Israel dimi da naan Egipt keŋ paae Moab si'em
33
1 Moses nɛ Aaron n da gaad Israel dim tuon ka ba yi Egipt teŋin gumm-gumm nwɛnɛ zabzabidib si'em la nwa. 2 Zugsɔb la da tis nɔɔr ka Moses sɔbi ba ken la yɛla si'em nwa.3 Israel dim la da duoe naam nɛ Rameses teŋin yi nwadkanɛ an yiiga la, li dabpii nɛ anu daar, Kum Maliak Gaadʋg malʋŋ dabisir la yimbɛog. Ba da yinɛ nɛ kpi'euŋ ka Egipt nidib la wʋsa nyɛɛ ba. 4 Saŋkan la ka Egipt dim la nam bɛɛ ani mummi ba bikpɛɛmnam banɛ ka Zugsɔb da kʋ la. Zugsɔb la da kɛ ka tɔɔg sig ban nɛ ba bada la zugin na. 5 Israel dim la da bas Rameses teŋin paae Sukot teŋinɛ la'asi digin ani. 6 Ka lɛn naam Sukot n keŋ la'asi digin Etam kpi'en sian'anr la nɔɔrin. 7 Ba da yi Etam, ka fɛndigi lɛb nya'aŋi keŋ lɛb Pihahirot lɛbisid ya-nya'aŋ Baal Zafon baba, diginɛ ani kpi'en nɛ Migdɔl teŋ la. 8 Ba da bas Pihahirot teŋ la ka lɔ'ɔŋ atɛuk la kpɛn' sian'arin. Ban da keŋ daba atan' Etam sian'arin la, ba da la'asi digin Mara teŋin. 9 Ba da yi Mara keŋ Elim, ani ka kɔlis pii nɛ ayi' nɛ kpʋkparis pisyɔpɔi da bɛ la; ka ba zin'ini anina. 10 Ba da duoe Elam teŋin la ka keŋ la'asi diginɛ kpi'en nɛ Atɛuk Zɛn'ug la. 11 Ka lɛn duoe Atɛuk Zɛn'ugʋn la keŋ la'asi digin Sin mɔɔgin la. 12 Ka duoe Sin mɔɔgin la keŋ la'asi digin Dofka teŋin. 13 Ka bas Dofka ka keŋ digin Alus teŋin. 14 Ba da naam Alus n keŋ digin Refidim, zin'ikanɛ ka ku'om da kae ka nidib la na nuu. 15 Ba da naam Refidim n keŋ la'asi digin Sinai mɔɔgin la. 16 Ba da naam Sinai mɔɔgin la keŋ digin Kibrof-Hataava. 17 Ba da naam Kibrof-Hataava teŋin keŋ digin Hazerof teŋin. 18 Ba da naam Hazerof keŋ digin Rifima teŋin. 19 Ba da naam Rifima keŋ digin Rimmon Perez teŋin. 20 Ba da naam Rimmon Perez keŋ digin Libna teŋin. 21 Ba da naam Libna keŋ digin Risa teŋin. 22 Ba da naam Risa keŋ digin Kehelata teŋin. 23 Ba da naam Kehelata keŋ digin Siefa zuorin. 24 Ba da naam Siefa zuorin la keŋ digin Harada teŋin. 25 Ba da naam Harada keŋ digin Makɛlof teŋin. 26 Ba da naam Makɛlof keŋ digin Tahaf teŋin. 27 Ba da naam Tahaf keŋ digin Tera teŋin. 28 Ba da naam Tera keŋ digin Mifika teŋin. 29 Ba da naam Mifika n keŋ digin Hasimona teŋin. 30 Ba da naam Hasimona keŋ digin Moserof teŋin. 31 Ba da naam Moserof teŋin keŋ digin Bene Jaakan teŋin. 32 Ba da naam Bene Jaakan keŋ digin Hor-Hagidgad. 33 Ba da naam Hor-Hagidgad keŋ digin Jotabat teŋin. 34 Ba da naam Jotabat keŋ digin Abirona teŋin. 35 Ba da naam Abirona keŋ digin Eziyon Geba teŋin. 36 Ba da naam Eziyon Geba keŋ digin zin'in Kades linɛ bɛ Zin mɔɔgin la. 37 Ba da naam Kedes keŋ digin Hor zuorin, Edom teŋ titɔndigin.
38 Zugsɔb la da tis nɔɔr ka Aaron onɛ da an maanmaan la dʋ Hor zuor la zug, zin'ikanɛ ka o da kpi nwadkanɛ paasid anu la pin'ilʋg daar, yʋʋm kanɛ paasid pisnaasi Israel dim la da yi Egipt na la. 39 Aaron da anɛ yʋma kɔbiga nɛ pisi nɛ atan' ka da kpi Hor zuor la zug.
40 Keenan dim na'ab onɛ da sʋ'oe Arad teŋ linɛ bɛ Negef teŋin la da wʋm ye Israel dim la kenna. 41 Ba da naam Hor zuor la baba keŋ digin Zalmona teŋin. 42 Ba da naam Zalmona keŋ digin Punon teŋin. 43 Ba da naam Punon keŋ digin Obof teŋin. 44 Ba da naam Obof teŋin keŋ digin Iye Abarim linɛ bɛ Moab teŋ titɔndigin la. 45 Ba da naam Iyim tɛɛsin la keŋ digin Dibon Gad teŋin. 46 Ba da naam Dibon Gad keŋ digin Alimon Dibilatam teŋin. 47 Ba da naam Alimon Dibilatam keŋ digin Abarim zuoya la ni kpi'e nɛ Nebo zuor la. 48 Ba da naam Abarim zuoya la ni keŋ digin Moab zin'ikanɛ an sassi ka kpi'e Joodan lɔm lɛbisid Jeriko tempʋʋg la baba. 49 Ba da digin Moab teŋ kanɛ an sassi la Joodan kɔldaug gbɛog, lin naam Bet-Jesimof ti paae Abɛl Sittim tɛɛns la bɛn.
50 Zugsɔb la da pian' tis Moses Moab zin'ikanɛ an sassi ka bɛ Joodan lɔm lɛbisid Jeriko tempʋʋg la baba, yɛl o ye, 51 “Pian'am tis Israel dim la ye, ‘Ya ya'a lɔ'ɔŋ Joodan n kpɛn' Keenan teŋin, 52 yanam on kad buudbanɛ bɛɛ ani la wʋsa yis ka san'ami ba bada banɛ ka ba kpi'a ka ya'ab la, nɛ ban maannɛ ba bada zin'isi'a la wʋsa. 53 Sʋ'ʋgimɛ teŋ la ka zin' ani, bɔzugɔ manɛ tisi ya teŋ la ye ya sʋ'ʋgi li. 54 Maalimi bʋgʋlʋm-bʋgʋlʋm pʋdigi teŋ la dɔlis tuŋ wʋsa zem si'em. Banɛ zu'oe yanam on tisi ba ka li mɛ zu'oe, ka banɛ pɔɔd la yanam on tisi ba bi'ela mɛn. Ya ya'a maal bʋgʋlʋm-bʋgʋlʋm la ka li gaŋ si'eli tis sɔ', li na aan o din. Ba na diti ba faar ka li dɔlli ba yaanam dɔɔd pʋʋri an si'em la. 55 Amaa ya ya'a pʋ kad buudzʋna la yisɛ, banɛ ka ya bas la na kilim titanbin'isi ya nini ni nɛ gɔn'ɔsi ya niŋgbina ni. Ba na daami ya teŋ kanɛ ka ya ye ya zin'in la bɛdegʋ. 56 Ka man gban'e ye m niŋi ba si'em la, m tiaki niŋi ya.’ ”