Ba nyaŋ Basan na'ab Og
3
1 Din nya'aŋ la, ti fɛndignɛ dɔl suori keŋ kpa'ad Basan ka Og onɛ an Basan na'ab la yina nɛ o soogianam wʋsa tʋ'ʋsi ti Edire teŋin ye ba zab nɛ ti. 2 Ka Zugsɔb la yɛlim ye, “Da zɔt o dabiem, ka m zaŋ on nɛ o soogianam la wʋsa nɛ o teŋ la tisi ya. Niŋim o nwɛnɛ fʋn niŋ Sihon onɛ an Amor dim na'ab ka sʋ'oe Hesbon teŋ si'em la.”3 Zugsɔb onɛ aan ti Wina'am la mɛ da nɔk Og niŋi ti nu'usin nɛ o soogianam la wʋsa. Ka ti kʋʋ ba wʋsa ka sɔ' pʋ kpɛlim. 4 Saŋkan la ka ti faaɛn o tempʋʋd la wʋsa. O tempʋʋd pisyuobʋ la wʋsa baa yinne pʋ kpɛlim ka ti pʋ faaɛn ba san'anɛ. Agob tɛɛns la wʋsa, na'ab Og sʋ'ʋlim dinɛ bɛ Basan la. 5 Tempʋbama wʋsa da mɔr zaŋguom bɛda banɛ mɔr paŋ ka wa'am ka kpɛn'ɛs kʋlis ka nɔk dabɛda puugi li, la'am nɛ teŋkpɛmis bɛdegʋ banɛ ka ba pʋ mɛ zaŋguoma giligɛ. 6 Ka ti san'ami ba wʋsa, nwɛnɛ tinamɛ niŋ Sihon Hesbon na'ab si'em la. Ka ti san'am tempʋʋd la nidib, dap nɛ pu'ab nɛ biis wʋsa. 7 Amaa bʋnkɔnbid nɛ la'abanɛ ka ti faaɛn ba tempʋʋdin la, ti da zii ba wʋsa kul ka li aan ti din. 8 Ala ka saŋa kan la ka ti nyaŋ Amor na'anama ayi' nwa ka faaɛn ba sʋ'ʋlim dinɛ bɛ Joodan nya'aŋ la, din yi Arnon bɔn'ɔgin la mɔri paae Hemon zuorin la. 9 (Sidon dim da buon Hemon ye Siriyon, ka Amor dim la buonnɛ li ye Senir.) 10 Ti da faaɛn tɛɛns banɛ bɛ kʋkʋna zug nɛ Gilead teŋgbauŋʋn la nɛ Basan wʋsa mɔri paae Saleka nɛ Edire; linɛ an Na'ab Og tempʋʋd banɛ bɛ Basan la. 11 (Na'ab Og onɛ an Basan na'ab la da anɛ Refa dim gandaug, onɛ o kɔn'ɔkɔn' da kpɛlim ba nidib la wʋsa sʋʋgin. O gadʋg da anɛ kʋnt ka ba maal ka li wa'alim gat nɔbir makir piiga nɛ atan' ka li yalʋŋ an nɔbir makir ayuobʋ. Li nam bɛ Rabba teŋin dinɛ bɛ Ammon dim sʋ'ʋlimin la.)
Ban da pʋdig Og teŋ la
12 Tinamɛ da faaɛn teŋ si'a saŋa kan la m da pʋdig nɛ tis Reuben dim nɛ Gad dim, sʋ'ʋlim dinɛ bɛ Aroa tuonnɛ kpi'e nɛ Aanon bɔn'ɔg la, la'am nɛ Gilead linɛ an kʋkʋna teŋ la sʋ'ʋlim pʋsʋk, kpanb nɛ li tempʋʋd la. 13 Ka Gilead sʋ'ʋlim linɛ kpɛlim la, nɛ Basan linɛ da an na'ab Og sʋ'ʋlim la, m zaŋi tis Manase dɔɔg la pʋsʋk. (Agob teŋgbauŋ sʋ'ʋlim nɛ Basan sʋ'ʋlim la, ba da buonnɛ li ye Refa dim teŋ. 14 Jair onɛ an Manase yaaŋ la, da sʋ'ʋg Agob sʋ'ʋlim la wʋsa mɔri paae Gesur dim nɛ Maaka dim la titɔndig. Ba da nɔk nɛ o yʋ'ʋri pʋdi li hali ti paae zina, ka ba kpɛn buonnɛ li ye Havof Jair.) 15 Ka m nɔk Gilead tis Makir. 16 Amaa Reuben dim nɛ Gad nidib la, m tisi ba sʋ'ʋlim kanɛ yi Gilead sigid Aanon bɔn'ɔgin la, ka bɔn'ɔg la teŋsʋk an titɔndig hali keŋ paae Jabok kɔldaug la bɔn'ɔgin, dinɛ an Ammon dim titɔndig la. 17 Li tuon la titɔndig da anɛ Joodan dinɛ bɛ Araba la, din yi Kinɛref paae Araba tɛuk la (Yaarim Tɛuk la), li teŋiri dɔlisi sigid Pisig zuorin. 18 M da tisi ya nɔɔr saŋkan la ye, “Zugsɔb onɛ aan ya Wina'am la tisi ya teŋ kaŋa ye ya sʋ'ʋgi li. Amaa asɛɛ ka ya dap banɛ mɔr paŋ la bɔbi yi zaba na. Ya lɔ'ɔŋim gaadi ya ba'abiis Israel tuon. 19 Nɛ wala wʋsa, ya pu'ab nɛ ya biis nɛ bʋnkɔnbid banɛ an bɛdegʋ la na kpɛm bɛ tempʋʋd banɛ ka m tisi ya la, 20 ti paae saŋa kanɛ ka Zugsɔb la na tisi ya ba'abiis nwɛnɛ on tisi ya si'em la, ka ban mɛ na sʋ'ʋg teŋ kanɛ ka Zugsɔb onɛ aan ya Wina'am na tisi ba Joodan lɔ'ɔm la. Din nya'aŋ la sɔ' wʋsa na lɛbi sʋ'ʋg dinɛ ka m tisi ya la.” 21 Saŋa kan la ka m tis Josua nɔɔr ye, “Fʋ mɛŋ nyɛ nɛ fʋ nini Zugsɔb onɛ aan fʋ Wina'am la maal na'anama ayi' nwa si'em. Zugsɔb la na niŋi ala nɛ sʋ'ʋlim banɛ bɛ zin'ikanɛ ka ya wa'ae la. 22 Da zɔti ba dabiem; Zugsɔb onɛ aan ya Wina'am la mɛŋ na zabi tisi ya.”
Moses na nyɛ amaa ka kʋ kpɛn'ɛ
23 Saŋa kan la ka m bɛllim Zugsɔb la ye, 24 “M Zugsɔb Onɛ an Paŋtita'ar Sɔba, fʋ pin'ili pa'alim fʋn zu'oe si'em nɛ fʋ nu'ug la kpi'em si'em. Win kan bɛ yaanɛ, arezana bɛɛ dunia zugʋ na nyaŋi tʋm fʋn maal si'el nɛ tʋʋm kpi'ema banɛ ka fʋ tʋm la? 25 Kɛl ka m keŋ gɔs teŋ sʋŋ dinɛ bɛ Joodan kɔldaug lɔm la; kʋkʋna teŋ kanɛ an sʋ'ʋŋa la nɛ Lebanon.” 26 Amaa yanam zug, Zugsɔb la sʋnf da pɛlig nɛ mam ka o kʋ kɛlisi m pian'adɛ, ka yɛl ye, “Di sia'al ya, da lɛn pian'adim nɛ' yɛlaa! 27 Kem dʋ Pisiga zuor zugʋ gɔs ya-tuona nɛ ya-datiuŋ, ka gɔs ya-dagɔbʋg nɛ ya-nya'aŋ.a Gɔsim teŋ la nɛ fʋ mɛŋ nini, fʋn sadigim kʋ lɔ'ɔŋ Joodan kaŋa la. 28 Amaa zaŋim Josua zi'el nidib la tuon ka kpɛmis o ka tis o paŋ, ka onɛ na dɔlli baa lɔ'ɔŋ ka na kɛ ka ba sʋ'ʋg teŋ kanɛ ka fʋ na nyɛ la.” 29 Ani ka ti kpɛlim bɔn'ɔg linɛ kpi'e Bet-Peor la.