Da tam Zugsɔb la yɛlaa
8
1 Moses da yɛl Israel dim la ye, “Gu'usimi ka dɔlis nɔzi'elʋg kanɛ wʋsa ka m tisidi ya zina la, ala ka ya na vʋe ka nɔbig ka na kpɛn' sʋ'ʋg teŋ kanɛ ka Zugsɔb onɛ aan ya Wina'am da pɔɔ zi'eli ya yaanam la. 2 Tɛnri Zugsɔb onɛ aan ya Wina'am la da mɔri ya dɔlis suosi'a sian'arin yʋma pisnaasi la. O da bɔɔd ye o kɛ ka ya sie ya mɛŋ, ka kpansi ya baŋ dinɛ bɛɛ ya pʋtɛn'ɛrin, ka gɔs ye ya na dɔl o nɔzi'ela la bɛɛ ya kʋ dɔlla. 3 O da sie ya nɛ, ka kɛ ka kɔ'ɔm mɔri ya ka o diisi ya nɛ manna dinɛ ka yanam nɛ ya yaanam da zi' li. O da niŋ ala ye o pa'ali ya ye, ninsaal pʋ vʋe nɛ diib yɛla ma'aanɛ, amaa nɛ pian'akanɛ wʋsa yit Wina'am nɔɔrin na. 4 Yʋma pisnaasi nwa pʋʋgin, ya fuud pʋ kpii ka ya nɔba mɛ pʋ mɔdɛ. 5 Baŋimi ya sʋnya ni ye, ninsaali san'anɛ o biig si'em la, ala ka Zugsɔb onɛ aan ya Wina'am mɛ san'anɛ ya. 6 Dinzugɔ tɛnri Zugsɔb onɛ aan ya Wina'am nɔzi'ela la ka dɔlisid o suoya la ka zɔt o. 7 Zugsɔb onɛ aan ya Wina'am la mɔri ya keŋ teŋ sʋŋin, teŋ kanɛ mɔr kɔlis nɛ bulis, ka ku'om tansidi yit bɔn'ɔdin nɛ kʋkʋna zut, 8 teŋ kanɛ ka ki nɛ mui buudi wʋsa du'ad sʋ'ʋŋa, ka tiwanna buudi wʋsa bɛ ka wan wala sʋ'ʋŋa, ka li mɔr olif kpaam nɛ siind, 9 teŋ kanɛ ka kɔ'ɔm kʋ bɛɛ, ka si'el kʋ pɔ'ɔgi yaa, teŋ kanɛ ka tampiins la mɔr kʋnt ka ya na nyaŋi tu kʋntzɛn'ug kʋkʋna ni la. 10 Ya ya'a ti dii tig, yanam pʋ'ʋsim Zugsɔb onɛ aan ya Wina'am la bareka on tisi ya teŋ sʋŋ la. 11 Mid ka ya tam Zugsɔb onɛ aan ya Wina'am la yɛla nɛ o zi'ela nɛ wada nɛ o gban'ar dinɛ ka m tisidi ya zina nwa la. 12 Ya'a ka' ala, ya ya'a ti dii tig ka mɛ' ya' sʋma yʋ'ʋn zin'in, 13 ka ya niigi nɛ ya kɔnbid ya'a ti nɔbig, ka ya sanlima nɛ anzurifa ya'a yʋ'ʋn ti zu'oe, ka yanamɛ mɔr si'el wʋsa paas, 14 ani ka ya na dʋ'ʋsi ya mɛŋ ka tam Zugsɔb onɛ aan ya Wina'am, ka mɔri ya yi Egipt teŋ kanɛ ka ya da an sankpan'asnam la na yɛla. 15 O mɔri ya yi sian'akanɛ yalim ka mɔr dabiem la zin'igin na, teŋ kanɛ ka ku'om kae ka ku'onuud bɛ hali la, zin'ikanɛ ka wa'abɛ'ɛdnam nɛ namis bɛ la, ka o kɛ ka ku'om yi tampiingin na tisi ya. 16 O da tisi ya manna sian'arin la ka ya di, dinɛ ka ya yaanam zi'. O da niŋi ala ye o kpansi ya ka ya sie ya mɛŋ, ka li naarin la, si'el wʋsa na an sʋ'ʋŋa tisi ya. 17 Daasi'erɛɛ ya na ti tɛn'ɛs ye, ‘Ti nɔki ti mɛŋ nu'us nɛ ti paŋi tʋm nyɛ kpan'am nwa.’ 18 Amaa tɛn'ɛsimi ye, Zugsɔb onɛ aan ya Wina'am la tisi ya paŋ ka ya nyɛ kpan'am la. O niŋ nɛ'ɛŋa ye on da pɔ nɔɔrɛ zi'eli ya yaanam la niŋi amɛŋa wʋʋ din an si'em zina la. 19 Ya ya'a ti tam Zugsɔb onɛ aan ya Wina'am la ka dɔl winsieba iginid teŋin pʋ'ʋsidi ba; m dit nɛ kasɛta tisidi ya zina ye, ya na san'am. 20 Nwɛnɛ buudbanɛ bɛɛ ya tuon ka Zugsɔb san'ami ba si'em la, ala ka o mɛ na san'ami ya, yanamɛ zan'as Zugsɔb Wina'am nɔɔr la zug.”