ka Zugsɔb onɛ aan ya Wina'am tisi ya la ka ya nyɛɛ o ka o tʋm bɛ'ɛd Zugsɔb la tuonnɛ san'amidi o nɔnaar la, 3 ka pʋ'ʋsid winsieba, iginidi ba tuon bɛɛ pʋ'ʋsid winnig bɛɛ nwadig bɛɛ nwadbibis banɛ bɛ saŋgbauŋin la, ka li pʋ dɔl nɛ m nɔzi'ela, 4 ka ya baŋ, yanam vɛɛnsimi li yɛla sʋ'ʋŋa. Ka li ya'a an sida ye yɛlkisʋg kaŋa maal Israel teŋin, 5 yanam mɔr dau bɛɛ pu'a kanɛ tʋm tʋʋmbɛ'ɛd kaŋa la keŋi ya tempʋʋg la za'anɔɔrini lɔb o sɔb nɛ kuga kʋ. 6 Nidib ayi' bɛɛ atan' ya'a di kasɛt, ban kʋʋm o sɔb, amaa nid yinne ma'aa ya'a di kasɛt li pʋ nar ye ba kʋʋ o sɔba. 7 Banɛ di kasɛt la, banɛ na dɛŋi kpɛn'ɛsi ba nu'ugʋ o kʋʋb yɛla. Ka banɛ kpɛlim la nyaan kpɛn'ɛsi ba nu'us. Asɛɛ ya yis bɛ'ɛd kanɛ bɛɛ ya sʋʋgin la.Kɔɔtʋ ni antu'a
8 Ba ya'a ti mɔr antu'a kɛɛn ya kɔɔtʋnamin na ka li sariakadib tɔi, nwɛnɛ sɔ' ya'a kʋ bɛɛ pu'alim sɔ' ka li anɛ pɔn'ɔsim bɛɛ o gɛsignɛ, bɛɛ zi'elsieba bakir yɛla, yanam mɔr antu'a la keŋ zin'ikanɛ ka Zugsɔb onɛ aan ya Wina'am na gaŋ la. 9 Kemi maanmaannib banɛ an Levi dim la san'an, nɛ sariakat onɛ bɛ tʋʋma ni saŋa kan la, bu'osi ba ka ba pa'ali ya yanamɛ na gban'e li yɛla si'em. 10 Asɛɛ ka ya tʋm wʋʋ ban gban'e si'em tisi ya zin'ikanɛ ka Zugsɔb la gaŋ la. Gu'usimi ka tʋm wʋʋ ban pa'ali ya si'em la. 11 Tʋmmi wʋʋ ban pa'ali ya wada la si'em la, nɛ gban'abanɛ ka ba tisi ya la. Da fɛndigi datiuŋ bɛɛ dagɔbʋg ka bas ban yɛli ya si'em la. 12 Niŋ kanɛ wʋsa ziem sariakat la, bɛɛ maanmaan kanɛ bɛɛ ani tʋmmi tisid Zugsɔb onɛ aan ya Wina'am la, asɛɛ ka ba kʋʋ o ka li yis bɛ'ɛd kanɛ bɛ Israel teŋin la. 13 Nidib la wʋsa na wʋm ka zɔ dabiem ka kʋ lɛm mɔr ziemis tʋʋmaa.
Na'am yɛla
14 Ya ya'a ti kpɛn' teŋ kanɛ ka Zugsɔb onɛ aan ya Wina'am ye o tisi ya ka ya sʋ'oe ka zin'inɛ anina la, ka tɛn'ɛs ye “Kɛlli ka ti diis na'ab ka o sʋ'oe ti wʋʋ buudbanɛ giligi ti la mɔr si'em la,” 15 yanam on gɔsim sʋ'ʋŋa ka gaŋ na'ab onɛ ka Zugsɔb onɛ aan ya Wina'am gaŋ la. Asɛɛ ka o aan ya ba'abiis la yinne, da diisi saan onɛ ka' Israel nid ka o sʋ'oe ya. 16 Na'ab la mɛ da bɔɔd ye o mɛŋ mɔr widi bɛdegʋ bɛɛ o kɛ ka nidib la lɛb Egipt n da' widi na tis o. Zugsɔb la pʋn yɛli ya ye, “Da lɛn lɛbi suokan la ni ya'asɛ.” 17 O da di pu'ab bɛdegʋ ka ba fɛndig o ya'am; ka mɛ da la'as anzurifa nɛ sanlima bɛdegʋʋ. 18 O ya'a ti zin'inɛ o na'am gbauŋ la zug, asɛɛ ka o sɔb wada gbauŋ kaŋa tis o mɛŋ, dinɛ ka Levi dim maanmaannib mɔr la. 19 Asɛɛ ka li bɛɛ o san'an, ka o na karim daar wʋsa o nyɔvʋr bɛllimin. Ala ka o na zamis ka na'as o Zugsɔb Wina'am ka dɔlis wada kaŋa yɛt si'em la nɛ gban'abama wʋsa. 20 O da gɔsi nyɛ ka on sɔn'oe o ba'abiis ka fɛndig wada la datiuŋ bɛɛ dagɔbʋga. Din ka on nɛ o yaas na di na'am la yuug Israel teŋin.