Wada piiga la yɛla
5
1 Moses da la'as Israel dim ka yɛli ba ye yanam Israel dima, kɛlisimi zi'ela nɛ wada banɛ ka m nied nyain tisidi ya zina la! Zamisiminɛ li ka siaki dɔlisi li. 2 Zugsɔb onɛ aan ti Wina'am la da naal nɔɔr nɛ ti Horeb zuorin la. 3 Li da ka'anɛ ti yaanam ka Zugsɔb la naal nɔɔr nɛ ba, amaa li anɛ tinam banɛ wʋsa la'asi zi'e kpɛla zina la. 4 Zugsɔb la da pian' tisi ya, ya nini ni, yit bugumin zuorin la. 5 (Saŋkan la, ka mam zi'en Zugsɔb la nɛ yanam teŋsʋk, ye m nie Zugsɔb labaar la tisi ya bɔzugɔ, ya da zɔt nɛ bugum la dabiem ka pʋ dʋ zuor la zugɔ.) Ka o yɛl ye,6 “Manɛ an Zugsɔb onɛ aan ya Wina'am ka yisi ya Egipt teŋin, zin'ikanɛ ka ya da an yammis ka ba namisidi ya la.
7 “Mid ka ya dɔl winsieba lɛm paas mam zug.
8 “Mid ka ya maali wina linɛ an wʋʋ niiŋ bɛɛ bʋnkɔnbʋg bɛɛ ziiŋa. 9 Da pʋ'ʋsi ba bɛɛ igini tisi ba girimaa. Mam onɛ aan ya Zugsɔb Wina'am la, m anɛ nyuur sɔb, ka pʋ siak ye m pʋdigi m girima nɛ sɔ'ɔɔ. Banɛ ki'is mam la, m na namisi ba biisi ba saamnam tʋʋmbɛ'ɛd yɛla, hali ti paae zʋmaana atan' nɛ anaasi, 10 ka pa'annɛ m nɔŋilim nɛ banɛ nɔŋ mam ka siaki m yɛlʋg la hali ti paae zʋmaana tusa-tusa.
11 “Mid ka ya mɔri Zugsɔb Wina'am yʋ'ʋri maan yɔɔg-yɔɔg. Ya ya'a maal ala Zugsɔb na namisi ya.
12 “Dɔlli Vʋ'ʋsʋm Dabisir la ka kɛ ka li an kasi nwɛnɛ Zugsɔb onɛ aan ya Wina'am la zi'el nɔɔr si'em tisi ya la. 13 Nɔkimi daba ayuobʋ tʋmmini ya tʋʋma. 14 Amaa daba ayɔpɔi la anɛ Zugsɔb Wina'am din ka li pʋ sʋm ye ya tʋm tʋʋm si'a, yanam bɛɛ ya biribis bɛɛ bipumis, bɛɛ ya yamdaad bɛɛ yampu'ab, bɛɛ ya bʋnkɔnbid, bɛɛ saam banɛ bɛ nɛ ya la. Ala ka ya sankpan'as dap nɛ pu'ab na vʋ'ʋs wʋʋ yanamɛ vʋ'ʋsid si'em la. 15 Tɛnri ye ya da anɛ yammis Egipt teŋin, ka Zugsɔb onɛ aan ya Wina'am la da tiɛn o nu'ukpi'euŋ nɛ nu'ug kanɛ mɔr paŋ hali la mɔri ya yis anina na. Dinzugɔ, Zugsɔb onɛ aan ya Wina'am la zi'el nɔɔri tisi ya ye, ya tɛnr Vʋ'ʋsʋm Dabisir la.
16 “Tisimi fʋ saam nɛ fʋ ma girima wʋʋ Zugsɔb onɛ aan fʋ Wina'am la zi'el si'em tisif la, ka fʋ nyɔvʋr na yuug ka si'el wʋsa na an sʋ'ʋŋa tisif teŋ kanɛ ka fʋ Zugsɔb Wina'am ye o tisif la.
17 “Mid ka fʋ kʋ nid.
18 “Mid ka fʋ san'am pu'a bɛɛ dau.
19 “Mid ka fʋ zu.
20 “Mid ka fʋ di ziri kasɛti tisi ya tiraan.
21 “Mid ka fʋ kɛ ka fʋ ya'amlɛog kpɛn' fʋ tiraan pu'a bɛɛ o yir bɛɛ o yamdau bɛɛ o yampu'ak bɛɛ o bʋnkɔnbid bɛɛ linɛ wʋsa ka o sʋ'oe ni.”
22 Ka Moses yɛli ba ye, “Nɔzi'ela bama ka Zugsɔb la dʋ'ʋs o kʋkɔtita'ari yit bugumini tisi ya, yanamɛ da la'as taaba zuorin la ka saŋgbana nɛ lik da bɛ la. O da pʋ lɛm pian' si'eli paasɛ. Ani ka o sɔbi niŋ kuglamma ayi' ni tisim. 23 Yanamɛ da wʋm o kʋkɔr likin saŋkanɛ ka zuor la da dit bugum la, ya buudi tuongatib nɛ kpɛɛmnam la wʋsa da kɛɛn m san'an na 24 ka yɛl ye, ‘Zugsɔb onɛ aan ti Wina'am la pa'ali ti o na'am paŋ nɛ o kpi'euŋ, ka ti wʋm ka li yi bugumin na. Zina ti baŋ ye, ninsaal na nyaŋi vʋe baa Wina'am ya'a pian'ad nɛ o. 25 Ka nannanna bɔ ka ti kpiida? Bugum tita'ar kaŋa na kanbi ti, ka ti ya'a lɛn wʋm Zugsɔb onɛ aan ti Wina'am la ti na kpi. 26 Ninsaal kan bɛ ya nan mi' wʋm Wina'am Kanɛ Vʋe la ka o pian'ad bugumin wʋʋ tinamɛ nyɛ si'em la ka lɛn vʋeya? 27 Fʋn li'elim kɛlis dinɛ ka Zugsɔb onɛ aan ti Wina'am la yɛt. Ka yɛli ti Zugsɔb onɛ aan ti Wina'am la yɛlif si'el wʋsa, ka ti na kɛlis ka siak.’ ” 28 Zugsɔb la wʋm yanamɛ yɛl mam si'em la, o yɛlim ye, “M wʋm nidib la pian' si'em tisif la. Ban yɛl si'el la wʋsa an sʋ'ʋŋa. 29 M bɔɔd ye ba zɔtim dabiem nɛ ba sʋnf wʋsa ka dɔlisi m nɔzi'ela la saŋa wʋsa, ka si'el wʋsa na an sʋ'ʋŋa tisi ba biis saŋa dinɛ ka' bɛnnɛ! 30 Kem yɛli ba ye ba lɛm kuli ba sʋga la ni. 31 Amaa fʋn kpɛlim kpɛla ka m tisif nɔzi'ela nɛ wada dinɛ ka fʋ na pa'ali ba ka ba na dɔlisi li teŋ kanɛ ka m tisi ba ka ba sʋ'ʋg la ni. 32 Alazugɔ, gu'usimi ka tʋm Zugsɔb onɛ aan ya Wina'am la tisi ya nɔɔr si'em la; da fɛndigi datiuŋ bɛɛ dagɔbʋga. 33 Dɔlli suokanɛ ka Zugsɔb onɛ aan ya Wina'am zi'eli tisi ya la, ala ka ya na vʋe, ka si'el wʋsa na an sʋ'ʋŋa tisi ya, ka ya dabisa na yuug teŋ kanɛ ka ya na sʋ'ʋg la ni.”