Moses n da maal nɔzi'elʋg kuga si'em ya'as
34
1 Ka Zugsɔb yɛl Moses ye, “Kpi'em kuglamma ayi' wʋʋ yiiga bʋnam la nɛ, ka m na lɛn sɔb pian'abanɛ daa bɛɛ ba zug ka fʋ nwa'ae la. 2 Ti'ebim ka bɛog ka fʋ dʋ Sinai Zuor la zug na zaŋi fʋ mɛŋi pa'alim. 3 Da kɛ ka sɔ' dɔlli fʋ kenaa bɛɛ pʋn li'el zuor la gbinnɛ, hali bʋnkɔnbid da ɔnb yaamaa anina babaa.” 4 Ka Moses kpi'a kuglamma ayi' ka ba nwɛnɛ banɛ ka m daa kpi'a yiiga la, ka duoe bɛogʋn dʋ Sinai Zuor la zug wʋʋ Zugsɔb la yɛl si'em la, ka mɔr kuga la o nu'usin. 5 Ka Zugsɔb la saŋgbauŋ sig na zi'enɛ o san'an, ka o buol o mɛŋ yʋ'ʋr ye, Zugsɔb ka Moses bɛɛ o san'an. 6 Ka o dɔl Moses tuonnɛ gaad ka yɛl ye,“Manɛ an Zugsɔb la, manɛ an Zugsɔb la!
M anɛ Wina'am onɛ an nimbaanlzɔɔr sɔb ka zɔt saalib nyɔɔg.
M anɛ baanlimm ka m sʋnf pʋ duod tɔ'ɔtɔɔ,
ka m nɔŋilim nɛ sida ka' naarɛ.
7 M pa'annɛ m nɔŋilim tisidi m nidib baa li ya'a anɛ yʋma tusirɛ,
ka kɛti ba tʋʋmbɛ'ɛd wʋsa basid.
Amaa banɛ tʋm tʋʋmbɛ'ɛd la, m kʋ kɛɛ ba tʋbtɛɛgir baa bi'elaa.
M na namisi ba, ba tʋʋmbɛ'ɛd zug
hali ti paae ba biis nɛ ba yaas.”
8 Ka Moses igini zaŋ o zugɔ kpa' teŋ ka wɔ'ɔg Zugsɔb la, 9 ka yɛl o ye, “M Zugsɔba, fʋ nini ya'a sid tig mam, alaa fʋn dɔlli tii keŋ. Sida nidib la anɛ nimbɛ'ɛdnam amaa m sɔsidif ye fʋ kɛɛ ti tʋʋmbɛ'ɛd taali bas, ka di'e ti ka ti aan fʋ nimbanɛ ka fʋ gaŋ.”
Zugsɔbi lɛn kaanb nɔnaar si'em
10 Ka Zugsɔb lɛbis ye, “M nɔnaar kaanbir kaŋa ka m ye m tisi ya. M ye m na maal nyalima linɛ nan zi' tʋm dunia kaŋa bɛɛ teŋ si'a nii, ka fʋ nidib wʋsa na nyɛ. Ka nimbanɛ bɛ kpɛla na nyɛ mam Zugsɔb paŋ la an si'em. Bɔzugɔ tʋʋm nyalim titada ka m ye m tʋmmi ya san'an. 11 Yanamɛ na niŋ si'em anɛ ya siaki m nɔɔr, ka m na kad banɛ bɛ teŋin la wʋsa, banɛ an Amor dim nɛ Keenan dim nɛ Hitti dim nɛ Perizi dim nɛ Hivi dim nɛ Jebus dim la. 12 Mid ka ya maal nɔnaar kaanbʋg nɛ nimbanɛ ka ya keŋ paae ba teŋin la, ya ya'a niŋ ala an bɛndigʋ san'ami ya suoya. 13 Amaa Nwa'amini ba winpʋ'ʋsʋg bimbima la, ka nwa'a ba teŋgban kuga la, ka kɔ' Asera daad la. 14 Da pʋ'ʋsi win si'a ya'asɛ amaa Zugsɔb la ma'aa; bɔzugɔ Zugsɔb onɛ yʋ'ʋri buon Nyuur la sid anɛ nyuur sɔb. 15 Mid ka ya maal nɔnaar kaanbʋg nɛ nimbanɛ ka ya keŋ paae ba teŋin la. Ba ya'a maannɛ ba bada nɛ wina la, li nwɛnɛ wʋʋ dau bɔɔd pu'agɔɔndir si'em la, ka ba ya'a buoli ya, ya na ɔnbi ba bada malʋŋ ni'im la. 16 Ya ya'a li'a ba bipumis banɛ pʋ'ʋsid bada nɛ wina tisi ya biribis ka ba kilimi ba pu'ab, ba na bɔɔd ye ya pʋ'ʋsi ba bada nɛ wina la, ka li nwɛnɛ pu'agɔɔndir tʋʋma nɛ tisidi ya.
17 “Mid ka ya mɛ nɔk kʋnti maal wina.
18 “Maalimi malʋŋ kanɛ maan nɛ bodobodo linɛ ka' danbin la. Ya na ɔnb bodobodo la daba ayɔpɔi nwɛnɛ mam pa'ali ya si'em la. Maalimi na ala nwadkanɛ ka ba buon ye Abib la, bɔzugɔ nwadkan la ni ka ya da yi Egipt na. 19 Bikpɛŋ wʋsa anɛ mam bʋn, la'am nɛ bʋnkɔnbkpɛŋ wʋsa, 20 ka ya bʋŋ ya'a kiibi du'a, o ya'a anɛ bʋndibig, ya na tiak nɛ pɛribigi tis Zugsɔb la. Amaa ya ya'a pʋ lɛm bɔɔd ye ya tiakɛ, ya tun'e kɔ'ɔg bʋŋ la niŋgɔɔnri kʋ. Ala mɛn ka ya na tiaki ya biribiŋ kpɛɛm wʋsa.
“Sɔ' da kɛn mam san'an na ka pʋ mɔr si'eli kenaa.
21 “Tʋmmini ya tʋʋma daba ayuobʋ, amaa Vʋ'ʋsʋm daar la Vʋ'ʋsimi, baa li ya'a anɛ kuob bɛɛ bunib saŋaa. 22 Maalimi Bakuainam Malʋŋ saŋa kanɛ ka ya buni ya ki dɛɛnna la. Ka maali ya Sʋga Gbɛɛnb Malʋŋ saŋa kanɛ ka ya buni ya sapal zʋʋd la. 23 Nɔɔr atan' yʋʋm pʋʋgin, ya dap la wʋsa na kɛn Zugsɔb Paŋtita'ar Sɔb onɛ an Israel Wina'am la san'an na. 24 Ya ya'a ken mam Zugsɔb onɛ aan ya Wina'am la san'an nɔɔr atan' yʋʋm yinne pʋʋgin na, sɔ' kae na zabi nyaŋi faaɛn ya teŋ la, ka m na kad buudbanɛ bɛ nɛ ya la wʋsaa yis, ka kɛ ka ya teŋ la yalig hali. 25 Da maali malʋŋ kanɛ an ziim malʋŋ nɛ bodobodo kanɛ mɔr dabinnɛ. Mɛ da kɛ ka Kum Maliak Gaadʋg malʋŋ la pɛraug la ni'im diginɛ nie bɛogɔ.
26 “Mɔrini ya yiiga zʋʋd dinɛ ka ya bʋn ka di an sʋm la kɛn Zugsɔb onɛ aan ya Wina'am la Yin na. Mid ka ya nɔk bʋbil kanɛ nam mu'ad ni'imi dʋg nɛ o ma bin'isim.”
27 Ka Zugsɔb yɛl Moses ye, “Sɔm nwa digil ka li na zi'enɛ an nɔnaar kaanbiri tis Israel dim la wʋsa.” 28 Ka Moses da bɛ nɛ Zugsɔb dabisa pisnaasi yʋ'ʋŋ nɛ nintaŋ wʋsa. Saŋa kan wʋsa, o pʋ di bɛɛ nuu, ka o sɔb nɔnaar kaanba yɛla dinɛ an nɔzi'ela piiga la kuglamma la ni.
Moses nindaa pɛlig ka nyɛɛn pil-pil si'em
29 Ka Moses n da sigid na ka mɔr kuglamma banɛ ka Nɔzi'ela sɔbi li zugʋ o nu'ugin la, o da pʋ baŋ ye on pian' tis Zugsɔb la zugɔ o nindaa nyɛɛnnɛ. 30 Ka Aaron nɛ Israel dim la nyɛ ka Moses nindaa la nyɛɛn la, ka dabiem mɔri ba ka ba pʋ bɔɔdi li'el o naa. 31 Ka Moses buoli ba ka Aaron nɛ kpɛɛmnam la kɛɛn o san'an na, ka o pian' tisi ba. 32 Ka Israel dim la yʋ'ʋn li'el o na ka o tisi ba Zugsɔb nɔzi'ela wʋʋ Zugsɔb la zi'el si'em Sinai Zuor zugin la. 33 Ka Moses pian' naae ka nɔk pien nɛ lus o nindaa. 34 Amaa saŋkanɛ wʋsa ka Moses kpɛn' ye o pian' tis Zugsɔb la, asɛɛ ka o yis pien la hali nɛ on na ti yina. Ka o ya'a ti yina pian' tis Israel dim la Zugsɔb la yɛl o si'em la, 35 ba da nyɛ ka o nindaa pɛlig ka nyɛɛn pil-pil. Alazug o na lɛn nɔk pien la lɛbisi lus hali nɛ on na ti lɛn lɛbi kpɛn' pian' tis Zugsɔb la ya'as.