Kuglamma banɛ nwɛnɛ yiiga kuga la
10
1 Saŋkan la ka Zugsɔb la yɛlim ye, “Kpi'em kuglamma ayi' wʋʋ yiiga bʋnam la, ka dʋ zuor la zug na. Nɔkim daadi maal daka. 2 Ka m na sɔb kuglamma la ni, pian'abanɛ daa bɛ yiiga kuglamma la ni ka fʋ nwa'ae la. Ka fʋ na nɔki li niŋ daka la ni.” 3 Ala ka m nɔk gun'a tiig daadi maal daka, ka kpi'a kuglamma ayi' ka ba nwɛnɛ banɛ ka m daa kpi'a yiiga la. Ka m dʋ zuor la zug ka kuglamma la bɛɛ m nu'usin. 4 Ka Zugsɔb la sɔb pian'abanɛ ka o da dɛŋi sɔb la nɔɔ kugban zugʋ tisim. Zi'ela piiga banɛ ka o da pian' tisi ya zuorin la. Daakanɛ ka ya la'as ka o pian'ad ka li yit bugumini tisidi ya la. 5 Ani ka m naam zuor la zugʋ lɛbi sig teŋin na, ka nɔk kuga la niŋ daka kanɛ ka m maal la ni, nwɛnɛ Zugsɔb la yɛlim si'em la, ka ba nam kpɛm bɛɛ li ni nannanna.6 (Ka Israel dim bɛ Jaakan dim bulisin la ka dʋʋ keŋ Mosera teŋin. Ani ka Aaron kpi ka ba mum o ka o biig Eleazar di'e o zin'igi an maanmaan. 7 Ka ba naanɛ ani keŋ Guduguda ka lɛn gaadi paae Jotabat teŋ kanɛ mɔr kɔldaad ka ku'om bɛ la. 8 Saŋkan la ka Zugsɔb la gaŋ Levi dim buudi la ma'aa ye ba zi Zugsɔb Nɔnaar Daka la, ka zi'en Zugsɔb la tuonnɛ tʋm o tʋʋma ka zaŋid o yʋ'ʋri niŋid nidib la albareka wʋʋ ban niŋid si'em zina la. 9 Dinɛ kɛ ka Levi dim la pʋ mɔr pʋʋr bɛɛ faari ba ba'abiis la sʋʋgin la. Zugsɔb la aan ba faar wʋʋ ya Zugsɔb Wina'am yɛli ba si'em la.)
10 “M da bɛ zuor la zug nɛ dabpisnaasi yʋ'ʋŋ nɛ nintaŋ, nwɛnɛ man da dɛŋi niŋ si'em la. Ka Zugsɔb la lɛn kɛlisi m pian'ad saŋa kaŋa ya'as ka siak ye o kʋ kʋʋ ya. 11 Zugsɔb la yɛlim ye, ‘Kem gaad nidib la tuon ka ba keŋ paae kpɛn' sʋ'ʋg teŋ la wʋʋ man pɔɔ zi'el si'em ye m na tisi ba yaanam la.’ ”
Mɔr zɔtim nɛ Zugsɔb la
12 Nannanna Israel dima, ya Zugsɔb Wina'am la pʋ bɔɔd si'eli ya san'anɛ gaad yanamɛ na gi'ig o ka dɔlis o suoya la wʋsa, ka nɔŋ o ka tʋmmi tisidi ya Zugsɔb Wina'am la nɛ ya sʋnf wʋsa, nɛ ya siig wʋsa, 13 ka tɛnr Zugsɔb la zi'ela nɛ o gban'ar linɛ ka m tisidi ya zina la ka li anɛ linɛ na an sʋm tisi ya la. 14 Zugsɔb onɛ aan ya Wina'am la sʋ'oe arezana ka lɛn sʋ'oe saazug nɛ teŋgbauŋ nɛ dinɛ bɛɛ li pʋʋgin wʋsa. 15 La'am nɛ wala, Zugsɔb la pa'al o nɔŋilim an si'em nɛ ya yaanam, ka nɔŋi ba ka gaŋ yanam banɛ aan ba yaas la, ka kɛ buudbanɛ kpɛlim la wʋsa, nwɛnɛ lin an si'em zina la. 16 Dinzugɔ pieminɛ ya sʋnya ka da lɛm mɔri tʋbzian'asim ya'asɛ. 17 Bɔzugɔ, Zugsɔb onɛ aan ya Wina'am la anɛ wina wʋsa Wina'am nɛ zugsɔbnam Zugsɔb. O anɛ Wina'am tita'ar, o mɔr paŋ ka mɔr zɔtim, o pʋ mɔr baregaŋ ka di'ed sɔ' si'el on na sʋŋ o la zugɔ. 18 O zabid kpiibis nɛ pʋkɔnya yɛla, o nɔŋ onɛ an saan ka tisid o diib nɛ fuud. 19 Li nar ye yanam mɛ nɔŋ banɛ an saam bɔzugɔ, yanam mɛŋ da anɛ saam Egipt teŋin. 20 Siakim Zugsɔb la nɔɔr ka tʋm tis o. Gban'ami nɛ o nu'us ayi' ka ya nɔpɔɔr na anɛ Zugsɔb la yʋ'ʋrin. 21 Zun'omin o ka o anɛ ya Wina'am onɛ tʋm nyalim titada banɛ mɔr dabiem ka ya mɛŋ nini nyɛ la. 22 Ya yaanam banɛ da keŋ Egipt teŋin la da anɛ pisyɔpɔi ma'aa, amaa nannanna Zugsɔb onɛ aan ya Wina'am la kɛya ka ya wiaki nwɛnɛ nwadbibis banɛ bɛ saŋgbauŋin la.