Zin'ig yinne pʋ'ʋsim yɛla
12
1 Ka Moses da lɛn yɛli ba ye, “Gban'ar nɛ wada bama ka ya na gu'us ka dɔlis teŋ kanɛ ka Zugsɔb onɛ aan ya yaanam Wina'am tisi ya ye ya sʋ'oe, saŋkanɛ wʋsa ka ya bɛ teŋin la. 2 San'ami zin'ibanɛ bɛ zuoya ni nɛ kʋkʋna zug nɛ tititada gbina ni, zin'ibanɛ ka buudbanɛ ka ya wa'ae ye ya sʋ'ʋgi ba teŋ la maannɛ ba wina la. 3 Nwa'amini ba winpʋ'ʋsʋm bimbima la, ka nwa'a ba teŋgban kuga la, ka nyu'oe ba teŋgban Asera daad la nɛ bugum, ka vɔɔn ba bada nɛ ba wina la bas, ka kpiisi ba yʋda zin'iban la ni. 4 Da pʋ'ʋsidi ya Zugsɔb Wina'am la wʋʋ ban pʋ'ʋsid si'em la. 5 Amaa asɛɛ ka ya iee zin'ikanɛ ka ya Zugsɔb Wina'am la na gaŋi ya buudi dɔɔd la wʋsa sʋʋgin ka niŋ o yʋ'ʋr ka li an o bɛllim zin'ig la. Ani ka ya na keŋ 6 mɔri maana banɛ nyu'od la nɛ maana banɛ kpɛlim la anina na. Mɔri ya pʋʋr piiga, nɛ maan banɛ ka ya bɔɔd ye ya tis la anina na. Mɔri dinɛ ka ya pian' zi'el ye ya tis, nɛ ya ya'amlɛog maan nɛ ya niigi nɛ pɛ'ɛsi kiibi du'a bisieba la kena. 7 Ani, ya Zugsɔb Wina'am la tuon, ka yanam nɛ ya yidim na dit ka maan sumalisim nɛ linɛ wʋsa ka ya nɔk nu'ugʋ si'is; bɔzugɔ, ya Zugsɔb Wina'am la na niŋi ya zug albareka. 8 Da niŋ wʋʋ tinamɛ niŋid kpɛla si'em zina la, sɔ' wʋsa niŋid nɛ linɛ an sʋm tis o, 9 yanam nam pʋ paae vʋ'ʋsʋm zin'iga, bɛɛ faar linɛ ka ya Zugsɔb Wina'am ye o tisi ya la. 10 Amaa ya ya'a lɔ'ɔŋ Joodan n zin'in teŋ kanɛ ka ya Zugsɔb Wina'am na tisi ya ka li aan ya faar la, o na tisi ya vʋ'ʋsʋm ya dataas banɛ giligi ya la wʋsa san'an ka ya na bɛ nɛ sumalisim. 11 Zin'ikanɛ ka ya Zugsɔb Wina'am na gaŋ ka o yʋ'ʋr na bɛ anina la, ani ka ya na mɔr dinɛ wʋsa ka m yɛli ya ye ya mɔri kena la maan dinɛ nyu'od bugum, nɛ malima banɛ bɛ, nɛ ya pʋʋr piiga, nɛ maan banɛ kpɛlim la, nɛ dinɛ wʋsa aan ya bʋn ka ya gaŋ ka zi'el nɔɔr ye ya tis Zugsɔb la. 12 Anina la, maalimi sumalisim ya Zugsɔb Wina'am la tuon, yanam nɛ ya biribis nɛ ya bipumis, nɛ ya sankpan'as dap nɛ pu'ab, nɛ Levi dim banɛ bɛɛ ya tempʋʋdin la, bɔzugɔ ba pʋ mɔri ba mɛŋ pʋʋr bɛɛ faarɛ. 13 Gu'usimi ka da maal maana dinɛ nyu'od la zin'ikanɛ wʋsa ka ya bɔɔda, 14 asɛɛ ka ya maal nɛ zin'ikanɛ ka Zugsɔb la na gaŋi ya buudi la dɔɔg yinne sʋ'ʋlimin la ma'aa. Mɛ gu'usimi man yɛli ya si'el la wʋsa.15 “La'am nɛ wala, ya tun'e kʋ bʋnkɔnbidi ya tempʋʋd la ni ɔnb yanamɛ bɔɔd ni'im si'a wʋsa, wʋʋ yanamɛ ɔnbid kɔɔng bɛɛ walig ni'im si'em la, ka li zem wʋʋ ya Zugsɔb Wina'am niŋi ya bareka si'em. Sɔ' wʋsa na tun'e ɔnb, onɛ an nyain maan pʋʋgin la bɛɛ onɛ ka' nyainnɛ. 16 Amaa da ɔnb nɛ ziim la, dɛŋin kpa'ae zikanɛ yi ni'imin la bas teŋin wʋʋ ku'om nɛ ka nyaan dʋgi ɔnb. 17 Amaa da kpɛm bɛ ya mɛŋ tɛɛns la nii dii ya pʋʋr piiga dinɛ an zʋʋd nɛ daam nɛ kpaam la ya tempʋʋdinɛ, bɛɛ ya niigi nɛ pɛ'ɛs bikpɛɛmnam la, bɛɛ linɛ wʋsa ka ya yɛli zi'el ye ya tis Zugsɔb la, nɛ ya ya'amlɛog maan nɛ piini linɛ bɛ wʋsa laa. 18 Amaa yanam nɛ ya bipumis nɛ ya biribis, nɛ ya sankpan'as dap nɛ pu'ab, nɛ Levi dim banɛ bɛɛ ya tempʋʋdin la na dii li nɛ ya Zugsɔb Wina'am tuon, zin'ikanɛ ka o na gaŋ la. Anina ka ya na maal sumalisim ya Zugsɔb Wina'am la tuon nɛ linɛ wʋsa ka ya nɔki ya nu'ugʋ tʋm. 19 Gu'usimi ka da tam Levi dim la yɛla yanamɛ bɛ teŋin la saŋsi'a wʋsa.
20 “Zugsɔb onɛ aan ya Wina'am la ya'a ti yaligi ya sʋ'ʋlim nwɛnɛ on zi'el si'em la, ka ya ti bɔɔd ni'im ka yɛl ye, ‘Ti bɔɔd ni'im ye ti ɔnb,’ suor bɛ ye ya na ɔnb yanamɛ bɔɔd si'em. 21 Zin'ikanɛ ka ya Zugsɔb Wina'am gaŋ ye o niŋ o yʋ'ʋr la ya'a lal, ya na tun'e kʋʋ ya niigi nɛ pɛ'ɛs banɛ ka Zugsɔb tisi ya la wʋʋ man yɛli ya si'em la. Ya mɛŋ tempʋʋdin la, ɔmmi yanamɛ bɔɔd si'em. 22 Ɔmmi nɛ ba, wʋʋ yanamɛ ɔnbid kɔɔng bɛɛ walig ni'im si'em la. Sɔ' wʋsa na tun'e ɔnb, onɛ an nyain maan pʋʋgin la bɛɛ onɛ ka' nyainnɛ. 23 Amaa baŋimi ka da ɔnb nɛ ziim la, bɔzugɔ, ziim la an nyɔvʋr la, ka li pʋ nar ye ya ɔnb ni'im la la'am nɛ li nyɔvʋr la. 24 Da ɔnb nɛ ziim la, dɛŋin kpa'ae zikanɛ yi ni'imin la bas teŋin wʋʋ ku'om nɛ ka nyaan dʋgi ɔnb. 25 Da ɔnbi nɛ lii, ka ala ka li na an sʋ'ʋŋa tisi ya, nɛ ya yaas banɛ na dɔlli ya nya'aŋ la, yanamɛ na tʋm nɛ linɛ an sʋm Zugsɔb la tuon la zug. 26 Amaa nɔkimi ya maan banɛ an Zugsɔb la din ka an kasi la, nɛ linɛ wʋsa ka ya pian' zi'el ye ya tis o la, mɔri keŋ zin'ikanɛ ka Zugsɔb na gaŋ la. 27 Mɔri ya maana dinɛ nyu'od la kɛɛn ya Zugsɔb Wina'am malʋŋ daka la ni na nyu'oe ni'im nɛ ziim la wʋsa ani. Ka kpa'ae maana la ziim dɛn'ɛli ya Zugsɔb Wina'am maan daka la amaa ya tun'e ɔnb ni'im la. 28 Gu'usimi ka dɔlis man tisi ya gban'asieba la, ala ka si'el wʋsa na an sʋ'ʋŋa tisi ya, yanam nɛ ya yaas banɛ dɔlli ya nya'aŋ la saŋa linɛ ka' naarɛ, bɔzugɔ, ya na tʋm linɛ an sʋm ka dɔl suor la ya Zugsɔb Wina'am la nindaan.”
Sa'alʋgʋ zaŋi ken bada maalʋgin
29 “Ya Zugsɔb Wina'am la na yis buudbanɛ bɛ teŋ kanɛ ka ya ye ya kpɛn' faaɛn ba teŋ la. Amaa ya ya'a ti kadi ba yis ka di'e ba teŋ la zin anina, 30 yanam gu'usim ka da kɛ ka ba wina la an linɛ na bɛndi ya, ka ya ti bu'osid ye buudbama da maannɛ ba wina la wala-wala? Tinam mɛ bɔɔd ye ti maal ala!” 31 Mid ka ya ti pʋ'ʋsi ya Zugsɔb Wina'am la wʋʋ ban niŋid si'em la, bɔzugɔ ba wina la malima la ni, ba maan si'elnam dinɛ an yɛlkisa dinɛ ka Zugsɔb la kis. Hali ba mɔri ba biribis nɛ ba bipumisi nyu'od bugum maan maana tisidi ba wina la.
32 Dɔlli man yɛli ya si'el la, da paas si'el bɛɛ ya yis si'ela.