Da nwaadi ya mɛŋ onɛ kpi zugɔ
14
1 Ka Moses yɛli ba ye, “Ya anɛ Zugsɔb onɛ aan ya Wina'am la biis. Da nwaadi ya niŋgbiŋ bɛɛ pʋni ya gbɛ'ɛd baba onɛ kpi la yɛlaa. 2 Ya anɛ nimbanɛ an kasi tisi ya Zugsɔb Wina'am. Nidib banɛ bɛ dunia ni la wʋsa, yanam ka Zugsɔb la gaŋi ya ye ya aan o nyɔɔrin kɔnbʋg, nɛ o faar.”Diib linɛ kis nɛ linɛ pʋ kisa
3 Mid ka ya di bʋn linɛ kis. 4 Bʋnkɔnbid banɛ ka ya na ɔnb anɛ bama: Naaf nɛ pɛ'og nɛ bʋʋg, 5 walig, nɛ kɔɔng nɛ mɔlif nɛ sibig nɛ bama buudi wʋsa, nɛ sian'arin bʋʋg nɛ zuoya ni pɛ'og. 6 Ya tun'e ɔnb bʋnkɔnbʋg kanɛ ka o tafɛɛd buaki ayi' ka o mɛ ʋgʋsid yaama bugusid la. 7 Amaa da ɔnbi bʋnkɔnbid banɛ ʋgʋsid yaama bugusid ka ba tafɛɛd pʋ buak nyain la, nwɛnɛ yʋgʋm nɛ su'oŋ nɛ zuobʋʋgɔ, ka ba anɛ kisʋgʋ tisi ya. 8 Kukur mɛ anɛ kisʋg, la'am nɛ o nɔba buak la, o pʋ nyaŋidi ʋgʋsid yaama bugusida. Da ɔnbi ba ni'im bɛɛ ya si'isi ba.
9 Bʋnvʋya banɛ bɛ ku'omin la wʋsa, ya na nyaŋi ɔnb banɛ mɔr pa'ad nɛ kpʋkpama la. 10 Amaa ku'omin bʋn linɛ wʋsa pʋ mɔr pa'ad nɛ kpʋkpama yanam da dii, li anɛ kisʋgʋ tisi ya.
11 Niiŋ kanɛ an nyain wʋsa yanam ɔmmi. 12 Amaa da ɔnbi zuung buudi wʋsa, 13 bɛɛ silʋg buudi wʋsa, 14 bɛɛ agaung buudi wʋsa 15-17 bɛɛ viiug buudi wʋsa, bɛɛ ku'omin niiŋ, 18 bɛɛ daalʋŋ nɛ ziiŋ yaadiŋ buudi wʋsa nɛ zinzauŋɔ.
19 Bʋn-ian'ad-baanlʋg wʋsa anɛ kisʋgʋ tisi ya. Da ɔnbi nɛ baa, 20 amaa niiŋ kanɛ wʋsa mɔr kpʋkpama ian'ad ka an nyain la, ɔmmi nɛ li.
21 Da ɔnbi bʋnkanɛ ka ya nyɛ ka li kpii digiya. Nɔkimi li tis saan onɛ bɛ teŋin la ka o ɔnb, bɛɛ ya kuosi tis teŋ zʋŋ nid. Amaa yanam anɛ nimbanɛ an kasi tisi ya Zugsɔb la.
Mid ka ya nɔk bʋbil ni'imi dʋg o ma bin'isimin.
Piig pʋʋr
22 Fʋ ya'a bʋn zʋʋd la yʋʋm wʋsa, asɛɛ ka fʋ pʋdig zin'is piiga yis yinne digil. 23 Dimmi yinne kanɛ ka ya yis ka li an; ki nɛ daam nɛ kpaam nɛ na'abibis banɛ ka ba du'a yiiga la, nɛ kɔnbid la, ya Zugsɔb Wina'am la tuon, zin'ikanɛ ka o na gaŋ ye o yʋ'ʋr bɛɛ anina la. Ala ka ya na zamis yanamɛ na na'asid Zugsɔb onɛ aan ya Wina'am la si'em saŋa wʋsa. 24 Amaa Zugsɔb onɛ aan fʋ Wina'am gaŋ zin'isi'a ye o yʋ'ʋr bɛ la ya'a lal nɛ fʋn yi zin'isi'a la na, 25 fʋn tiakimi fʋ pʋʋr piiga la nɛ ligidi mɔri keŋ zin'ikanɛ ka Zugsɔb fʋ Wina'am gaŋ la, 26 keŋ paae ka nɔk ligidi la da' fʋn bɔɔd si'el nwɛnɛ niigi bɛɛ pɛ'ɛs bɛɛ daam bɛɛ bʋnnuuda dinɛ mi'ig bɛɛ fʋn bɔɔd si'el wʋsa. Ani ka fʋn nɛ fʋ yidim wʋsa na dii li Zugsɔb la tuon ka maal sumalisim. 27 Da tami Levi dim banɛ bɛɛ ya tempʋʋdin la yɛlaa, ban pʋ mɔr pʋʋr bɛɛ faar ka li aan ba mɛŋ din la zug. 28 Yʋma atan' wʋsa, yanam mɔr yʋʋm kan la pʋʋr piiga la wʋsa mɔri keŋ su'a li' ya tempʋʋdin la. 29 Ala ka Levi dim banɛ pʋ mɔr pʋʋr bɛɛ ba mɛŋ faar la nɛ saam nɛ kpiibis nɛ pʋkɔnya banɛ bɛɛ ya tempʋʋdin la na kena dii tig. Ala ka Zugsɔb onɛ aan ya Wina'am la na niŋ yanamɛ nɔki ya nu'ugʋ si'is si'el wʋsa bareka.