Maanmaannib pʋʋr
18
1 Maanmaannib banɛ an Levi dim la, sida Levi dɔɔg la wʋsa kʋ mɔr pʋʋr bɛɛ faar nɛ Israel dim la. Ba diib na anɛ maan linɛ ka nidib la maali tis Zugsɔb la bugumin la, linɛ na aan ba faar. 2 Ba kʋ mɔr pʋʋri ba ba'abiis la sʋʋginɛ. Zugsɔb la aan ba faar, wʋʋ on pɔɔ zi'el si'em la. 3 Nɛ'ɛŋa an maanmaannib la pʋʋri yit nimbanɛ nɔk na'araad nɛ pɛ'ɛsi maal maan; li na anɛ biaunk nɛ yier nɛ pʋʋgin la'ad. 4 Asɛɛ ka ya tisi ba zʋʋd linɛ ka ya bʋn yiiga la nɛ daam nɛ kpaam, nɛ ya pɛ'ɛs kɔnbid linɛ ka ya kies yiiga la. 5 Ya Zugsɔb Wina'am la gaŋnɛ ban nɛ ba yaasi yii ya dɔɔd la wʋsa sʋʋgin ye ba zi'eni tʋm Zugsɔb la yʋ'ʋr zug saŋa wʋsa. 6 Levi nid ya'a yii ya tempʋʋg yinne linɛ bɛ Israel teŋ siaa wʋsa, ka kpɛ'ɛŋi keŋ Zugsɔb la na gaŋ zin'isi'a la ni, o sʋnf bɔɔdim zug, 7 o na nyaŋi tʋm Zugsɔb Wina'am yʋ'ʋr zug nwɛnɛ o Levi dim taaba tʋm Zugsɔb la tuon si'em la. 8 On nɛ ban na pʋdigi ba pʋʋr la azinzema, la'am nɛ on di'e ligidi yi la'abanɛ ka o yidim kuos la.Yɛlkisa yɛla
9 Ya ya'a ti kpɛn' teŋ kanɛ ka ya Zugsɔb Wina'am ye o tisi ya la, da zamisidi ka tu'asid banɛ an yɛlkisa ka buudbanɛ bɛɛ anina la dɔlisid la. 10 Da kɛ ka sɔ' bɛɛ ya sʋʋgin nɔk o biribiŋ bɛɛ o bipuŋi maal maan bugumin, ka an onɛ an ba'akɔlʋg sɔb bɛɛ tiim sɔb ka an sɔnpʋt, 11 bɛɛ o maan si'elnam dinɛ buon ka sɔnsid nɛ kikiris nɛ kpi'imnam. 12 Onɛ wʋsa tʋm nɛ'ɛnam li anɛ yɛlkisa tis Zugsɔb la, bɔzugɔ li anɛ yɛlkisa bama zug ka Zugsɔb onɛ aan ya Wina'am la kad buudbama yisi ya tuon la. 13 Da mɔri gba'ari ya Zugsɔb Wina'am la tuonnɛ. 14 Tɛɛns banɛ ka ya ye ya sʋ'ʋg la kɛlisid nɛ ba'akɔn dim bɛɛ sɔnpʋttib. Amaa ya'a kpɛlim nɛ yanam, ya Zugsɔb Wina'am la pʋ tisi ya suor ye ya niŋi ala. 15 Zugsɔb onɛ aan ya Wina'am la na gaŋ nɔdi'esi ya ba'abiis la sʋʋgin na ka o nwɛnɛ mam nɛ. Asɛɛ ka ya kɛlis bʋn linɛ wʋsa ka o na tu'asi ya. 16 Yanamɛ da la'as Horeb zuorin la, ya da yɛli ya Zugsɔb Wina'am ye, “Da kɛ ka ti lɛn wʋm Zugsɔb Wina'am la bɛɛ ti lɛn nyɛ bugum kaŋa ya'asɛ ka ti na kpi.” 17 Ka Zugsɔb la yɛlim ye, “Ban yɛl si'el la an sʋ'ʋŋa. 18 M na yis nɔdi'esi ba ba'abiis la sʋʋgin na ka o nwɛnɛ fʋn nɛ. M na nɔki m nɔɔr yɛlʋgʋ niŋ o nɔɔrin, ka o na pian'adi tisidi ba mam na yɛl o si'el wʋsa. 19 Onɛ wʋsa pʋ kɛlisi m pian'ad banɛ ka nɔdi'es la na pian' mam yʋ'ʋrin la, mam mɛŋ na buol o ka o tu'asi li gbin. 20 Amaa nɔdi'es kanɛ zi'enɛ tɛn'ɛs o mɛŋi pian' mam yʋ'ʋr zug ka m pʋ tis o nɔɔrɛ, bɛɛ nɔdi'es kanɛ pian'ad winsieba yɛla, asɛɛ ka ba kʋʋ o.” 21 Daasi'erɛɛ ya na bu'os ye, “Ti na niŋ wala baŋ ye li ka' Zugsɔb la pian' tisi ti?” 22 Ka nɔdi'es ya'a yɛl si'el Zugsɔb yɛla ka li pʋ niŋi amɛŋa, lin anɛ labaar kanɛ ka Zugsɔb la pʋ pian', ka nɔdi'es la tɛn'ɛs nɛ o mɛŋi pian'. Da zɔti nɛ o dabiem.