Midian dim tʋbtɛɛgir yɛla
31
1 Zugsɔb la da yɛl Moses ye, 2 “Maalim Midian dim la si'el ka li yɔ' Israel dim la sam, ban maal Israel dim si'el la zug, ka lin nya'aŋ la fʋ na maal ka'alim.”3 Dinzug Moses da yɛl Israel dim la ye, “Nɔkimi ya zaba la'adi keŋ zab nɛ Midian dim la, ka Zugsɔb la bɔɔd ye o tɛɛgi ba tʋbir. 4 Gaŋim dɔɔg wʋsa sʋʋgin dap tusir ka ba keŋ tanp la.” 5 Alazug ka ba da yis dap tusir-tusir dɔɔg wʋsa ni Israel sʋʋgin, ka ba la'asi paae dap tusa piiga nɛ ayi' banɛ da bɔb nɛ ba zaba la'ad. 6 Moses da kɛ ka nidib tusir yi dɔɔg wʋsa ni ka Elieza onɛ an maanmaan la biig Finehas nɔk Pʋ'ʋsʋg Fuug Sʋgʋr la la'ad nɛ na'atana linɛ ka o na piebidi pa'annɛ ba zanbina la mɔri keŋ.
7 Ba da zab nɛ Midian dim la kʋ dap la wʋsa wʋʋ Zugsɔb la tis nɔɔr si'em la. 8 Ba da kʋ Evi nɛ Rekem nɛ Zur nɛ Hur nɛ Reba banɛ da an Midian teŋ na'anam la paas nimbanɛ ka da kʋ la wʋsa nɛ Balaam onɛ an Beor biig la. 9 Israel dim la da gban'e Midian teŋ dim la pu'ab nɛ biis, ka fan' niigi nɛ kɔnbid nɛ la'ad la mɔri kul. 10 Ba da nyu'oe bugum kanbis tempʋbanɛ ka Midian buudi bɛ la wʋsa, la'am nɛ ban la'asid zin'isieba la wʋsa.
11 Ba da nɔk la'abanɛ ka ba da fan' la la'an nɛ nidib nɛ bʋnkɔnbid la, 12 ka mɔr ban fan' la'asieba la wʋsa keŋ Moses nɛ Elieza onɛ an maanmaan la nɛ Israel nidib la wʋsa san'an, zin'ikanɛ ka ba da la'as Moab teŋ kanɛ an sassi lɛbid Joodan kɔldaug nya'aŋ ka bɛ Jeriko lɔ'ɔm la. 13 Moses nɛ Elieza nɛ nidib la tuongatib la wʋsa da yi la'asʋg zin'ig la yiŋ ye ba tʋ'ʋsi ba.
14 Zabzabidib la da naam zaba la nii lɛb na la, Moses sʋnf da duoe nɛ ba tuongatib banɛ gaad dap tusa nɛ kɔbig-kɔbig tuon la 15 ka o bu'osi ba ye, “Ya zan'as pu'ab la kʋʋb nɛɛ? 16 Gɔsimi ya, bama da dɔl Balaam sa'alʋg ka pan'as Israel dim ka ba fɛndig ka bas Zugsɔb la dɔllim Peor teŋin ka li kɛ ka tɔɔg paae Zugsɔb nidib la. 17 Nannanna kʋʋmi biribis la wʋsa. Ka mɛ kʋ pu'a kanɛ wʋsa mi' digin nɛ dau, 18 amaa basimi bipuŋ kanɛ wʋsa nan zi' dau wʋsa tisi ya mɛŋ.
19 “Onɛ wʋsa kʋ sɔ' bɛɛ si'is onɛ ka ba kʋ na bɛ la'asʋg zin'ig la yiŋ daba ayɔpɔi. Dabiskanɛ paasid atan' nɛ ayɔpɔi la daar ba na maali ba mɛŋ nɛ banɛ ka ba zabi gban'e la nyain. 20 Maalim fuug wʋsa nyain, nɛ linɛ an gbauŋ wʋsa, nɛ ban nɔk bʋʋg kɔnbid bɛɛ daugʋ maal si'el wʋsa.” 21 Elieza onɛ an maanmaan la da yɛl zabzabidib banɛ keŋ zabir la ye, “Zi'elkanɛ ka Zugsɔb la tis Moses la bɔɔd ye ya niŋ si'em nwa: 22 Sanlima nɛ anzurifa nɛ kʋntzɛn'ug nɛ kʋnt nɛ dalba nɛ kʋnt buudi wʋsa, 23 hali linɛ wʋsa ka bugum kʋ tun'e di la nar ye li kpɛn' bugumini lieb nyain. Amaa li sʋm ye li mɛ pie nɛ ku'okanɛ ka sɔ' na pie o mɛŋ ka lieb nyain la. Linɛ wʋsa ka bugum pʋ tun'e li la asɛɛ ka ya pie li nɛ ku'okaŋa mɛn. 24 Daba ayɔpɔi la daar pieminɛ ya fuud ka ya na lieb nyain, ka nyaan nyaŋi lɛbi kpɛn' la'asʋg zin'igin la na.”
Ban fan' si'el la pʋdigir yɛla
25 Zugsɔb la da yɛl Moses ye, 26 “Fʋn nɛ Elieza onɛ an maanmaan la nɛ buudi la tuongatib anɛ ye ya kaal nidib la nɛ bʋnkɔnbid banɛ ka ya fan' la wʋsa 27 ka pʋdigi li zin'is ayi' tis zabzabidib banɛ keŋ zaba la nɛ nimbanɛ kpɛlim la wʋsa. 28 Li ya'a anɛ nidib nɛ niigi nɛ bʋmis nɛ pɛ'ɛs nɛ bʋʋs la, ya ya'a kaali ti paae kɔbisnu asɛɛ ka ya yis yinne ka li anɛ zabzabidib banɛ keŋ zaba la pʋʋri tis Zugsɔb la. 29 Nɔkimi yanamɛ yis sieba la tis Elieza onɛ an maanmaan la ka li an Zugsɔb la din. 30 Ka pʋsʋk kanɛ ka Israel nimbanɛ kpɛlim la na di'e la, li ya'a anɛ nidib nɛ niigi nɛ bʋmis nɛ pɛ'ɛs nɛ bʋʋs nɛ bʋnkɔnbsieba wʋsa, ka ya kaali ti paae pisnu wʋsa, asɛɛ ya yis yinne tis Levi dim banɛ gɔsid Zugsɔb Fuug Sʋgʋr la.”
31 Alazug Moses nɛ Elieza da niŋ wʋʋ Zugsɔb la pa'ali ba si'em la. 32 La'abanɛ ka zabzabidib la da fan' la da anɛ, pɛ'ɛs tusa kɔbisyuobʋ nɛ pisyɔpɔi nɛ anu (675,000), 33 nɛ niigi tusa pisyɔpɔi nɛ ayi' (72,000), 34 nɛ bʋmis tusa pisyuobʋ nɛ yinne (61,000), 35 nɛ pu'a banɛ nan zi' digin nɛ dap tusa pistan' nɛ ayi' (32,000). 36 Ka li pʋʋr pʋsʋk linɛ an banɛ keŋ zaba la paam si'el wʋsa la da la'as nɛ pɛ'ɛs tusa kɔbistan' nɛ pistan' nɛ ayɔpɔi nɛ kɔbisnu (337,500), 37 ka Zugsɔb la pʋʋr an kɔbisyuobʋ nɛ pisyɔpɔi nɛ anu (675) 38 nɛ niigi tusa pistan' nɛ ayuobʋ (36,000), ka Zugsɔb la pʋʋr an pisyɔpɔi nɛ ayi' (72), 39 nɛ bʋmis tusa pistan' nɛ kɔbisnu (30,500), ka Zugsɔb la pʋʋr an pisyuobʋ nɛ yinne (61). 40 Nidib da la'as nɛ tusa piiga nɛ ayuobʋ (16,000), ka Zugsɔb la pʋʋr an pistan' nɛ ayi' (32). 41 Moses da nɔk pʋʋr linɛ an Zugsɔb din la tis Elieza onɛ an maanmaan la wʋʋ Zugsɔb la tis Moses nɔɔr si'em la.
42 Ka li pʋʋr pʋsʋk linɛ an Israel nidib la din nɛ Moses n da di'e nimbanɛ da keŋ zaba la pʋʋr la da la'as nɛ 43 pɛ'ɛs tusa kɔbistan' nɛ pistan' nɛ ayɔpɔi nɛ kɔbisnu (337,500) 44 nɛ niigi tusa pistan' nɛ ayuobʋ (36,000) 45 nɛ bʋmis tusa pistan' nɛ kɔbisnu (30,500) 46 nɛ nidib tusa piiga nɛ ayuobʋ (16,000). 47 Israel dim pʋʋr pʋsʋk la ni, Moses da gaŋ yinne pisnu wʋsa pʋʋgin, nidib la nɛ bʋnkɔnbid la wʋsa, wʋʋ Zugsɔb la tis o nɔɔr si'em la, nɔki ba tis Levi dɔɔg dim banɛ gɔsid Zugsɔb Fuug Sʋgʋr la.
48 Ka zabzabidib la tuongatib da kɛn Moses san'an na 49 ka yɛl o ye, “Tinam kɛ ka nidib la kaal zabzabidib la ka baa yinne pʋ yuligɛ. 50 Alazug ti mɔr sanlima la'abanɛ ka ti fan' ka li an ti pʋʋr la na ye ti tis Zugsɔb la. La'abama anɛ nu'upiris nɛ nu'utʋʋs nɛ nu'ubaans nɛ tʋblɛma nɛ niŋgɔnkɔris ye ti maal suguru sɔsʋg maannɛ tis Zugsɔb la ti mɛŋ yɛla.” 51 Moses nɛ Elieza da di'e sanlima la'ad la wʋsa ba san'an, 52 ka sanlima linɛ ka banɛ gaad nidib la tuon la da mɔr na ka ba di'e tis Zugsɔb ka li an piini la tɛbisim da anɛ anzurifa gbila tusa piiga nɛ ayuobʋ nɛ kɔbisyɔpɔi nɛ pisnu (16,750). 53 (Zabzabidib woo daa zaŋ la'abanɛ ka ba fan' zaba la ni.) 54 Moses nɛ Elieza onɛ an maanmaan la da di'e la'ad la zabzabidib tuongatib la san'an ka mɔri li keŋ La'asʋg Sʋgʋrin la, ka li an tiɛnri tis Israel dim Zugsɔb la tuon.