Li ka' Israel pʋpielim zugɔ
9
1 Moses maligim yɛli ba ye, “Yanam Israel dima, kɛlisimi, ya yʋ'ʋn bɔɔd nɛ Joodan lɔ'ɔŋiri la ka na sʋ'ʋg buudbanɛ zu'oe ka kpi'emi gati ya, ka tempʋʋd la mɔr zaŋguoma ka li wa'ami paae saŋgbana la. 2 Nidib la wa'am ka mɔr paŋ, ba anɛ Anak dim gandaad. Ya mi' ba yɛla ka wʋmi ba yɛla ye, ‘Anɔ'ɔnɛ bɛ na nyaŋi zab Anak dim la?’ 3 Amaa mɔri ti'ir zina ye, Zugsɔb onɛ aan ya Wina'am la na lɔ'ɔŋi gaadi ya tuon nwɛnɛ bugum kanɛ dit nɛ. O na san'ami ba, ka na nyaŋi ba tisi ya. Ka ya na kadi ba yis ka san'ami ba tɔ'ɔtɔ, nwɛnɛ Zugsɔb la tisi ya nɔɔr si'em la.” 4 Zugsɔb onɛ aan ya Wina'am la ya'a ti kadi ba yisi ya san'an, yanam da tɛn'ɛsi ya pʋtɛn'ɛrin ye, “Li anɛ ti pʋpielim zug ka Zugsɔb mɔri ti na ye ti sʋ'ʋg teŋ la.” Ayei, li anɛ nidib la an nimbɛ'ɛdnam din ka Zugsɔb la kadi ba yisi ya san'an. 5 Li ka' ya pʋpielim bɛɛ ya sʋ'ʋm zug ka ya na di'e ba teŋ la, amaa li anɛ tɛɛns la nidibi an nimbɛ'ɛdnam la zug, Zugsɔb onɛ aan ya Wina'am la na kadi ba yisi ya tuon, ka kɛ ka on da pɔ si'em zi'eli ya yaanam Abraham nɛ Isaak nɛ Jakob la niŋ amɛŋa. 6 Gban'aminɛ li gbin ye, li ka'anɛ ya pʋpielim zug ka Zugsɔb onɛ aan ya Wina'am la tisidi ya teŋ sʋŋ la ye ya sʋ'ʋgɛ, ya pʋn anɛ nimbanɛ ka ya tʋba zian'as.Sanlim na'apɔl la yɛla
7 Tɛnri ka da tam yanamɛ da niŋ si'em sian'arin ka Zugsɔb onɛ aan ya Wina'am sʋnf pɛlig nɛ ya la. Din yi dabiskanɛ ka ya yi Egipt ti paae kpɛla na la, ya kʋdim zan'asid nɛ Zugsɔb la nɔɔr. 8 Horeb zuorin la, ya da kɛya ka Zugsɔb la sʋnf duoe ka o sʋnf san'am hali ka o ye o san'ami ya. 9 Man da dʋ zuor zug ye m di'e kuglambanɛ da an nɔnaar ka Zugsɔb naal nɛ ya la, m da bɛ zuor la zug dabisa pisnaasi, yʋ'ʋŋ nɛ nintaŋ ka pʋ di si'el bɛɛ nu ku'om. 10 Zugsɔb la da tisim kuglamma ayi' dinɛ ka Wina'am mɛŋ nu'ug sɔb. Ba zug ka Zugsɔb la da yɛli ya nɔzi'elsi'a bugumin zuor zug la da bɛ; daakanɛ ka ya da la'as la. 11 Dabpisnaasi yʋ'ʋŋ nɛ nintaŋ wʋsa la nya'aŋ, ka Zugsɔb la tisim kuglamma ayi' dinɛ an nɔnaar kuga la. 12 Ani ka Zugsɔb la yɛlim ye, “Duom sig tɔ'ɔtɔ bɔzugɔ, fʋ nimbanɛ ka fʋ mɔri ba yi Egipt na la zan'as nɛ ka tʋm bɛ'ɛd. Ba fɛndigi yi man zi'el nɔɔr si'em tisi ba la tɔ'ɔtɔ, ka maal ba'ari tisi ba mɛŋ.” 13 Zugsɔb la da lɛn yɛlim ye, “Man nyɛ nimbama ka ba tʋbir sid zian'as hali. 14 Basim ka m san'ami ba, ka yisi ba yʋ'ʋr dunia nwa ni, ka kɛ ka fʋ gbin la lieb buudtita'are mɔr paŋ hali ka wiaki gaad ban an si'em la.” 15 Ala ka m naam zuor la zugʋ sig na saŋkan ka bugum la nan dit zuor la zug. Ka kuglamma ayi' dinɛ an nɔnaar la bɛɛ m nu'usin. 16 Man gɔs la, m nyɛ ka ya tʋm bɛ'ɛdi pɔ'ɔgi ya Zugsɔb Wina'am la. Ya maal ba'ar ka o nwɛnɛ na'apɔl nɛ tisi ya mɛŋ. Ya fɛndig tɔ'ɔtɔ ka bas suokanɛ ka Zugsɔb zi'eli tisi ya la. 17 Ala ka m nɔk kuglamma ayi' la lɔbi bas teŋin ka li nwa'asi ya nini ni. 18 Ka m vanbin Zugsɔb la tuon dabisa pisnaasi, yʋ'ʋŋ nɛ nintaŋ wʋsa ya'as, ka pʋ di diibɔ ka mɛ pʋ nu ku'om, ka li anɛ ya tʋʋmbɛ'ɛd banɛ wʋsa ka ya tʋm la zug. Ya tʋm bɛ'ɛd Zugsɔb la tuon, ka kɛ ka o sʋnf pɛlig nɛ ya. 19 M da zɔti dabiem ka kirid Zugsɔb la sʋnpɛɛn zug. O sʋnf da pɛligi siak on na san'ami ya. Amaa ka Zugsɔb la lɛn kɛlisi m sɔsʋg. 20 Ka Zugsɔb la sʋnf pɛligi sia'al on na san'am Aaron, amaa ka m sɔsi tis Aaron mɛn saŋkan la. 21 M mɛ da lɛn nɔk bʋnkanɛ aan ya tʋʋmbɛ'ɛd la, dinɛ an na'apɔl kanɛ ka ya maal la, nyu'oe nɛ bugum. M nwa'asi li nɛɛm ka li lieb zɔm nwɛnɛ titanbʋʋlʋg nɛ, ka nɔki li lɔb ku'om dinɛ pʋbidi sigid zuorin la. 22 Ya da lɛn kɛ ka Zugsɔb la sʋnf pɛlig Tabera nɛ Masa nɛ Kibrof-Hataava tɛɛnsin la. 23 Zugsɔb la da kɛ ka ya yi Kades Banɛa teŋin la, o yɛli ya ye, “Kem sʋ'ʋgi teŋ kanɛ ka m tisi ya la.” Amaa ya zan'as Zugsɔb onɛ aan ya Wina'am la nɔzi'elʋg. Ya pʋ tis o sida bɛɛ ya siak o nɔɔrɛ. 24 Ya pʋn dɛŋi zan'as Zugsɔb la nɔɔr man pin'ili baŋi ya sa. 25 M da vanbin Zugsɔb la tuon dabisa pisnaasi, yʋ'ʋŋ nɛ nintaŋ wʋsa la nɛ Zugsɔb la na san'ami ya la zug, 26 ka m sɔs Zugsɔb la ka yɛl ye, “Zugsɔb Paŋtita'ar Sɔba, da san'ami fʋ nidib la, banɛ an fʋ faar ka fʋ faaɛn ba nɛ fʋ mɛŋ paŋ tita'ar ka mɔri ba yis Egipt na nɛ fʋ nu'ug kanɛ mɔr kpi'euŋ la. 27 Tɛnri fʋ yammis, Abraham nɛ Isaak nɛ Jakob yɛla. Da gɔsid nimbama tʋbpʋwʋmnim la, ba bugusim nɛ ba tʋʋmbɛ'ɛd la yɛlaa. 28 Ya'a ka' ala, teŋgbauŋ kanɛ ka fʋ mɔri ti yina la dim na yɛl ye, ‘Zugsɔb la pʋ nyaŋi mɔri ba paae teŋ kanɛ ka o zi'el nɔɔr ye o mɔri ba keŋ la, on kisi ba la zug, ka o mɔri ba kɛn sian'arin na ye o kʋʋ ba.’ 29 Amaa ba anɛ fʋ nidib, fʋ faar kanɛ ka fʋ tiɛn fʋ nu'utita'ar nɛ paŋi mɔri ba yisi anina na la.”