Zugsɔb na kad nidib la yis
7
1 Moses da yɛl Israel dim la ye, “Zugsɔb onɛ aan ya Wina'am la na mɔri ya kpɛn' teŋ kanɛ ka ya bɔɔd kpɛn'ɛb la, ka na kad buudbanɛ bɛɛ ani la wʋsa: nwɛnɛ Hitti dim nɛ Girgas dim nɛ Amor dim nɛ Keenan dim nɛ Perizi dim nɛ Hivi dim nɛ Jebus dim la, buudi ayɔpɔi banɛ zu'oe ka kpi'emi gati ya la. 2 Ka Zugsɔb onɛ aan ya Wina'am la ya'a ti nɔki ba niŋi ya nu'usin ka ya nyaŋi ba, asɛɛ ka ya kpɛn san'ami ba nyain. Da maal nɔnaar nɛ ba, bɛɛ ya zɔɔ ba nimbaanliga. 3 Da kulini ba bɛɛ ya dii baa. Da nɔki ya bipumisi tisi ba biribis bɛɛ ya nɔki ba biribisi tisi ya bipumisɛ, 4 ka ba na kɛ ka ya biribis la fɛndig ka kʋ dɔlli ya Zugsɔb la, ka na pʋ'ʋsid winsieba. Ka Zugsɔb sʋnpɛɛn na kanbi ya ka san'ami ya tɔ'ɔtɔ. 5 Yanamɛ na niŋi ba si'em nwa: Nwa'amini ba winpʋ'ʋsʋg bimbima la, ka nwa'a ba teŋgban kuga la, ka kɔ' Asera daad la, ka nyu'oe ba bada wʋsa nɛ bugum. 6 Ya anɛ nimbanɛ an kasi tis Zugsɔb onɛ aan ya Wina'am la. Zugsɔb onɛ aan ya Wina'am la gaŋi ya yis nidib bɛdegʋ sʋʋgin dunia nwa ni, ka ya aan o nyɔɔrin kɔnbʋg. 7 Zugsɔb la nɔŋi ya ka gaŋi ya ka li ka'anɛ ye ya zu'onɛ gaad nimbanɛ kpɛlim la. Bɔzugɔ yanamɛ lɛɛ pɔɔd hali nidib la sʋʋgin. 8 Amaa li anɛ Zugsɔb la nɔŋi ya ka pʋ tammid nɔzi'elʋg dinɛ ka o da pɔɔ tisi ya yaanam la zug ka o mɔri ya yis nɛ o nu'ug kanɛ mɔr kpi'euŋ ka faaɛn ya yis teŋ kanɛ ka ya da an sankpan'asnam la nɛ Egipt Na'ab Faaro nu'usin. 9 Baŋimi ye Zugsɔb onɛ aan ya Wina'am la an Wina'am; o anɛ sida Wina'am ka pɛ'ɛnnɛ o nɔŋilim nɔnaar la sʋ'ʋŋa nɛ nimbanɛ nɔŋ o ka dɔl o nɔzi'ela la hali ti paae zʋmana nidib tusa-tusa. 10 Amaa banɛ kis o la, o na yɔɔ ba nɛ san'auŋ; o na yɔ banɛ kis o la tɔ'ɔtɔ ka ba nini nyɛ. 11 Dinzugɔ, gu'usimi ka dɔlis m nɔzi'ela nɛ m wada nɛ gban'abanɛ ka m tisi ya zina la.”Wada la dɔllim mɔr albareka
12 Ya ya'a kɛlis wada nwa ka dɔlli ba sʋ'ʋŋa, ala ka Zugsɔb onɛ aan ya Wina'am la na dɔlis o nɔŋilim nɔnaar dinɛ ka o da pɔɔ zi'eli ya yaanam la. 13 O na nɔŋi ya ka niŋi ya bareka ka kɛ ka ya zu'oe. O na niŋi ya du'am nɛ ya bʋmbʋta nɛ ya zʋʋd nɛ ya daam nɛ kpaam nɛ ya niigi nɛ ya pɛ'ɛs du'am bareka teŋ kanɛ ka o pɔɔ zi'eli ya yaanam ye o tisi ya la ni. 14 Ya na mɔr albareka gaad nimbanɛ bɛ la wʋsa. Dau bɛɛ pu'a kʋ bɛɛ ya sʋʋgin ka kɔ'ɔŋ biiga, ka ya bʋnkɔnbid wʋsa na du'a biis. 15 Zugsɔb la kʋ kɛ ka wiim gban'e ya, bɛɛ ban'abɛ'ɛd banɛ ka ya da mi' Egipt teŋin la gban'e ya, amaa o na kɛ ka li gban'e banɛ kisi ya la wʋsa. 16 Asɛɛ ya san'am nimbanɛ wʋsa ka Zugsɔb onɛ aan ya Wina'am nɔki niŋi ya nu'usin la. Da gɔsi nɛ ba nɛ nimbaanliga, mɛ da maalinɛ ba wina la, ka li na an wʋʋ baŋi gban'e ya. 17 Daasi'erɛɛ ya na yɛl ye, “Buudbama kpi'emi gati ti, ti na niŋ wala kadi ba yisɛ? 18 Amaa da zɔti nɛ ba dabiem, tɛnri Zugsɔb onɛ aan ya Wina'am la da niŋ Faaro nɛ Egipt dim wʋsa si'em la. 19 Ya mɛŋ nini nyɛ maktitada nɛ zanbina banɛ an nyalima nɛ kilima la, nɛ Zugsɔb onɛ aan ya Wina'am la da tiɛn o nu'utita'ar nɛ paŋi mɔri ya yis anina na si'em la. Zugsɔb onɛ aan ya Wina'am la na niŋi ala mɛn nɛ buudbanɛ ka ya zɔti ba zina la. 20 Hali Zugsɔb onɛ aan ya Wina'am la na kɛ ka tangbɛɛnlnam sigi ba sʋʋgin na tɔɔn ba hali ka banɛ nyaŋi vʋ'ʋg ka su'a ya sʋʋgin la ti bɔdig. 21 Da kɛ ka ya ya'am ian'adi ba yɛlaa, ka Zugsɔb onɛ aan ya Wina'am onɛ bɛɛ ya sʋʋgin la anɛ Wina'am Tita'ar nɛ bʋnzɔtir. 22 Zugsɔb onɛ aan ya Wina'am la na kad buudbanɛ bɛɛ ya tuon la bi'el-bi'el. O kʋ kɛ ka ya kpɛn li' ba wʋsa saŋa yinnee, ya'a ka' ala sian'anr bʋnkɔnbid na nɔbigi gɛɛli ya. 23 Amaa Zugsɔb onɛ aan ya Wina'am la na nɔki ba tisi ya, ka kɛ ka ba ya'am fɛndigi ti paae saŋkanɛ ka ba na san'am naae. 24 O na nɔki ba na'anamɛ niŋi ya nu'usin, ka ya na yisi ba yʋ'ʋr dunia nwa ni. Sɔ' kae na duoe zi'en ye o zab nɛ ya, hali nɛ yanamɛ na ti san'ami ba wʋsaa naae. 25 Ba wina banɛ ka ba maal la, ya na nyu'oe ba nɛ bugum. Da mɔri ya'amlɛog nɛ anzurifa nɛ sanlima linɛ bɛ wina la ni la, ka mɛ da nɔk ye ya sʋ'oe ya, ka li na an wʋʋ baŋi bɛndi ya, bɔzugɔ Zugsɔb onɛ aan ya Wina'am la kisʋgʋ la. 26 Da mɔr dinɛ an bʋnkisa kpɛn' ya yaan na, ya'a ka' ala, ba na san'ami ya wʋʋ ban san'ami ba si'em la. Asɛɛ ka ya kisigi ba nyain, bɔzugɔ ba yisi ba zi'el ye ba san'ami ba.”