Suak tempʋʋd
19
1 Zugsɔb onɛ aan ya Wina'am la ya'a ti san'am buudbanɛ bɛɛ ya tuon la ka tisi ya ba teŋ la, ka ya di'e ba tempʋʋd nɛ ba ya' la, 2 yanam gaŋ tempʋʋd atan' banɛ bɛ teŋsʋk, teŋ kanɛ ka ya Zugsɔb Wina'am ye o tisi ya ka ya sʋ'oe la ni. 3 Maalimi suoya keŋ tɛɛnsin la, ka pʋdig teŋ kanɛ ka ya Zugsɔb Wina'am ye o tisi ya la zin'isa atan', ala ka onɛ kʋ nid ka li ka' pɔn'ɔsimm na zɔɔ keŋ ani su'a. 4 Zi'elkaŋa anɛ sɔ' na kʋ o tiraan bɛɛ o kpi'a na zɔɔ keŋ ani faaɛn o nyɔvʋr, on pʋ gban'e pʋtɛn'ɛbɛ'ɛdi o sʋʋnrin ka kʋ o pɔn'ɔsim la zug. 5 Ya'a nwɛnɛ nid nɛ o kpi'a na keŋ mɔɔgin ye ba nwaae daad, ka on ʋk zɛnnir ye o nwaae daug la ka zɛnnir la fʋki ianki nwɛ' o tiraan la kʋ, o na nyaŋi zɔɔ keŋ tembama yinne ni faaɛn o nyɔvʋr. 6 Amaa teŋ la ya'a lal, onɛ nar ye o yɔ sam la sʋnf ya'a duoe, o na kadi paae o ka kʋʋ o, la'am nɛ lin pʋ nar ye ba kʋʋ o la bɔzugɔ, o pʋ dɛŋi gban'e pʋtɛn'ɛbɛ'ɛdi o sʋʋnrin ye o kʋʋ o kpi'a la. 7 Dinzug ka m tis nɔɔr ye ya gaŋ tempʋʋd atan' la. 8 Ka ya Zugsɔb Wina'am la ya'a ti yaligi ya sʋ'ʋlim la tisi ya, nwɛnɛ on da zi'el nɔɔrɛ tisi ya yaanam si'em la, ka tisi ya teŋ la wʋsa wʋʋ on da zi'el si'em la, 9 bɔzugɔ ya dɔlis wada kanɛ ka m tisi ya zina la, ka nɔŋi ya Zugsɔb Wina'am la, ka dɔl o suoya la saŋa wʋsa, ani ka ya na bɔ tempʋʋd atan' paas. 10 Tʋmmini ala ka ba da ti kʋ sɔ' zaalim ka o pʋ maal bugusim teŋ kanɛ ka ya Zugsɔb Wina'am ye o tisi ya ka li an ya faar la. Ala ka ya kʋ, kʋ sɔ' ka paam taalɛ. 11 Amaa sɔ' ya'a kis o kpi'a ka su'a gu' nwɛ' o kʋ, ka zɔɔ keŋ tempʋbama ni, 12 o teŋ la kpɛɛmnam na tʋm tempʋʋgin la ka ba mɔr o na, ka ba nɔk o tis onɛ ye o yɔ sam la ka o kʋʋ o. 13 Da zɔɔ nɛ o nimbaanliga. Asɛɛ ka ya yis bɛ'ɛd linɛ an ninkʋʋr Israel teŋin, ala ka si'el wʋsa na an sʋ'ʋŋa tisi ya.14 Da tɔlisi fʋ kpi'a titɔndig kugir linɛ ka ba da digil kʋdimin sa, ka fʋ di faar teŋ kanɛ ka ya Zugsɔb Wina'am tisi ya ye ya sʋ'oe la.
Kasɛt diib yɛla
15 Nid yinne ma'aa ya'a di kasɛt ye sɔ' tʋm tʋʋmbɛ'ɛd buudi wʋsa, li pʋ siakɛ. Amaa asɛɛ ka kasɛtib paae nidiba ayi' bɛɛ atan' ka pian'ad la nyaan zi'en. 16 Nid ya'a maal kisidim duoe zi'enɛ ma' ziri ye sɔ' tʋm bɛ'ɛd, 17 nidiba ayi' banɛ nu'ugʋ bɛ pian'ad la pʋʋgin la na kena zi'en Zugsɔb la nɛ maanmaannib nɛ sariakatib banɛ bɛ tʋʋma ni saŋkan la tuon. 18 Asɛɛ maanmaannib la vɛɛns sʋ'ʋŋa, ka li ya'a ti nie pa'al ye nid la anɛ ziri sɔb, ka di ziri kasɛti tis o ba'abiig, 19 yanam niŋim o wʋʋ on gban'an ye o niŋ o ba'abiig si'em la. Asɛɛ ka ya yis bɛ'ɛd kanɛ bɛɛ ya sʋʋgin la. 20 Nidib banɛ kpɛlim la na wʋmi li yɛla ka zɔ dabiem, ka tʋʋmbɛ'ɛd kan la buudi kʋ lɛn tʋm ya sʋʋgin ya'asɛ. 21 Da zɔ nimbaanliga, nyɔvʋr yɔɔdi nyɔvʋr sam, ka nif yɔɔd nif sam, ka nyin yɔɔd nyin sam, ka nu'ug yɔɔd nu'ug sam, ka nɔbir yɔɔd nɔbir sam.