Yammis yɛla
21
1 Ka Zugsɔb la yɛl Moses ye, “Zi'elbama ka m ye fʋ pa'ali ba ka ba dɔl: 2 Fʋ ya'a da' Hibiru yammʋg, o na tʋm yʋma ayuobʋ tisif amaa yʋʋm kanɛ paasidi ayɔpɔi la, fʋn basim o ka o keŋ ka da lɛn tʋm ya'asɛ, ka mɛ da yɔ si'ela. 3 O ya'a da kɛɛn o kɔn' na on kulimi o kɔn', ka o mɛ ya'a da mɔri pu'a on mɔr pu'a la kul. 4 Ka li ya'a anɛ o zugdaan la da' pu'a la tis o ka o du'a dap nɛ pu'ab, o zugdaan la sʋ'oe pu'a la nɛ o biis la wʋsa, ka dau la ma'aa na kul o kɔn'. 5 Amaa yammʋg la ya'a yɛl ye, ‘Mam nɔŋi m zugdaan nɛ m pu'a nɛ m biis la zug, m pʋ bɔɔd ye m kul zaalim,’ 6 alazugɔ o zugdaan la na nɔk o keŋ sariakatib san'an, ka dɔl o keŋ dɔɔg za'anɔɔrin ka nɔk piim vʋdigi o tʋbir, ka o na liebi o yammʋg hali nɛ o nyɔvʋr bɛn. 7 Amaa dau ya'a kuos o bipuŋi tis ye o lieb yammʋg, ba kʋ bas o ka o keŋ wʋʋ dau na keŋ si'em la. 8 Ka pu'asadir la ya'a pʋ paae o zugdaan la ya'am, asɛɛ ka o lɛbis o tis o saam ka di'e o ligidi. O zugdaan la ka' suor ka o na kuos o tis teŋ zʋŋ nida, bɔzugɔ o tʋm o linɛ pʋ nara. 9 Ka o ya'a mɛ lɛn zaŋ o nɛ tis o biig, asɛɛ ka o gɔs o wʋʋ o pu'ayua. 10 Ka li ya'a lɛn anɛ o mɛŋi dii o, ka di pu'a paas ya'as, on da mɔŋ yiiga sɔb la diib nɛ fuud bɛɛ zan'as ye o kʋ gbɛn nɛ o. 11 Ka o ya'a pʋ nyaŋi maal bama atan' nwaa, pu'a la on basim o, ka da yɔ ligidi baa bi'ela.Zaba nɛ ninkʋʋr yɛla
12 “Ka sɔ' ya'a nwɛ' o tiraanɛ kʋ, ban mɛ kʋʋm on sɔb. 13 Amaa o ya'a pʋ maal nɛ bugusim ka anɛ Wina'am bɔɔdim ye li kɛɛn ala na, m na pa'alif zin'isi'a ka o na zɔɔ keŋ anina. 14 Amaa sɔ' ya'a su'a kʋʋ o tiraan nɛ pɔn'ɔsim, hali baa o ya'a bɛɛ m maan bimbim la ni, yanam nɔkim o keŋ lalli kʋʋ o. 15 Ka onɛ bʋ' o saam bɛɛ o ma, ban kʋʋm o. 16 Ka onɛ mɛ su'a gban'e sɔ' kuos bɛɛ o nam mɔr o nɛ, ka ba gban'e o, ban kʋʋm o. 17 Nid ya'a pɔ nɔɔri niŋ o saam bɛɛ o ma, asɛɛ ka ba kʋʋ o. 18 Ka dapa ayi' ya'a zab ka yinne nɔk kugir bɛɛ o nu'ugʋ nwɛ' ayinne la pu'alim o ka o pʋ kpii ka pʋ tun'e yit paalʋʋ, 19 o ya'a tilig, ban da kʋ onɛ pu'alim o tiraan la, amaa li sʋm ye o yɔ on san'am si'el la wʋsa ka lɛn gɔs o ka o paam laafi naae. 20 Ka dau ya'a bʋ' o yamdau bɛɛ o yampu'ak nɛ balaar ka o kpi, ban tɛɛgim dau la tʋbir. 21 Amaa o ya'a paam laafi ban da tɛɛg dau la tʋbirɛ bɔzugɔ on sʋ'oe yammʋg la zug. 22 Ka dapa ayi' ya'a zabid ka nwɛ'ɛnɛ taab ka di gaadi gban'e pu'apʋʋg ka o kpa'ae, amaa ka pu'a la mɛŋ pʋ pu'alim, onɛ maal ala la na yɔ pu'a la sidi gban'e si'em ka sariakatib la siak la. 23 Amaa o ya'a pu'alim nɛ hali, asɛɛ ya nɔk nyɔvʋri yɔ nyɔvʋr sam. 24 Nif yɔɔd nif sam, ka nyin yɔɔd nyin sam, ka nu'ug yɔɔd nu'ug sam, ka nɔbir yɔɔd nɔbir sam. 25 Onɛ kanbisi o tiraan nɛ bugum, asɛɛ ka ba kanbis o nɛ bugum. Li ya'a anɛ o pu'alim o nɛ asɛɛ ka ba pu'alim o, o ya'a kɛ ka o fieb, asɛɛ ka ba kɛ ka o fieb. 26 Sɔ' ya'a nwɛ' o yamdaug bɛɛ o yampu'ak nif ka li san'am, o na bas o yammʋg la ka o keŋ zaalim, o nif la zug.” 27 Ka o ya'a lɛn kɔ'ɔg nɛ o yampu'ak bɛɛ o yamdau nyinnɛ, asɛɛ ka o bas yammʋg la ka o keŋ zaalim, o nyin la zug.
Bʋnkɔnbid tʋʋmbɛ'ɛd yɛla
28 “Ka na'araug ya'a zɛ dau bɛɛ pu'a pu'alim ka o kpi, asɛɛ ka ba lɔb na'araug la nɛ kugaa kʋ mɛn, ka sɔ' mɛ da ɔnbi o ni'imi, amaa ba kʋ tɛɛg na'araug la sɔb tʋbirɛ. 29 Amaa na'araug la ya'a anɛ onɛ zɛɛd, ka ba yɛl o sɔb ka o pʋ gur oo ka o kʋ nɛ dau bɛɛ pu'a, ban lɔm na'araug la kʋ, ka mɛ kʋ onɛ sʋ'oe o la. 30 Amaa onɛ kpi la nidib ya'a gban'e ye naaf la sɔb yɔ ligidi, asɛɛ ka o yɔ dinɛ ka ba bɔɔd la tiaki o nyɔvʋr. 31 Kisʋg kaŋa mɛ la'am bɛ nɛ tis na'araugʋ na zɛ biribiŋ bɛɛ bipuŋi pu'alim. 32 Ka na'araug ya'a zɛ yamdaug bɛɛ yampu'aki pu'alim, na'araug la sɔb na yɔ anzurifa ligidi pistan' tis onɛ sʋ'oe yammʋg la, ka ba lɛn lɔb na'araug la kʋ.
33 “Ka dau ya'a pʋ pibili o bulig bɛɛ o pin'ilnɛ tuud bʋmbɔk ka pʋ pibilɛ, ka naaf bɛɛ bʋŋ luu anina, 34 asɛɛ ka onɛ sʋ'oe bulig bɛɛ bʋmbɔk la yɔɔ tis bʋnkɔnbʋg la sɔb ka sʋ'oe bʋnkɔnb kpiiluŋ la. 35 Ka sɔ' na'araug ya'a zɛɛ o tiraan na'araugʋ pu'alim ka o kpi, asɛɛ ka ba pʋdig onɛ kpi la ni'im, ka kuos onɛ vʋe la pʋdig ligidi la. 36 Amaa li ya'a anɛ na'akanɛ nɔŋ zaba ka o daana pʋ lɔɔ o, asɛɛ ka o yɔ bʋnkɔnbkanɛ ka o kʋ la yɛla, ka zaŋ bʋnkpiilʋŋ la.”