Ban tis Levi dɔɔg la tempʋsieba yɛla
35
1 Zugsɔb la da pian' tis Moses Moab zin'ikanɛ an sassi ka bɛ Joodan lɔm lɛbisid Jeriko tempʋʋg la baba, yɛl o ye, 2 “Yɛlim Israel dim la ye ba yisim teŋ kanɛ aan ba faar la tempʋsieba tis Levi dɔɔg la dim ka ba zin'in ani. Ka tisi ba sian'anr linɛ ka ba na kemmi ba bʋnkɔnbid. 3 Lin na kɛ ka ba mɔr tɛɛns la zin' ka mɛ mɔr sian'anr linɛ gilig tɛɛns la ka ba niigi nɛ bʋnkɔnbid banɛ bɛ wʋsa na ɔnbid ani. 4 Sian'ar linɛ ka ya ye ya tis Levi dim la teŋ la baba la sʋ'ʋm ye li zu'oe ka lal nɛ teŋ la zaŋguom la bi'ela wʋʋ nɔbir makir tusir nɛ kɔbisnu (1,500). 5 Teŋ la yiŋ la makimi wʋʋ nɔbir makir tusa atan', lɛbis ya-nya'aŋ nɛ ya-tuona nɛ dagɔbʋg nɛ datiuŋʋ gilig, ka tempʋʋg la bɛ teŋsʋk. Ba na nɔk zin'ibama ka li aan ba kɔnbid kem zin'ig. 6 Tembanɛ ka ya tis Levi dim la ni, tɛɛns ayuobʋ na lieb suak zin'is, ka sɔ' ya'a kʋ o tiraan on zɔɔ keŋ ani. Ka pɛ'ɛsi ba tɛɛns pisnaasi nɛ ayi' la'am pɛ'ɛs nɛ ba kɔnbid kem zin'is la. 7 Yanamɛ na tis Levi dim la teŋ sieba la na la'as pisnaasi nɛ anii la'am nɛ ba kɔnbid kem zin'ig la. 8 Tembanɛ ka ya ye ya tis Levi dɔɔg la yit Israel dim faar la ni la anɛ dɔɔg wʋsa na tis lin nar si'em. Nɔkimi bɛdegʋ yi banɛ mɔr bɛdegʋ ni, amaa ka lɛɛ nɔk bi'ela yi banɛ mɔr bi'ela la ni.”Tembanɛ an suak zin'is la yɛla
9 Ka Zugsɔb la da lɛn yɛl Moses ye, 10 “Yɛlim Israel dim la ye ba ya'a lɔ'ɔŋ Joodan n kpɛn' Keenan teŋin la 11 ban gaŋ teŋ sieba ka li lieb suak zin'is, ka sɔ' ya'a kʋʋ o tiraan ka li ka' ye o maal nɛ pɔn'ɔsim on zɔɔ keŋ ani. 12 Ani ka o na su'a ka ba kʋ kʋʋ o yɔ sam ka sariakatib la nam pʋ kad o saria. 13 Tembama ayuobʋ la na lɛbigi ya suak zin'is. 14 Gaŋimi tɛɛns atan' Joodan kɔldaug ya-nya'aŋ baba la ka mɛ gaŋ atan' Keenan teŋin ka li na an suak zin'is.”
15 Tembama ayuobʋ la na an suak zin'igi tis Israel dim nɛ saam nɛ nimbanɛ wʋsa bɛɛ ba san'an, ka sɔ' ya'a kʋʋ o tiraan ka li ka' pɔn'ɔsim na tun'e zɔɔ keŋ su'a ani. 16 Amaa dau ya'a nɔk kʋnt laukʋ nwɛ' o tiraan ka o kpi, o anɛ ninkʋʋd, ka li sʋm ka ba kʋʋ o mɛn; 17 bɛɛ sɔ' ya'a mɔr kugir o nu'ugin linɛ na nyaŋi kʋ nid, ka nɔki nwɛ' nid ka o kpi, o mɛ anɛ ninkʋʋd, on sɔb li sʋm ye ba kʋʋ o mɛn; 18 bɛɛ sɔ' ya'a zanl daug bʋn linɛ na nyaŋi kʋ nid, ka nɔki nwɛ' sɔ' ka o kpi, o mɛ anɛ ninkʋʋd, on sɔb li sʋm ye ba kʋʋ o mɛn. 19 Li nar ye onɛ kpi la nid tan-tan na kʋʋ o yɔ sam la, o ya'a sia'al onɛ kʋʋ o nid la. 20 Sɔ' ya'a kisi o tiraan ka tɛbig o bas, bɛɛ lɔb o nɛ si'el pɔn'ɔsim-pɔn'ɔsim ka o kpi, 21 bɛɛ o sʋnfʋ duoe ka o kunbil o nu'ugʋ nwɛ' o ka o kpi, o mɛ anɛ ninkʋʋd, on sɔb li sʋm ye ba kʋʋ o mɛn; onɛ kpi la nid tan-tan ya'a sia'al o, li anɛ ye o kʋʋ o.
22 Amaa li ya'a ka' ye o sʋnfʋ duoe ka o nwɛ' o, bɛɛ o lɔb o nɛ si'el ka li ka' nɛ bugusim, 23 bɛɛ o ya'a pʋ nyɛɛ o ka bas kugir linɛ na nyaŋi kʋʋ o, ka o kpi, on ka' o dataa bɛɛ pʋ gban'e ye o pu'alim o la zug, 24 banɛ kat saria la na pian' li yɛla onɛ kpi la nid tan-tan la nɛ onɛ kʋʋ o la san'an dɔl wʋʋ zi'elbama yɛl si'em la: 25 Banɛ la'as ye ba kad saria la na gur onɛ kʋ la sʋ'ʋŋa ka zii o lɛb suak teŋin, on daa zɔɔ keŋ si'el la. O na bɛɛ ani hali ka maanmaan onɛ ka ba bu'oe malʋŋ kpaam linɛ an kasi niŋ o zugin la ti kpi. 26 Amaa onɛ kʋʋ o la ya'a naam on su'a teŋ si'a la ni gɔɔn tuugi yi teŋin la 27 ka onɛ kpi la nid tan-tan nyɛɛ o teŋ la yiŋ, o tun'e kʋʋ o ka li ka' taalɛ. 28 Asɛɛ ninkʋʋd la bɛ suak zin'ig la, hali ka maanmaan kpɛɛm la ti kpi: li anɛ maanmaan kpɛɛm la ya'a ti kpi ka o nyaan lɛbi o mɛŋ yin. 29 Yɛlbama na bɛ tis yanam nɛ zʋmaana banɛ na dɔlli ya nya'aŋ na, yanamɛ bɛ zin'isi'a wʋsa.
30 Sɔ' ya'a kʋʋ o tiraan ka kasɛtib bɛ, li sʋm ye ba kʋʋ o mɛn. Amaa kasɛta dim la ya'a pʋ paae babayi' yanam mid ka ya kʋʋ o sɔba.
31 Da di'e yɔɔd onɛ kʋ nid ka li nar yɛ o kpi san'an ka bas oo. Bɔzugɔ li anɛ tilas ye o kpi.
32 Da di'e yɔɔd onɛ zɔɔ keŋ suak zin'igin ka tis o suor ye o lɛbi kuli o yin, ka maanmaan la nam pʋ kpii.