Vʋ'ʋsʋm dabisir yɛla
35
1 Ka Moses la'as Israel dim la wʋsa pian' tisi ba, ka yɛl ye, “Zugsɔb la zi'el nɔɔr ye ya tʋmi tʋʋma si'em nwa: 2 Tʋmmini ya tʋʋma daba ayuobʋ, amaa daba ayɔpɔi la anɛ Vʋ'ʋsʋm dabisir ka li nar ye ya vʋ'ʋs, bɔzugɔ li anɛ Zugsɔb la din; ka onɛ tʋm tʋʋma daakan la, ba na kʋʋ o sɔb. 3 Da nyu'oe bugum yanamɛ bɛ zin'isi'a wʋsa daakan la.”Fuug Sʋgʋr piini yɛla
4 Ka Moses pian' tis Israel dim la wʋsa ye, “Zugsɔb la zi'el nɔɔr ye ya tʋm si'em nwa: 5 Mɔri ya piini na tisi Zugsɔb la. Onɛ ka o sʋʋnr gban'e ye o tis si'el wʋsa on mɔr na tis Zugsɔb la. Li ya'a anɛ sanlima nɛ anzurifa nɛ kʋntzɛn'ug nɛ 6 gum dinɛ an bʋlʋ nɛ bʋnsʋma dinɛ an pipɛlig nɛ bʋnzɛn'is nɛ pien piela nɛ bʋʋs kɔnbid fuud, 7 nɛ pɛraad gbana dinɛ ka ba mɔ'ɔnsi li ka li mu'oe sʋee nɛ gbansʋma, nɛ na'aziinr daad; 8 nɛ olif kpaam dinɛ na nyu'od bugum, nɛ malʋŋ kpaam dinɛ ka ba nɔkidi suond maanmaannib, nɛ bʋnnyubisa dinɛ ka ba mɔri maan pʋ'ʋsim tudaari la, 9 nɛ kugvɛnla banɛ na nɔki sɛɛn niŋ maanmaan dansikin la nɛ dinɛ lɔɔd nyɔ'ɔgin la.
10 “Banɛ bɛɛ ya sʋʋgin mi' la'ad maalʋg na la'as na maal si'el mɛkama wʋʋ Zugsɔb la yɛli zi'el si'em la. 11 Banɛ an: Fuug Sʋgʋr nɛ li fubanɛ ligin nɛ li la, nɛ li ga'adiŋgɔnlima nɛ dalamma nɛ dapuuda banɛ wa'am, nɛ dabanɛ zi'e sappi la, nɛ li zi'esa; 12 nɛ Nɔnaar Daka la nɛ li dazi'eda la wʋsa, nɛ li suguru sɔsʋg liŋ la, nɛ fugɔbʋg kanɛ lusid la; 13 nɛ teebul nɛ li daad nɛ li la'ad la wʋsa, nɛ bodobodo linɛ pa'annɛ li zug Zugsɔb la tuon daar woo; 14 nɛ fita zi'esir nɛ li la'ad nɛ fita la nɛ kpaam dinɛ na nyu'od bugum; 15 maan daka kanɛ ka ba nyu'od tudaari la nɛ li daad; nɛ malʋŋ kpaam nɛ tudaar zɔm dinɛ nyuugʋ malis nɛ fuug linɛ ligin za'anɔɔr la 16 nɛ maan daka kanɛ ka ba nyu'od maan la nɛ li kʋntzɛn'ug bʋn linɛ nwɛnɛ ziiŋ-ɔɔnliŋ la, nɛ li daad nɛ la'ad la wʋsa, nɛ latita'ar la nɛ li zi'esir la, 17 nɛ fubanɛ ya'ali gilig zak la, nɛ li dabanɛ zi'e sappi la nɛ zi'esa nɛ fuug linɛ na ya'ali lusi li za'anɔɔr la, nɛ li nwiis, 18 nɛ kpa'as; nɛ la'ad wʋsa banɛ ka ba na mɔri tʋm Fuug Sʋgʋr la tʋʋma nɛ Fuug Sʋgʋr kanɛ ka ba la'asid anina tʋm tʋʋma wʋsa; 19 nɛ maanmaannib fubanɛ vɛnl hali ka ba yɛɛdi tʋm kasi zin'ig la tʋʋma; nɛ fubanɛ na tis Aaron nɛ o biis banɛ an maanmaannib la.”
Nidibi da tisid piini si'em
20 Din nya'aŋ ka Israel dim la yi Moses san'an lɛbi kul. 21 Ka banɛ sʋʋnri da ma'ae ka ba gban'e ye ba tis piini la wʋsa da lɛb na mɔri ba piini ye ba maal Fuug Sʋgʋr kanɛ ka ba na la'asid anina la. Ba da mɔr dinɛ wʋsa nar ye ba nɔki tʋm tʋʋma nɛ maanmaannib fuud la. 22 Ka dap nɛ pu'a banɛ wʋsa sʋʋnri ma'ae ka ba gban'e ye ba tis piini la, da mɔr sanlima tʋblɛma, nɛ niŋgɔnkɔris nɛ nu'utʋʋs nɛ baans banɛ an sanlima na tis Zugsɔb la. Ba wʋsa da tis sanlima nwa ka li an nyɔɔsʋŋ piini. 23 Ninkanɛ wʋsa mɔr gum dinɛ an bʋlʋ nɛ pipɛl-zɛn'ug, nɛ bʋnzɛn'is; nɛ pien piela, nɛ bʋʋs kɔnbid fuud, nɛ pɛraad gbana dinɛ ka ba mɔ'ɔnsi li ka li mu'oe sʋee, nɛ gbansʋma da mɔr na. 24 Ka onɛ wʋsa mɔr piini na ka li anɛ anzurifa nɛ kʋntzɛn'ug da mɔri li na tis Zugsɔb la. Ban wʋsa da mɔr na'aziinr daad da mɔri kena ka li sʋŋ tʋʋma la. 25 Ka pu'ab banɛ wʋsa mi' gum nwiib la da nwi gum dinɛ an bʋlʋ nɛ bʋnsʋma dinɛ an pipɛl-zɛn'ug nɛ bʋnzɛn'is, nɛ pien piela, mɔr na n tis, 26 ka pu'a sieba banɛ mi' li tʋʋma da nwi bʋʋs kɔnbidi mɔr na tis. 27 Ka kpɛɛmnam la nɔk kugvɛnla banɛ na sɛɛn niŋ maanmaan dansikin la nɛ li fubil kanɛ lɔɔd nyɔ'ɔgin la m mɔra. 28 Ba mɛ da mɔr bʋnnyubisa nɛ olif kpaam dinɛ na nyu'oe bugum, nɛ malʋŋ kpaam dinɛ ka ba nɔkidi suond maanmaannib la, nɛ dinɛ ka ba mɔri maan pʋ'ʋsʋg tudaar la. 29 Israel dim dap nɛ ba pu'ab banɛ sʋʋnri da gban'e ye ba sʋŋ Wina'am tʋʋma la da mɔr piini na tis Zugsɔb la wʋʋ Moses n yɛli ba si'em la.
Bezalel nɛ Oholiyab la yɛla
30 Ka Moses yɛl Israel dim la ye, “Gɔsima Zugsɔb gaŋ Uri biig Bezalel onɛ an Hur yaaŋ ka an Juda dɔɔg nid la, 31 ka nɔk on Wina'am Siig la tis o, nɛ ya'am, nɛ mi'ilim nɛ baŋir ye o tʋm tʋʋma buudi wʋsa. 32 O na baŋ on na niŋ si'em nɔk sanlima nɛ anzurifa nɛ kʋntzɛn'ugʋ maal si'el wʋsa. 33 O mɛ na nyaŋi kpi'e kugvɛnla maal duorim la'ad, ka mi' daad kpi'eb nɛ tʋʋma buudi wʋsa. 34 Ka mɛ mɔr ya'am kanɛ na pa'al nidib la tʋʋma, on nɛ Akisamak biig Oholiyab onɛ yi Dan dɔɔgin na la. 35 Ka o tisi ba baŋir kanɛ ka ba na nyaŋi maal si'el wʋsa dinɛ anɛ fuud ʋgʋb bɛɛ ba na nɔk nɛ gum dinɛ an bʋlʋ nɛ bʋnsʋma dinɛ an pipɛl-zɛn'ug, nɛ bʋnzɛn'is, nɛ pien piela sɛn, ka mɛ mi' tʋʋma buudi wʋsa.”