Kaanbʋg yɛla
30
1 Moses da yɛl Israel buudi dɔɔd tuongatib la ye, “Zugsɔb la tis nɔsi'a nwa: 2 Sɔ' ya'a kaanb kaanbʋgʋ tis Zugsɔb la, bɛɛ o pʋ'ʋlʋm tis o mɛŋ ye o na maal on kaanb si'el la, o mid ka o gʋ'ʋŋ on yɛl si'el la niŋir, bɔzugɔ li anɛ tilas ye o maal on yɛl si'el la wʋsa.3 “Pu'asadir onɛ nan bɛɛ o saam yin ya'a kaanb si'el bɛɛ gban'e ye o maal si'el 4 ka o saam wʋm ka pʋ yɛl o si'ela, on kaanb ka gban'e si'el la wʋsa asɛɛ ka o maali li. 5 Amaa o saam ya'a wʋm ka pʋ siakɛ, on gban'e ka kaanb si'el la wʋsa kʋ zi'enɛ bɔzugɔ o saam pʋ siaki tis oo.
6 “O ya'a kaanb ala naae bɛɛ o nɔɔri fan' ka o gban'e ye o na maal si'el 7 ka kul sid ka o sid la wʋm ka pʋ yɛl o si'ela, on kaanb ka gban'e si'el la asɛɛ ka o yɔɔ li. 8 Amaa o sid ya'a wʋm ka pʋ siakɛ, o san'am kaanbʋg la paŋ, ka Zugsɔb la kʋ lɛm gban'e o kaanb kan zugɔ.
9 “Pʋkɔɔnr bɛɛ pu'a kanɛ ka o sid kad o ya'a kaanb bɛɛ gban'e ye o maal si'el, asɛɛ ka o maali li.
10 “Ka pu'a ya'a nam bɛ nɛ o sid ka kaanb bɛɛ gban'e ye o maal si'el ka li an pʋ'ʋlʋŋ 11 ka o sid wʋmi li ka pʋ yɛl si'el bɛɛ zan'asɛ, on kaanb ka gban'e ye o na niŋ si'el la wʋsa, asɛɛ ka o maali li. 12 Amaa o sid la ya'a wʋm ka pʋ siak kaanb kanɛ yii o nɔɔrin na laa, o kʋ yɔɔ, bɔzugɔ o sid la san'ami li paŋ ka Zugsɔb la kʋ gban'e pu'a la li yɛlaa. 13 O sid la tun'e kɛ ka o yɔ bɛɛ yi kaanbʋg bɛɛ pʋ'ʋlʋŋ kanɛ wʋsa ka o maal la pʋʋgin. 14 Amaa o sid la ya'a pʋ yɛl si'ela ka dabisa la kpɛn ken, li pa'al ye o siak o pu'a la kaanbʋg kanɛ ka o kaanb ka o wʋm la. 15 O ya'a mɛ bas ka li yuugi yuug ka o nyaan yɛl ye on pʋ siakɛ, li ye li ziil nɛ on zug.”
16 Zi'elbama ka Zugsɔb la da tis Moses, dau nɛ o pu'a yɛla nɛ yisɔb nɛ bipuŋ kanɛ nam bɛɛ o saam yin yɛla.