Keenan titɔndis la yɛla
34
1 Zugsɔb la da yɛl Moses ye 2 o yɛlim Israel dim la ye, “Ya ya'a kpɛn' Keenan, teŋ kanɛ ka m ye m tisi ya ka ya sʋ'oe li la, li na mɔr titɔndbama: 3 Ya dagɔbʋg baba la na kpanb nɛ Zin sian'anr la dɔlis Edom teŋ titɔndig la. Li ya-nya'aŋ baba la na pin'il nɛ atɛuk linɛ buon ye Yaarim Tɛuk la naarin, 4 lɔ'ɔŋi keŋ zin'ikanɛ buon Akirabim Suor la, gaadi paae Zin lɛb dagɔbʋg baba Kades Banɛa, ka gaadi paae Hazaradar lɔ'ɔŋi keŋ Azimon teŋin. 5 Zin'ikanɛ ka li yuki tɔ'ɔŋ kɔlbil linɛ bɛ Egipt teŋ titɔndigin la keŋ naae atɛukʋn la sa.6 “Ya-tuona baba titɔndig la na dɛn'ɛn Atɛuk Tita'ar nɔɔrin la. Ani na an titɔndig kan bɛn.
7 “Ya-datiuŋ baba titɔndig la na dɔlis ala naam atɛukʋn la paae Hor zuorin la tituaa. 8 Ka mɛ naam Hor zuorin la paae Lebo-Hamat. Li na keŋ ala paae Zedad, 9 ka mɔr ala ti paae Zifiron ka naae Hazarenan teŋin. Nɛ' na an ya-datiuŋ la titɔndig bɛn.
10 “Ya-nya'aŋ titɔndig la na pin'il Hazarenan ti paae Siefam teŋin. 11 Titɔndig la na dɔl ala naam Siefam paae Dibila ya-nya'aŋ baba lɛbid Ayin teŋ baba ka keŋ ala zuligi paae Galile bɛuŋ linɛ bɛ ya-nya'aŋ baba la. 12 Titɔndig la na dɔlis ala zuligi keŋ Joodan kɔldaugin, dɔlis hali ti paae atɛuk linɛ buon ye Yaarim Tɛuk la.
“Nɛ' na aan ya teŋ nɛ li titɔndisi gilig zin'ig wʋsa.”
13 Moses da yɛl Israel dim la ye, “Maalimi bʋgʋlʋm-bʋgʋlʋm pʋdigi teŋ kaŋa sʋ'ʋgi li. Zugsɔb la tis nɔɔr ye ya nɔki tis dɔɔd awai nɛ pʋsʋk la, 14 bɔzugɔ Reuben nɛ Gad dɔɔd nɛ Manase dɔɔg la pʋsʋk pʋn di'e ba faar sa, ka li dɔlisi ba wʋsa saamnam ya'. 15 Dɔɔd ayi' nɛ pʋsʋk bama pʋn di'e ba pʋʋr Joodan baba linɛ lɛbisid ya-nya'aŋ ka naan Jeriko teŋin lɛbid winnigi tansid zin'isi'a la.”
16 Zugsɔb la da yɛl Moses ye, 17 Elieza onɛ an maanmaan la nɛ Josua onɛ an Nun biig la na pʋdig teŋ la tisi ya. 18 Yisim tuongat yinne dɔɔg wʋsa sʋʋgin ka ba sʋŋi pʋdig teŋ la. 19 Banɛ na sʋŋi pʋdig teŋ la anɛ Kaleb onɛ an Jefune biig ka yi Juda dɔɔg la ni; 20 Semuel onɛ an Ammihud biig yi Simeon dɔɔg la ni; 21 Elidad onɛ an Kisilon biig ka yi Benjamin dɔɔg la ni; 22 Buki onɛ an Jogili biig ka yi Dan dɔɔg la ni; 23 Haniel onɛ an Efod biig ka yi Manase onɛ an Josef biig la dɔɔg la ni; 24 Kemuel onɛ an Sifitan biig ka yi Efiram onɛ an Josef biig la dɔɔg la ni; 25 Elizafan onɛ da an Panak biig ka yi Zebulun dɔɔg la ni; 26 Paltiel onɛ an Azan biig la ka yi Isaka dɔɔg la ni; 27 Ahihud onɛ an Sielomi biig la ka yi Aser dɔɔg la ni; 28 Pedahel onɛ an Ammihud biig la ka yi Naftali dɔɔg la ni. 29 Dap bama ka Zugsɔb la da tisi ba nɔɔr ye ba pʋdig teŋ la tis Israel dim la Keenan teŋin la.