Zi'elʋg 4

Zugsɔb wada la siakir yɛla

1 Alazug nannanna nwa, yanam Israel dima, kɛlisimi zi'ela nɛ wada banɛ ka m bɔɔd ye m pa'ali ya la; dɔlisimi nɛ ba ka ya na vʋe, ka na kpɛn' sʋ'ʋg teŋ kanɛ ka Zugsɔb onɛ aan ya yaanam Wina'am ye o tisi ya la. 2  Da paasi bɛɛ yisi si'el nɔzi'ela banɛ ka m tisidi ya la, amaa dɔlli Zugsɔb onɛ aan ya Wina'am zi'ela banɛ ka m tisi ya la. 3 Ya nyɛya nɛ ya mɛŋ nini Zugsɔb la tʋm si'el Baal Peor teŋin la. Zugsɔb la san'am banɛ wʋsa bɛɛ ya sʋʋgin dɔl Baal onɛ bɛ Peor la, 4 amaa yanam banɛ gban'e Zugsɔb onɛ aan ya Wina'am nu'us ayi' la nan kpɛn vʋe zina. 5 Gɔsimiya, m pa'ali ya zi'ela nɛ wada nwɛnɛ Zugsɔb onɛ aan m Wina'am la tisim nɔɔr si'em la. Ala ka ya na dɔlisi li suor ka sʋ'ʋg teŋ kanɛ ka ya kpɛn'ɛd la. 6 Gu'usimi ka dɔlisi li, ka linɛ na pa'ali ya ya'am nɛ yanamɛ gban'e li gbin si'em tis buudbanɛ wʋsa na wʋm nɔzi'elbama, ka ba na yɛl ye, “Sida buudtita'akaŋa mɔr ya'am ka an nimbanɛ gban'ad si'el gbin!” 7 Buudkan bɛ yaanɛ an buudtita'ar ka ba wina bɛ nɛ ba yammin wʋʋ Zugsɔb onɛ aan ti Wina'am la bɛ nɛ ti si'em saŋa kanɛ wʋsa ka ti sɔsid o la? 8 Ka buudkan bɛ ya an buudtita'are mɔr pʋpielim zi'ela nɛ wada kaŋa nwa ka m mɔri zi'e ya tuonnɛ tisidi ya zina nwa?

9 Kʋdim gu'usimi ka gɔsi ya mɛŋ sʋ'ʋŋa, ka ala ka ya kʋ tam dinɛ ka ya nini nyɛ la, bɛɛ li yii ya pʋtɛn'ɛrin ya vʋm saŋa wʋsa. Pa'alimini ya biis ka ban mɛ ti pa'ali ba biis. 10 Tɛnri dabiskanɛ ka ya da zi'en Zugsɔb onɛ aan ya Wina'am la tuon Horeb zuorin la, saŋkan ka o da yɛlim ye, “La'asim nidib la m tuon ka ba wʋmi m pian'ad, ka na zamis ka zɔt mam ba bɛllim saŋa wʋsa teŋgbauŋ kaŋa ni, ka na pa'ali ba biis.” 11 Ya da li'el na zi'en zuor la gbinnin, saŋa kanɛ ka bugum diti yit arezana ni na nɛ saŋgbansabilis nɛ lik tita'ar. 12 Ani ka Zugsɔb pian'ad bugumin la tisidi ya. Ka ya wʋm pian'ad la, ka lɛɛ pʋ nyɛ si'ela. Kʋkɔr ma'aa da bɛɛ ani pian'ad. 13 O da nie o nɔnaar la nyain, nɛ zi'ela piiga banɛ ka o zi'eli tisi ya ye ya dɔl la, ka sɔbi li niŋ kuglamma ayi' ni. 14 Ka Zugsɔb la tisim suor saŋkan la ye m pa'ali ya zi'ela nɛ wada banɛ ka ya na dɔl, yanamɛ lɔ'ɔŋid Joodan ye ya sʋ'ʋg teŋ si'a la.

15 Daakanɛ ka Zugsɔb la da pian'adi tisidi yaa yit bugumin Horeb zuorin la, ya da pʋ nyɛt si'el si'ela. Dinzugɔ, gu'usimi nɛ ya mɛŋ sʋ'ʋŋa 16  ka da tʋmmi dian'ad tʋʋma ka li kɛ ka ya maal bada bɛɛ ya'ab bada banɛ nwɛnɛ dau, bɛɛ pu'a tisi ya mɛŋa. 17 Mɛ da maali si'el dinɛ nwɛnɛ bʋnkɔnbʋg bɛɛ niimbanɛ ian'ad agɔla, 18 bɛɛ si'el linɛ ken teŋin bɛɛ zimi banɛ bɛ ku'omin la. 19 Ka ya ya'a ti gɔs saŋgbauŋin la, ka nyɛ winnig nɛ nwadig nɛ nwadbibis nɛ dinɛ bɛɛ agɔl la wʋsa, yanam da kɛ ka li ma'aa ya ka ya igini ba tuon ka zun'e linɛ wʋsa ka Zugsɔb onɛ aan ya Wina'am la nɔki tis buudi wʋsa dunia kaŋa ni la. 20 Amaa ya'a kpɛlim nɛ yanam, Zugsɔb la nɔki ya yis bugumin zin'ikanɛ ka ba nyɛligid kʋnt la, yisi ya Egipt pʋʋgin na, ye ya an nimbanɛ aan o mɛŋ din, nwɛnɛ yanamɛ yʋ'ʋn an si'em nannanna la. 21 Zugsɔb la sʋnf da pɛlig nɛ mam yanam zug, ka o pɔɔ zi'el ye mam kʋ lɔ'ɔŋ Joodan mu'ar nwaa kpɛn' teŋ sʋŋ kanɛ ka Zugsɔb onɛ aan ya Wina'am la ye o tisi ya ka li liebi ya faar la. 22 Man na kpi teŋ kaŋa ni; m kʋ lɔ'ɔŋ Joodan nɛ, amaa yanam lɔ'ɔŋid nɛ ye ya sʋ'ʋg teŋ sʋŋ la. 23 Gu'usimi, ka da tam Zugsɔb onɛ aan ya Wina'am nɔnaar dinɛ ka o naal nɛ ya la; da maali ba'ar dinɛ ka Zugsɔb onɛ aan ya Wina'am kis la tisi ya mɛŋa. 24  Ka Zugsɔb onɛ aan ya Wina'am la anɛ fufum Wina'am, ka an bugum kanɛ kanbid.

25 Ka ya ya'a ti mɔr biis nɛ yaas, ka naan teŋin la yuug, ka ti zan'as ka maal ba'asi'a tʋm bɛ'ɛd Zugsɔb onɛ aan ya Wina'am la nini ni, ka kɛ ka o sʋnf pɛlig, 26 m buon arezana nɛ dunia ye ba di kasɛt zina, ye ya na bɔdig teŋ kanɛ ka ya lɔ'ɔŋid Joodan ye ya sʋ'ʋg la. Ya kʋ bɛ ani yuugɛ, amaa ya na ba'asi san'am. 27 Zugsɔb la na widigi ya nidib la sʋʋgin, ka ya bi'ela ma'aa na kpɛlim buudbanɛ ka Zugsɔb la na mɔri ya keŋ la ni. 28 Anina ka ya pʋ'ʋsid daad nɛ kuga bada banɛ ka ninsaalib maal ka ba pʋ nyɛta ka pʋ wʋm bɛɛ dit bɛɛ wʋm nyuugɔ. 29  Amaa li ya'a yii ani ka ya iee Zugsɔb onɛ aan ya Wina'am la, ya na nyɛɛ o. Ya ya'a iee o nɛ ya sʋnf wʋsa nɛ ya siig wʋsa ya na nyɛɛ o. 30 Ya ya'a ti bɛ namisʋg pʋʋgin, ka yɛlbama wʋsa paae ya, dabisa banɛ kpɛlim nya'aŋ la, ya na fɛndigi lɛb Zugsɔb onɛ aan ya Wina'am la san'an na ka siak o nɔɔr, 31 Zugsɔb onɛ aan ya Wina'am la anɛ nimbaanlzɔt Wina'am. O kʋ basi ya bɛɛ o san'ami ya bɛɛ o tam nɔnaar dinɛ ka o maal nɛ ya yaanam, ka siaki pɔɔ zi'el la.

Zugsɔb la an Wina'am

32 Bu'osimi zʋmaan kanɛ gaad la yɛla, saŋa kanɛ ka ya da nan kae la, din yi daakanɛ ka Wina'am maal ninsaal dunia nwa ni la. Bu'osimi saŋgbauŋ la pin'il zin'isi'a ti naae zin'isi'a la gɔs ye, si'el nam mi' niŋi zu'oe zem wʋʋ dinɛ niŋ nwa, bɛɛ ya nam mi' wʋm si'el ka li nwɛnɛ li? 33 Ninsieba nam mi' wʋm ka Wina'am pian'ad bugumin wʋʋ yanamɛ wʋm si'em la ka nan kpɛn vʋeyaa? 34 Win si'a nan mi' mɔ ye o yis buudi yinne buudsi'a pʋʋgin tis o mɛŋ ka li an makir, nɛ zanbin nyalima nɛ yɛl nyalima nɛ zaba nɛ nu'ug kpi'euŋ nɛ nu'ug kanɛ mɔr paŋ hali tiɛnd la, nɛ kilima tʋʋma, nwɛnɛ dinɛ wʋsa ka Zugsɔb onɛ aan ya Wina'am tʋm tisi ya Egipt teŋin ya nini ni laa? 35  O da pa'ali ya nɛ'ɛnam wʋsa nɛ ye ya baŋ ye, Zugsɔb la an Wina'am. Sɔ' lɛn kae n paas o zugɔ. 36 O naam arezana ni kɛ ka ya wʋmi o kʋkɔr ye o tɛɛgi ya tʋbir. Teŋgbauŋʋn nwa mɛn, o pa'ali ya o bugum tita'ar, ka ya wʋm ka o pian'ad ka li yit bugumin na. 37 On nɔŋi ya yaanam la zug, ka o gaŋ yanam banɛ aan ba yaas banɛ duoe ba nya'aŋ la mɔri ya yi Egipt na nɛ o mɛŋ paŋ tita'ar la, 38 ka kad buudbanɛ bɛɛ ya tuonnɛ zu'oe ka kpi'emi gati ya la, amaa o mɔri ya kpɛn' ba teŋin na, ka nɔki li tisi ya ka li aan ya faar wʋʋ lin an si'em zina la. 39 Baŋimi ka nɔki li lɔɔ ya sʋnfʋn zina ye, Zugsɔb la anɛ Wina'am bɛ arezana linɛ bɛɛ agɔla, ka bɛ dunia linɛ bɛ teŋir la, ka sɔ' lɛn kae. 40 Tɛnri nɛ o nɔzi'elʋg dinɛ ka m tisidi ya zina la, ala ka si'el wʋsa na an sʋ'ʋŋa tisi ya biis banɛ na duoe ya nya'aŋ na la, ka ya bɛllim na yuug teŋ kanɛ ka Zugsɔb onɛ aan ya Wina'am tisi ya la ni saŋa wʋsa.

Suak tɛɛns la yɛla

41 Moses da bak tempʋʋd atan' ka ba bɛ Joodan nya'aŋ, 42 ye sɔ' ya'a kʋ nid o na nyaŋi zɔɔ keŋ ani su'a, ka li anɛ sɔ' ya'a kʋʋ o kpi'a ka li ka' o kʋnɛ pɔn'ɔsim, ka li mɛ ka' kisidim dɛŋ tuonnɛ, o na nyaŋi zɔɔ keŋ tempʋban la yinne ni faaɛn o nyɔvʋr. 43 Tempʋʋd la nwa, Bezer dinɛ bɛ sian'arin kʋkʋn zug la da anɛ Reuben dɔɔg la bʋn, ka Ramot dinɛ bɛ Gilead la mɛ da anɛ Gad dɔɔg la din, ka Golan dinɛ bɛ Basan la mɛ an Manase dim din.

Wada la tisib

44 Wada la nwa ka Moses nɔki digil Israel dim la tuon. 45 Bama an nɔzi'ela nɛ wada la ka Moses zaŋi tisi ba, ban da yi Egipt na, 46 ka bɛ bɔn'ɔgin kpi'e Bet-Peor, Joodan nya'aŋ la. Li da bɛnɛ Amor na'ab Sihon teŋin onɛ dit na'am Hesbon, onɛ ka Moses nɛ Israel dim da nyaŋ, ban da yi Egipt na la. 47 Ba da faaɛn o teŋ nɛ Basan na'ab Og teŋ mɛn, Ammon dim na'anama ayi' banɛ bɛ Joodan nya'aŋ la. 48 Teŋ kaŋa da naanɛ Aroa, Aanon bɔn'ɔg nɔɔrin la, paae Siriyon zuorin (linɛ an Hemon la) 49 Ka li kpanb nɛ Araba dinɛ bɛ Joodan nya'aŋ la wʋsa hali ti paae Araba Atɛuk dinɛ bɛ Pisig zuor teŋir la.