Da pʋ'ʋsid winsieba
13
1 Nɔdi'es bɛɛ onɛ nyaŋidi yɛt zaansʋŋ gbin ya'a duoe ya sʋʋginɛ yɛli ya zanbina bɛɛ ye o na pa'al tʋʋmnyalima, 2 ka zanbina bɛɛ tʋʋmnyalima banɛ ka o yɛl la ya'a sid ti niŋ, ka o yʋ'ʋn yɛl ye “Kɛlli ka ti dɔl winsieba (win banɛ ka ya zi' la), kɛlli ka ti pʋ'ʋsi ba,” 3 yanam da kɛlis nɔdi'es kan bɛɛ zaansʋŋ sɔb la. Ya Zugsɔb Wina'am la bɔɔd ye o kpansi ya gɔs ye ya nɔŋ o nɛ ya sʋnf nɛ ya siig wʋsa bɛɛ? 4 Li anɛ ya Zugsɔb Wina'am la ma'aa ka ya na dɔl, on ka ya na tʋm tis. Dɔllini o nɔzi'elʋg, ka siak o nɔɔr. Tʋm tisi nɛ o ka gban'e o nu'us ayi'. 5 Nɔdi'es kan bɛɛ zaansʋŋ sɔb la, anɛ ba kʋʋ o bɔzugɔ, o pian'ad nɛ ye ya zan'asi ya Zugsɔb Wina'am onɛ mɔri ya yis Egipt na ka faaɛn ya yis yanamɛ da an yammis teŋ si'a la. O mɔɔdi ye o fɛndigi ya yis Zugsɔb Wina'am la zi'el suosi'a ye ya dɔl la. Ala ka ya na yis yɛlbɛ'ɛd la ya sʋʋgin.6 Fʋ mɛŋ bier bɛɛ fʋ pitʋ bɛɛ fʋ dakɔɔnr bɛɛ fʋ pu'ayua bɛɛ fʋ pu'a kanɛ ka fʋ nɔŋ la, bɛɛ fʋ zua nɔŋir ya'a bɛligi fʋ yɛl ye, “Kɛl ka ti keŋ pʋ'ʋs winsieba,” banɛ ka fʋn bɛɛ fʋ yaanam zi', 7 wina banɛ ka nimbanɛ giligi ya yammin bɛɛ lalli wʋsa teŋ la pin'ilʋgʋn ti paae li bɛn, 8 fʋn da siak bɛɛ kɛlisi tis o, mɛ da zɔɔ o nimbaanlig ka bas o. 9 Asɛɛ ka fʋ ba'asi kʋʋ o. Fʋ nu'ugʋ na dɛŋ tuon ka banɛ kpɛlim la paas ka ya kʋʋ o. 10 Lɔmminɛ o nɛ kuga kʋ bɔzugɔ o mɔɔd nɛ ye o fɛndigif Zugsɔb fʋ Wina'am onɛ mɔri ya yis Egipt na, yanamɛ da an yammis teŋ si'a la. 11 Ala ka Israel dim wʋsa na wʋm ka zɔ dabiem, ka sɔ' kʋ lɛn tʋm tʋʋmbɛ'ɛd kan buudi ya'asɛ. 12-13 Ya ya'a ti wʋm ka ba yɛt ye nimbanɛ an bugusim dim duoe teŋ kanɛ ka ya Zugsɔb Wina'am ye o tisi ya la pan'asidi ba teŋ dim ka ba yidig ka yɛt ye, “Kɛlli ka ti keŋ pʋ'ʋsi winsieba banɛ ka ya zi',” 14 asɛɛ ka ya bu'osi baŋ ka vɛɛns sʋ'ʋŋa, ka li ya'a sid an sida ye yɛlkisʋg maali ya sʋʋgin, 15 asɛɛ ka ya ba'asi kʋ nimbanɛ bɛ teŋ la pʋʋgin wʋsa. San'amini li nyain, nidib la nɛ ba bʋnkɔnbid la wʋsa. 16 La'asimi teŋ la la'ad wʋsa nidib la wʋsa teŋsʋk, ka nyu'oe la'ad la nɛ teŋ la wʋsa bugum, ka li an maannɛ tis Zugsɔb onɛ aan ya Wina'am. Teŋ kan na kpɛlim anɛ dabɔɔd ka ba kʋ lɛm mɛɛ li ya'asɛ. 17 Bʋn linɛ na san'am la wʋsa ka ya na san'am, da lɛn kɛ ka si'el kpɛlim ya san'anɛ: ala ka Zugsɔb la na yis o sʋnpɛɛn linɛ mɔr dabiem la ya san'an. O na zɔɔ ya nimbaanlig ka mɔri ya nyɔɔg, ka kɛ ka ya wiaki zu'oe wʋʋ on da zi'eli ya yaanam si'em la, 18 bɔzugɔ yanamɛ siaki ya Zugsɔb Wina'am nɔɔr, ka dɔl o zi'ela banɛ ka m tisidi ya zina nwa ka niŋid linɛ dɔl suor Zugsɔb nini ni la.