Nɔŋim Zugsɔb la ka siak o nɔɔr
11
1 Ka Moses maligim yɛli ba ye, Nɔŋim Zugsɔb fʋ Wina'am ka dɔl o bɔɔdim, dɔl o zi'ela nɛ wada banɛ ka o tis la wʋsa. 2 Tɛnri zina ye, li ka' ya biis la ka m pian'adi tisida, bɔzugɔ ba da pʋ nyɛ ka baŋ Zugsɔb la yɛlaa, on zu'oe si'em nɛ o nu'ug kanɛ kpi'em nɛ o paŋ tita'ar la. 3 Ya biis la pʋ nyɛ zanbina banɛ ka o maal ka tʋm si'em Egipt teŋin ka li paae Na'ab Faaro nɛ o teŋgbauŋ la wʋsa, 4 bɛɛ on da niŋ Egipt soogianam nɛ ba widi nɛ ba zaba tɛrekonam si'em, bɛɛ on kɛ ka Atɛuk Zɛn'ug ku'om pili ba saŋkanɛ ka ba da kati dɔlli ya bugir la. Ka ya Zugsɔb la mɔr san'auŋ tita'ari kɛɛn ba zugin na, hali ti paae zina. 5 Li mɛ ka'anɛ ya biisi da nyɛ on da maal si'em tisi ya sian'arin la ti paae saŋa kanɛ ka ya paae kpɛla na laa, 6 bɛɛ on da niŋ Datan nɛ Abiram banɛ an Eliab biis ka an Reuben buudi ka teŋ da ya'ae Israel dim la sʋʋgin vɔli ba, ban nɛ ba yidim wʋsa nɛ ba sʋga nɛ bʋnvʋr linɛ wʋsa aan ba din la. 7 Ayei! Ka' ya biisɛ, amaa li da anɛ ya mɛŋ nini da nyɛ yɛltitada banɛ ka Zugsɔb maal la.8 Tɛnri nɔzi'ela banɛ ka m tisidi ya zina la, ala ka ya na mɔr paŋi keŋ kpɛn' teŋ kanɛ ka ya lɔ'ɔŋid Joodan ye ya keŋ sʋ'ʋg la. 9 Ala mɛn ka ya vʋm na yuug teŋ kanɛ ka Zugsɔb la pɔ tisi ya yaanam ye o na kɛ ka ban nɛ ba yaas di'e teŋ kanɛ pʋbid bin'isim nɛ siind la. 10 Ya pʋ nyɛ? Teŋ kanɛ ka ya kpɛn'ɛd ye ya sʋ'ʋg la ka' wʋʋ Egipt teŋin, zin'ikanɛ ka ya yina la. Zin'ikanɛ ka ya bʋdi ya bʋmbʋta ka dɔn'ɔnsidi ya mɛŋ nwɛnɛ zɛnma'asa lɔmbɔn'ɔg nɛ. 11 Amaa teŋ kanɛ ka ya lɔ'ɔŋid Joodan ye ya sʋ'ʋg la anɛ zuoya teŋ nɛ bɔn'ɔd zin'ikanɛ ka saa ku'om dɔn'ɔnsidi li. 12 Li anɛ teŋ kanɛ ka Zugsɔb onɛ aan ya Wina'am la guri li. Zugsɔb onɛ aan ya Wina'am la nini gɔsidi li, yʋʋm la pin'ilʋg ti paae li naar. 13 Ka ya ya'a sid siaki di'e nɔzi'ela banɛ ka m tisidi ya zina la, ka nɔŋi ya Zugsɔb Wina'am la ka tʋmmi tisid o nɛ ya sʋnf wʋsa nɛ ya siig wʋsa, 14 m na kɛ ka saa nii ya teŋin la sigir saŋa, sadɛɛŋ nɛ sabanɛ yuolim. Ka ya na bun zʋʋd sʋ'ʋŋa ka nyɛ daam nɛ kpaam. 15 M na kɛ ka mɔɔd bɛ sian'arin la ka ya niigi ɔnbid, ka yanam mɛ na diti tigid. 16 Mid ka ya kɛ ka ba ma'aa ya ka ya fɛndigi lɛbi dɔl winsieba ka iginid tuonnɛ pʋ'ʋsidi ba. 17 Ani ka Zugsɔb la sʋnf la na la'aŋ bugum ya yɛla, ka o na yɔ saazug ka saa kʋ ni ka ya nyɛ zʋʋdi bunɛ, ka ya na bɔdig teŋ sʋŋ kanɛ ka Zugsɔb tisi ya la ni tɔ'ɔtɔ.
18 Niŋimini m pian'ad nwa ya sʋnya nɛ ya pʋtɛnda ni. Lɔɔmini li ya nu'usin ka li an zanbina, ka lɔɔ ya gbɛ'ɛdin. 19 Pa'alimini ya biis; ya ya'a zin' yin yanam pian'amini li yɛla, ya ya'a ken suor zug bɛɛ ya ya'a digin bɛɛ ya ya'a duoe yanam pian'amini li yɛla. 20 Sɔm tabili ya dɔɔd za'anɔya ni nɛ ya yaŋa ni. 21 Ala ka yanam nɛ ya biis na nyɛ nyɔvʋwɔk teŋ kanɛ ka Zugsɔb la pɔɔ zi'el ye o tisi ya yaanam la ni. Ka ya na yuug wʋʋ agɔl nɛ teŋgbauŋʋ na kpɛn bɛ si'em la. 22 Ya ya'a sid tɛnr zi'ela banɛ ka m tisidi ya ye ya dɔlis, ka nɔŋi ya Zugsɔb Wina'am ka dɔl o suoya la wʋsa ka gban'e o kiŋ-kiŋ, 23 din ka Zugsɔb la na kad buudbama wʋsa yisi ya tuon. Ka ya na yis buudbanɛ zu'oe ka kpi'emi gati ya. 24 Yanamɛ nɔki ya nɔbiri zi'el zin'isi'a wʋsa la na anɛ ya din. Ya sʋ'ʋlim na yi sian'arin la paae Lebanon, ka yi Efiritis kɔldaugin la paae Atɛuk kanɛ bɛ tuon la. 25 Sɔ' kae na nyaŋi zab nɛ ya. Zugsɔb onɛ aan ya Wina'am zi'el nɔɔr si'em la, o na kɛ ka teŋ la dim wʋsa zɔti ya dabiem yanamɛ keŋ zin'isi'a wʋsa.
26 Gɔsimiya, m nɔk albareka nɛ nɔpɔɔri zi'eli ya tuon zina. 27 Ya ya'a siaki ya Zugsɔb Wina'am nɔzi'ela banɛ ka m tisidi ya zina la, ya na nyɛ albareka. 28 Amaa ya ya'a zan'asi ya Zugsɔb Wina'am nɔzi'ela la, ka fɛndigi yi suokanɛ ka m tisi ya zina la ni, ka dɔl winsieba banɛ ka ya zi' baa, ya na nyɛ nɔpɔɔr. 29 Zugsɔb onɛ aan ya Wina'am la ya'a ti mɔri ya kpɛn' teŋ kanɛ ka ya bɔɔd kpɛn'ɛb la, ya na niŋ Gerizim Zuor la albareka ka pɔ nɔpɔɔri niŋ Ebal zuor la. 30 Ya pʋn mi' zuoya nwa yɛla: ye ya ya'a lɔ'ɔŋ Joodan n keŋ tuonnɛ lɛbis winnigi lit zin'isi'a la, ya na paae ba. Ba bɛ Keenan dim banɛ bɛ Araba sʋ'ʋlimin la, ka kpi'e Morih tititada, nɛ Gilgal teŋ la. 31 Ya bɔɔdi Joodan lɔ'ɔŋiri la, ka na sʋ'ʋg teŋ kanɛ ka Zugsɔb onɛ aan ya Wina'am tisidi ya la. Ya ya'a ti di'e li ka bɛɛ ani, 32 baŋimi sʋ'ʋŋa ye ya na siak wada nɛ gban'abanɛ ka m zi'eli ya tuon zina la.