Zelofehad bipumis la faar
36
1 Gilead onɛ da an Makir biig ka an Manase yaaŋ, ka Manase an Josef biig la dɔɔg kpɛɛmnam da kɛn Moses nɛ Israel kpɛɛm sieba san'an na. 2 Ba da yɛl ye, “Zugsɔb la da tisif nɔɔr ye fʋ maalim bʋgʋlʋm-bʋgʋlʋm pʋdig teŋ la tis Israel dim la, ka yɛlif ye fʋ nɔkimi ti ba'abiig Zelofehad faar la tis o bipumis la. 3 Ka gɔsima, li ya'a nwɛnɛ ba yinɛ kul dɔɔd sieba dap, ba na nɔk faar la tinam dɔɔgin la keŋ lɔ'ɔŋ dɔɔd banɛ ka ba kul la ni. Ka li pa'al ye tinam faar la sieba linɛ ka ba pʋdigi tisi ti la na gaad. 4 Israel dim yʋʋm pisnu malʋŋ di'ema saŋa ka si'el wʋsa lɛbidi li zin'igin la ya'a paae, ba faar la na keŋ paas nimbanɛ ka ba kul la san'an, ka ba nɔki ba mɔrim la yii ti yaanam faarin la.”5 Ka nwɛnɛ Zugsɔb la da yɛl si'em la, Moses da tis Israel dim la nɔkaŋa: “Josef yaas la yɛt si'el la anɛ sida. 6 Zugsɔb la tis nɔsi'a zaŋi ken Zelofehad bipumis la nwa: ‘Ba tun'e kul ban bɔɔd sɔ' wʋsa, o sɔb ya'a aan ba saam dɔɔg la nid. 7 Israel faar si'a kʋ naam dɔsi'a keŋ dɔsi'a, bɔzugɔ Israel nid wʋsa na mɔr faar kanɛ ka o di'e yii o yaanamin la. 8 Bipuŋ kanɛ wʋsa di'e paalʋ faar Israel dɔsi'a wʋsa ni, asɛɛ ka o kul sɔ' o saam dɔɔgin la, linɛ na kɛ ka Israel nid wʋsa paami o yaanam faari di. 9 Faar si'a kʋ naam dɔɔg si'a lɔ'ɔŋ dɔɔg si'aa, bɔzugɔ Israel dɔɔg wʋsa anɛ ye ba kpɛm mɔr ban di'e faar si'a la.’ ”
10 Alazug Zelofehad biis la da niŋ wʋʋ Zugsɔb la tis Moses nɔɔr si'em la. 11 Zelofehad biis la yʋda da anɛ Mahla nɛ Tiza nɛ Hogila nɛ Milika nɛ Noa; ka ba da kul nɛ ba saam ba'abiis la biribis. 12 Ala ka ba da kul sidib Manase onɛ an Josef biig la dɔɔgin, ka ba mɔrim la kpɛlimi ba saam dɔɔg la ni.
13 Zi'elbama nɛ nɔbama ka Zugsɔb la da yɛl Moses ye o tis Israel dim la Moab zin'ikanɛ an sassi ka bɛ Joodan lɔm lɛbisid Jeriko tempʋʋg baba la.