Israel dɔɔd banɛ zin'in Joodan nya'aŋ la yɛla
32
1 Reuben nɛ Gad dɔɔd dim banɛ da mɔr niigi nɛ kɔnbid bɛdegʋ la da gɔsi nyɛ Jaza nɛ Gilead tɛɛns la ka li nar nɛ gʋ'ʋl zin'ig. 2 Dinzug, ba da keŋ Moses nɛ Elieza onɛ an maanmaan la nɛ nidib la tuongatib la san'an yɛl ye, 3 “Naa, Atarof nɛ Dibon nɛ Jaza nɛ Nimira nɛ Hesbon nɛ Eleale nɛ Siibam nɛ Nebo nɛ Beon; 4 tembanɛ ka Zugsɔb la faaɛn ye o tis Israel dim la, nar nɛ gʋ'ʋlʋg zin'ig, ka tinam mɛ mɔr bʋnkɔnbid bɛdegʋ.” 5 Ka lɛn yɛl o ye, “Fʋ ya'a na siak, fʋn on nɔk zin'ibama tisi ti ka li lɛbigi ti din. Da kɛ ka ti lɔ'ɔŋ Joodan kɔldaug la.”6 Moses da bu'os Reuben nɛ Gad dim la ye, “Ya taaba na keŋ zaba ka yanam zin' kpɛlaa? 7 Bɔ ka ya kɛnsid Israel nidib la giinla nɛ ban na keŋ kpɛn' teŋ kanɛ ka Zugsɔb tisi ba la? 8 Ala nɔɔ ka ya saamnam da niŋ, tinamɛ da bɛ Kades Banɛa saŋsi'a la ka m tʋmi ba ye ba keŋ labisi gɔs teŋ la. 9 Ban da keŋ Esikol bɔn'ɔgin la labisi gɔs teŋ la naae la, ka pian' kɛns Israel nidib la giinla ye ba da kpɛn' teŋ kanɛ ka Zugsɔb tis o nidib la. 10 Zugsɔb la sʋnf da duoe daakan la ka o pɔɔ zi'el ye, 11 ‘Ban pʋ dɔllim nɛ ba sʋʋnr wʋsa la zug, dau onɛ an yʋʋm pisi bɛɛ gaad ala ka yi Egipt teŋin na la kʋ kpɛn' teŋ kanɛ ka m kaanbi tis Abraham nɛ Isaak nɛ Jakob la. 12 Baa nid yinne kʋ kpɛn', asɛɛ Kaleb onɛ an Jefune biig nɛ Josua onɛ an Nun biig la ma'aa, bɔzugɔ banɛ dɔl Zugsɔb la nɛ ba sʋʋnr wʋsa.’ 13 Zugsɔb sʋʋnr da duoe nɛ Israel dim hali, ka o kɛ ka ba giilim mɔɔgin la yʋma pisnaasi, hali ka banɛ tʋm tʋʋmbɛ'ɛdi o tuon la wʋsa bɛn ti naae. 14 Ka gɔsim ya'asɛ, yanamɛ nwa zi'e ya saamnam nɔba zugʋ tʋm tʋʋmbɛ'ɛd ka kɛ ka Zugsɔb la sʋnf maligim duoe nɛ Israel dim. 15 Ya ya'a fɛndig ka pʋ dɔl o, o ya'an na bas nimbama mɔɔgin kpɛla, ka li na anɛ yanam zug ka ba paam san'auŋ.”
16 Ka ba kɛɛn o san'an na yɛl ye, “Ayei! Ti na bɔɔd ye ti dɛŋin mɛ' garikinamɛ niŋi ti bʋnkɔnbid la, nɛ tempʋʋdi niŋi ti pu'ab nɛ biis la. 17 Amaa tinam ti'eb ya ye ti bɔb zaba la'adi gaad Israel nidib la tuonnɛ zab hali ti nyaŋ ka ba zin'in lin nar ye ba zin'in zin'isi'a la. Amaa ti pu'ab la nɛ biis na bɛ teŋkpi'euŋ kanɛ ka ti mɛ' la ni, ka teŋ la dim kʋ nyaŋi kena zab nɛ ba. 18 Ti kʋ maligim lɛbi ti yaanɛ asɛɛ Israel nid wʋsa ti di'e o faar. 19 Ti kʋ pʋdig nɛ ba fasi'a Joodan kɔldaug la gbɛkaŋa la, bɔzugɔ tinam pʋn di'e ti faar sa, Joodan gbɛogʋ lɛbisid ya-nya'aŋ baba la.”
20 Ka Moses lɛbisi yɛli ba ye, “Ya ya'a na niŋ ala, yanam zaŋimi ya zaba la'ad Zugsɔb la nini ni keŋ zaba la ni. 21 Lɔ'ɔŋimi Joodan mu'ar la zab hali ka o ti kadi o dataas la wʋsa tud sa, 22 ka teŋ la lieb Zugsɔb la din ka ya lɛb na ka kʋ lɛn di sam Zugsɔb la bɛɛ Israel dim san'anɛ. Ala ka Zugsɔb la na siak ka teŋ kaŋa na lɛbigi ya din. 23 Amaa ya ya'a pʋ niŋ nɛ'ɛŋaa, li na an tʋʋmbɛ'ɛd Zugsɔb la tuon; ka ya tʋʋmbɛ'ɛd na puk ka ya namis. 24 Mɛɛmi tɛɛnsi tisi ya pu'ab nɛ biis, nɛ garikinamɛ niŋi ya bʋnkɔnbid la, amaa mɔɔmi ka tʋm wʋʋ yanamɛ kaanb si'em la.”
25 Gad nɛ Reuben dim la da yɛl Moses ye, “Tinam banɛ aan fʋ yammis la na niŋ wʋʋ Zugsɔb la tis nɔɔr si'em la. 26 Ti biis nɛ pu'ab nɛ niigi nɛ kɔnbid la na kpɛlim Gilead teŋin la. 27 Amaa ti dau wʋsa onɛ yinɛ zaba la'ad na lɔ'ɔŋ Joodan la zabi tis Zugsɔb la wʋʋ on yɛl si'em la.” 28 Ka Moses da zi'el nɔɔri ba yɛla tis Elieza onɛ an maanmaan la nɛ Josua onɛ an Nun biig nɛ Israel dɔɔd tuongatib la wʋsa 29 ye, “Gad nɛ Reuben nidib la ya'a bɔb nɛ zaba la'adi lɔ'ɔŋ Joodan n zab wʋʋ Zugsɔb la yɛl si'em la, ka ya nyaŋi di'e teŋ la, yanam on nɔkim Gilead teŋ la tisi ba ka li lɛbigi ba faar. 30 Amaa ba ya'a pʋ lɔ'ɔŋi sʋŋi ya zabɛ, ba na di'e ba faar nɛ yanam, Keenan teŋin.” 31 Gad nɛ Reuben dim la da lɛbis ye, “Naa, ti na niŋ wʋʋ Zugsɔb la yɛli ti si'em la. 32 Ti na lɔ'ɔŋi keŋ Keenan nɛ zaba la'ad, amaa ti na mɔri ti pʋʋr Joodan gbɛkaŋa.”
33 Moses da nɔk Sihon, onɛ da an Amor dim na'ab la, sʋ'ʋlim la, nɛ Og onɛ da an Basan na'ab sʋ'ʋlim la wʋsa, nɛ li teŋ nɛ li titɔndis banɛ gilig la wʋsa tis Gad dim nɛ Reuben dim nɛ Manase dɔɔg pʋsʋk la dim. Manase da anɛ Josef biig. 34 Gad dim la da mɛ' Dibon nɛ Atarof nɛ Aroa 35 nɛ Atarof-Seufam nɛ Jaza nɛ Jogbɛha 36 nɛ Bet Nimira nɛ Bet Haran. Ba da mɛ' zaŋguom daadi giligi ba ka mɛ' zɔnna niŋi ba kɔnbid la. 37 Ka Reuben dim la mɛ' Hesbon nɛ Eleale nɛ Kiriafaim, 38 la'am nɛ Nebo nɛ Baal Meon (banɛ ka ba da tiaki ba yʋda la) nɛ Sibma. Ba da pʋd tembanɛ ka ba mɛ' la yʋda. 39 Ka Makir yaas la ni yinne onɛ da an Manase biig la, da keŋ Gilead sʋ'ʋlimin zabi nyaŋi ba ka kad Amor dim la yis. 40 Alazug Moses da nɔk Gilead teŋ la tis Makir dim banɛ an Manase yaas la ka ba zin'in anina. 41 Jair onɛ mɛ an Manase yaaŋ la da keŋi nyaŋ teŋkpɛmis la ka pʋdi li yʋ'ʋr ye Havof Jair. 42 Ka Noba mɛ nyaŋ Kenaf nɛ tembanɛ gilig la ka pʋdi li ye Noba.