Wina'am wada piiga la yɛla
20
1 Ka Wina'am yɛl nidib la ye, 2 “Manɛ an Zugsɔb onɛ aan ya Wina'am ka yisi ya Egipt teŋin, zin'ikanɛ ka ya da an yammis ka ba namisidi ya la.3 “Da dɔlli winsieba lɛm paas mam ya'asɛ.
4 “Mid ka ya maali wina linɛ an wʋʋ niiŋ bɛɛ bʋnkɔnbʋg bɛɛ ziiŋa. 5 Da pʋ'ʋsidinɛ ba bɛɛ igini tisi ba girimaa. Mam onɛ aan ya Zugsɔb Wina'am la, m anɛ nyuur sɔb, ka pʋ siak ye m pʋdigi m girima nɛ sɔ'ɔɔ. Banɛ ki'is mam la, m na namisi ba biisi ba saamnam tʋʋmbɛ'ɛd yɛla hali ti paae zʋmaana atan' nɛ anaasi, 6 ka pa'annɛ m nɔŋilim nɛ banɛ nɔŋ mam ka siakidi m yɛlʋg la hali ti paae zʋmaana tusa-tusa.
7 “Mid ka ya mɔri Zugsɔb Wina'am yʋ'ʋri maan yɔɔg-yɔɔg. Ya ya'a maal ala Zugsɔb na namisi ya.
8 “Tiɛnmi Vʋ'ʋsʋm Dabisir la yɛla, ka kɛ ka li an kasi. 9 Nɔkimi daba ayuobʋ tʋmmini ya tʋʋma. 10 Amaa daba ayɔpɔi la anɛ Zugsɔb Wina'am din ka li pʋ sʋm ye ya tʋm tʋʋm si'a, yanam bɛɛ ya biribis bɛɛ bipumis, bɛɛ ya yamdaad bɛɛ ya yampu'ab, bɛɛ ya bʋnkɔnbid bɛɛ saam banɛ bɛ nɛ yaa. 11 Bɔzugɔ Zugsɔb nɔk nɛ daba ayuobʋ maal agɔl nɛ teŋin nɛ atɛuk nɛ dinɛ wʋsa bɛɛ li ni, amaa ka vʋ'ʋs daba ayɔpɔi daar. Dinzugɔ Zugsɔb niŋ dabisir la nɛ bareka, ka kɛ ka li an kasi.
12 “Tisimi fʋ saam nɛ fʋ ma girima ka ala ka fʋ nyɔvʋr na yuug teŋ kanɛ ka Zugsɔb onɛ aan ya Wina'am la na tisi ya la.
13 “Mid ka ya kʋ nid.
14 “Mid ka ya san'am pu'a bɛɛ dau.
15 “Mid ka ya zu.
16 “Mid ka ya di ziri kasɛti tisi ya tiraan.
17 “Mid ka fʋ kɛ ka fʋ ya'amlɛog kpɛn' fʋ tiraan yir bɛɛ o pu'a, bɛɛ o yamdau bɛɛ o yampu'ak, bɛɛ o bʋnkɔnbid, bɛɛ linɛ wʋsa ka o sʋ'oe ni.”
Dabiem kpɛn' nidib la
18 Ka nidib la nyɛ satansʋg nɛ sa-iansʋg ka wʋm na'atan la piebʋg la ka nyɛ ka zuor la wʋsa an nyɔ'ɔs la, ka dabiem mɔri ba. Ka ba lɛb lallisa 19 ka yɛl Moses ye, “Fʋn pian'am tisi ti ka ti na wʋm. Amaa da kɛ ka Wina'am pian' tisi tii ka ti na kpi.” 20 Ka Moses yɛl nidib la ye, “Da zɔti dabiem. Ka Wina'am ye o maki ya nɛ gɔs, ka kɛ ka ya na zɔt o dabiem ka kʋ tʋm bɛ'ɛdɛ.” 21 Ka nidib la bɛ lallisa ka Moses on paae Wina'am bɛ si'el la, ka zin'ig la wʋsa an lik.
Maan Bimbim yɛla
22 Ka Zugsɔb yɛl Moses ye, “Yɛlim Israel dim la nwa: ‘Ya mɛŋ nyɛ man naan arezana nii pian' si'em. 23 Da nɔki anzurifa bɛɛ sanlima mɛ' wina paas mam zugɔ. 24 Nɔkimi tanni mɛ' maan bimbim, ka maali ya malima dinɛ an pɛ'ɛs nɛ bʋʋs nɛ niigi li zug. Zin'ikanɛ wʋsa ka m kɛ ka ya la'asi pʋ'ʋsim, anina ka m na kena niŋi ya bareka. 25 Ya ya'a nɔk nɛ kuga maal bimbim la, yanam da nɔk kugbanɛ ka ba kpi'e ba la mɛɛ. Ya ya'a nɔk lieŋe kpi'e ba, li kʋ an sʋm tis mam. 26 Da maali dʋʋsa dʋʋ paae maan bimbim la zugɔ, ka ba na nyɛ ya nyan.’ ”