Nɔŋimi fʋ Zugsɔb Wina'am la
6
1 Moses da maligim yɛl Israel dim la ye, “Nɛ'ɛŋa an nɔzi'ela nɛ wada ka Zugsɔb onɛ aan ya Wina'am la yɛl ye m pa'ali ya; ka ya na dɔlisidi li wʋsa, yanamɛ lɔ'ɔŋid Joodan ye ya sʋ'ʋg teŋ si'a la. 2 Ala ka yanam nɛ ya biis nɛ ya yaas na zɔt Zugsɔb onɛ aan ya Wina'am la ya nyɔvʋr bɛn wʋsa. Ya ya'a dɔlis nɔzi'ela nɛ wada banɛ ka m tisi ya la, ala ka ya na nyɛ nyɔvʋwɔk. 3 Dinzugɔ, yanam Israel dima, kɛlisimi! Gu'usimi ka siak, ka ala ka li na an sʋ'ʋŋa tisi ya, ka ya na nɔbigi zu'oe teŋ kanɛ pʋbid bin'isim nɛ siind la ni, nwɛnɛ Zugsɔb onɛ an ya yaanam Wina'am la zi'el nɔɔr si'em tisi ya la.4 “Israel dima, kɛlisimi. Ti Zugsɔb Wina'am anɛ Zugsɔb yinne. 5 Nɔŋimi fʋ Zugsɔb Wina'am nɛ fʋ sʋʋnr wʋsa, nɛ fʋ siig wʋsa, nɛ fʋ ya'am wʋsa, nɛ fʋ paŋ wʋsa. 6 Nɔzi'ela banɛ ka m tisidi ya zina la anɛ linɛ na bɛɛ ya sʋnya ni. 7 Zaŋiminɛ ba pa'ali ya biis. Pian'amini li yɛla ya ya'a ti zin' ya yaan, nɛ ya ya'a ti ken suor zug, nɛ ya ya'a ti digi nɛ yanamɛ na ti duoe. 8 Lɔɔmi li ya nu'usin ka li an zanbina, ka lɔɔ li ya gbɛ'ɛdin. 9 Sɔm niŋini ya dɔɔd za'anɔya ni nɛ ya yaŋa ni.”
Banɛ pʋ siakid la sa'alʋg
10 “Zugsɔb onɛ aan ya Wina'am la ya'a ti mɔri ya kpɛn'ɛs teŋ kanɛ ka o da pɔɔ zi'eli ya yaanam Abraham nɛ Isaak nɛ Jakob ye o tisi ya la, teŋ kanɛ ka tempʋbɛda bɛ linɛ ka ya mɛŋ pʋ mɛɛ, 11 nɛ ya' sʋma banɛ ka la'asʋma pɛ'ɛl ka li ka'anɛ yanamɛ iee li kpɛn'ɛsɛ, nɛ bulis banɛ ka ya pʋ tuu, nɛ olif tiis pɔɔd nɛ olif tiis banɛ ka ya pʋ sɛɛ. Ka ya ya'a ti dii tig, 12 yanam gu'usim ka da tam Zugsɔb onɛ yisi ya Egipt teŋin la yɛllɛ; teŋ kanɛ ka ya da an yammis la. 13 Zɔmini ya Zugsɔb Wina'am la gʋllim ka tʋm tis o, ka o yʋ'ʋr ma'aa ka ya na zaŋi pɔ nɔɔri zi'el. 14 Da dɔlli winsieba, nwɛnɛ wina banɛ ka nimbanɛ giligi ya maan la. 15 Bɔzugɔ, Zugsɔb onɛ aan ya Wina'am kanɛ bɛ nɛ ya la anɛ nyʋʋr sɔb, ka o sʋnpɛɛn na la'aŋi ya wʋʋ bugum nɛ, ka o na san'ami ya teŋgbauŋ kaŋa zugin. 16 Mid ka ya maki ya Zugsɔb onɛ aan ya Wina'am la, nwɛnɛ yanamɛ da niŋ Masa teŋin si'em la. 17 Asɛɛ ya dɔlis Zugsɔb onɛ aan ya Wina'am nɔzi'ela nɛ o wada banɛ ka o zi'eli tisi ya la. 18 Tʋmmi linɛ dɔl suor nɛ dinɛ an sʋm Zugsɔb la tuon ka si'el wʋsa na an sʋm tisi ya. Ka ya na kpɛn' di'e teŋ sʋŋ kanɛ ka Zugsɔb da pɔɔ zi'eli ya yaanam la, 19 ka na kadi ya dataas wʋsa nwɛnɛ Zugsɔb la yɛl si'em la.”
Du'adib sa'alimi ba biis
20 Li ya'a ti paae saŋa si'a ka fʋ biig bu'osif ye, “Zi'ela nɛ wada banɛ ka Zugsɔb onɛ aan ti Wina'am zi'eli tisi ya la gbin an bɔ?” 21 Yɛlim o ye, “Ti da anɛ Na'ab Faaro yammis Egipt teŋin, amaa Zugsɔb la da nɔk nɛ o nu'ug kanɛ mɔr kpi'euŋ la yisi ti Egipt na. 22 Ti nini ni ka Zugsɔb la tʋm nyalima nɛ kilima ka maal zanbina nɛ bʋnnyalima, ka tʋm tʋʋmnyalima nɛ yɛltɔɔd Faaro nɛ o yidim sʋʋgin, 23 ka da mɔri ti yis anina na, ka tisi ti teŋ kanɛ ka o da pɔ zi'eli ti yaanam la. 24 Zugsɔb la tisi ti nɔɔr ye ti siak zi'elbama wʋsa ka zɔti ti Zugsɔb Wina'am la, ala ka ti na paam si'el wʋsa ka vʋe nwɛnɛ tinamɛ bɛ si'em zina nwa la. 25 Ka ti ya'a gu'usid ka dɔlisid o wada bama wʋsa ti Zugsɔb onɛ aan ti Wina'am la tuon nwɛnɛ on zi'el si'em tisi ti la, di na anɛ pʋpielim tisi ti.”