Sama kɛɛsʋg yʋʋm
15
1 Yʋma ayɔpɔi wʋsa asɛɛ ka ya kɛɛs sama bas. 2 Yanamɛ na niŋ si'em nwa: onɛ wʋsa pɛ'ɛŋ ligidi tis o tiraan onɛ an Israel nid o kɛɛsim bas. Li pʋ sʋm ye fʋ di'e sam onɛ aan fʋ ba'abiig bɛɛ Israel nid san'anɛ bɔzugɔ lin paae saŋa kanɛ ka Zugsɔb la zi'el ye ba kɛɛs sama bas, ka ba mɔɔli li la. 3 Ya na nyaŋi di'esi ya sama banɛ bɛ saam la san'an amaa da di'e samme fʋ ba'abiig onɛ dii fʋ sam la san'anɛ. 4-5 Nɛ wala wʋsa, nɔŋdaan kʋ bɛ ya sʋʋgin teŋ kanɛ ka Zugsɔb la tisi ya, ye ya sʋ'ʋg ka li aan ya faar la, bɔzugɔ ya ya'a siak Zugsɔb onɛ aan ya Wina'am la ka gu'usid ka dɔl o zi'ela banɛ ka m tisidi ya zina la, o na niŋi ya bareka bɛdegʋ. 6 Zugsɔb onɛ aan ya Wina'am la na niŋi ya bareka wʋʋ on zi'el si'em la. Tɛɛns bɛdegʋ dim na kɛɛn ya san'an na pɛ'ɛŋ amaa, yanam kʋ pɛ'ɛŋ sɔ' nii. Ya na sʋ'ʋg tɛɛns bɛdegʋ amaa teŋ kae na sʋ'ʋgi ya.7 Sɔ' ya'a an nɔŋdaan ya ba'abiis la sʋʋgin, teŋ kanɛ ka ya Zugsɔb Wina'am tisi ya la, yanam da digilimi ya sʋnfʋ kpiank ka mɔŋi ya ba'abiig onɛ an nɔŋdaan la, 8 amaa lɛɛ tiɛnmini ya nu'us ka siaki pɛ'ɛŋi on bɔɔd si'el la tis o nɛ ya sʋnf wʋsa. 9 Gu'usimi ka da su'a pʋtɛn'ɛbɛ'ɛd kaŋa ya sʋnya ni ye, “Yʋma ayɔpɔi dinɛ ka ba na kɛɛs sama bas la li'el ya,” ka lin zug kɛ ka ya zan'as tisib ka mɔŋi ba. Ya ya'a niŋ ala ka o fabili tis Zugsɔb la, ya na kpɛn' taalin. 10 Tisimi nɛ ya sʋʋnr wʋsa ka da tisidi nɛ ɛndʋgɔ, bɔzugɔ, dinɛ na kɛ ka Zugsɔb onɛ aan ya Wina'am la na niŋi ya tʋʋma wʋsa bareka nɛ dinɛ wʋsa ka ya si'is. 11 Nɔŋdaannam na bɛ teŋin la saŋa wʋsa. Dinzugɔ, m tisidi ya nɔɔr kaŋa ye ya piinimi ya ba'abiis nɛ nɔŋ dim nɛ banɛ ka' si'eli ya teŋin la.
12 Fʋ Hibiru tiraan, o ya'a anɛ dau bɛɛ pu'a, ya'a kuos o mɛŋi tisif, o na tʋm tisif yʋma ayuobʋ, yʋʋm kanɛ paas ayɔpɔi la fʋn basim o suor ka o keŋ. 13 Fʋ ya'a tis o suor, da kɛ ka o keŋ nu'uzaalisɛ. 14 Yisimi fʋ kɔnbid nɛ fʋ zieŋin zʋʋd nɛ daam la tis o nwɛnɛ fʋ Zugsɔb Wina'am niŋif bareka si'em la. 15 Tɛnri ye ya da anɛ yammis Egipt teŋin ka ya Zugsɔb Wina'am faaɛn ya, din ka m tisidi ya nɔzi'elkaŋa zina la. 16 Amaa fʋ tʋmtʋm ya'a yɛlif ye, “Mam pʋ bɔɔdi basi fɔ.” Ka li anɛ on nɔŋ fʋn nɛ fʋ yidim la zug, 17 fʋn nɔkim o keŋ za'anɔɔrin ka nɔk vʋʋndiŋi vʋdig o tʋbir ka o na lɛbigi fʋ tʋmtʋm o nyɔvʋr bɛn wʋsa, ka niŋ ala nɛ fʋ tʋmtʋm pu'ak mɛn.
18 Da gɔs ka li tɔi tisif ye fʋ basi fʋ yammʋg ka o mɔr yɔlisim, bɔzugɔ on tʋm si'el yʋma ayuobʋ la gaad fʋn na nɔk sɔ' ka o tʋm ka fʋ yɔɔd o la nɔɔra ayi'. Din ka fʋ Zugsɔb Wina'am la na niŋi fʋ tʋʋma wʋsa bareka.
Bʋnkɔnbid bikpɛɛmnam yɛla
19 Gaŋim niigi nɛ kɔnbid bikpɛɛm banɛ an bʋndibis la ka li an Zugsɔb fʋ Wina'am la din. Da nɔki fʋ na'adibig kpɛɛm kpɛn'ɛs kuobɔ, ka mɛ da pʋni fʋ pɛ'og bikpɛŋ kɔnbidɛ. 20 Yʋʋm wʋsa fʋn nɛ fʋ yidim na kʋʋ ba ɔnb, zin'ikanɛ ka Zugsɔb fʋ Wina'am gaŋ la. 21 Amaa bʋnkɔnbʋg la ya'a mɔr dɛŋ, nwɛnɛ on na an wabʋg bɛɛ zʋnzɔŋ bɛɛ o mɔri dɛŋ kanɛ sid ka' sʋ'ʋm, da nɔki li maal maannɛ tisi Zugsɔb fʋ Wina'am la. 22 Ɔmmini li ya tempʋʋdin. Sɔ' wʋsa na tun'e ɔnb, onɛ an nyain maan pʋʋgin la bɛɛ onɛ ka' nyainnɛ, wʋʋ yanamɛ ɔnbid kɔɔng bɛɛ walig ni'im si'em la. 23 Amaa da ɔnb nɛ ziim la, dɛŋin kpa'ae zikanɛ yi ni'imin la bas teŋin wʋʋ ku'om nɛ ka nyaan dʋgi ɔnb.