Ban da pin'il tʋʋma la si'em
36
1 Bezalel nɛ Oholiyab nɛ banɛ wʋsa ka Zugsɔb tisi ba ya'am nɛ baŋir ka ba na nyaŋi tʋm Fuug Sʋgʋr la tʋʋma na tʋm wʋʋ Zugsɔb la yɛli ba si'em.2 Ka Moses yʋ'ʋn buol Bezalel nɛ Oholiyab nɛ banɛ wʋsa ka Zugsɔb tisi ba baŋir ka ba bɔɔd ye ba kena tʋm tʋʋma la. 3 Ka Moses nɔk piinkanɛ wʋsa ka Israel dim la mɔr na ye li tʋm Fuug Sʋgʋr la tʋʋma la tisi ba. Hali daar wʋsa nidib la da nan mɔri piini kenna. 4 Ka dinzug tʋmtʋmnib la wʋsa da bas Fuug Sʋgʋr la tʋʋma ka kena 5 yɛl Moses ye, “Nidib la mɔri kenna ka li gaad Zugsɔb la yɛl si'em la.” 6 Ka Moses mɔɔli tis nidib la ye sɔ' wʋsa da lɛm mɔr si'el na tis Fuug Sʋgʋr la maalʋg zugɔ. Dinzug ka nidib la gu'oe ka pʋ lɛm mɔr na ya'asɛ, 7 bɔzugɔ ba pʋn tis dinɛ na nyaŋi tʋm tʋʋma la naae.
Ban da maal Fuug Sʋgʋr la si'em nwa
8 Ka nimbanɛ da mi' tʋʋma sʋ'ʋŋa maal Wina'am Fuug Sʋgʋr la nɛ pien pielig fuud piiga banɛ an sʋ'ʋŋa nɛ gum kanɛ an bʋlʋ nɛ gum sʋma banɛ an pipɛl-zɛn'ug nɛ bʋnzɛn'is, ka onɛ mi' ʋgʋb ʋg linɛ ka ba buon ye Kerubnam la niŋ fuudin la. 9 Ka fuud la wa'alim an nɔba makir pisnaasi nɛ ayi' ka ba yalʋŋ an nɔba makir ayuobʋ ka ba wʋsa zem taaba.
10 Ba da nɔk fuud anu sɛɛn tɔ'ɔŋ taaba ka mɛ nɔk fuud anu banɛ kpɛlim la tɔ'ɔŋ taaba. 11-12 Ba mɛ daa nɔk pien linɛ an bʋlʋ sɛɛn maal ga'adiŋvɔnya pisnu niŋi li fuud ayi' la nɔɔrin, dinɛ na kɛ ka ba na nyaŋi tɔ'ɔŋ taaba. 13 Ka ba maal sanlima ga'adiŋgɔnlima pisnu ka nɔk fuud la ga'al taaba ka li kɛ ka Fuug Sʋgʋr la la'asi an mummi.
14 Ba da nɔk bʋʋs kɔnbidi maal fuud pii nɛ yinne linɛ ka ba na pili bʋʋl Fuug Sʋgʋr la. 15 Fuud pii nɛ yinne la da zemnɛ taaba ka ba wa'alim an nɔba makir pisnaasi nɛ anu ka ba yalʋŋ an nɔba makir ayuobʋ. 16 Ba da nɔk fuud anu tɔ'ɔŋ taaba ka mɛ nɔk fuud ayuobʋ banɛ kpɛlim la tɔ'ɔŋ taaba. 17 Ba daa yʋ'ʋn nɔk pienni sɛɛn maal ga'adiŋvɔnya pisnu niŋi li fuud ayi' la nɔya ni. 18 Ba daa nɔk kʋntzɛn'ugʋ maal ga'adiŋgɔnlima pisnu ye ba ga'al taaba ka li an yinne. 19 Ka ba yʋ'ʋn nɔk pɛraad gbana dinɛ ka ba mɔ'ɔnsi li ka di mu'oe la sɛɛn tɔ'ɔŋ taaba baa pili paas. Ka nɔk gbansʋma linɛ vɛnli pili tak.
20 Ba da nɔk na'aziinr daad la maal dalamma ye ba kpɛn'ɛs Fuug Sʋgʋr la. 21 Ka dalammir wʋsa wa'alim an nɔba makir pii nɛ anu ka li yalʋŋ la an nɔbir makir yinne nɛ pʋsʋk, 22 ka dalammir mɛkama mɔr nyina ayi' linɛ kɛ ka ba gban'e taaba. Ba da maal Fuug Sʋgʋr la dalamma wʋsa ka ba nwɛn taaba. 23 Ba da maal dalamma pisi kpɛn'ɛs Fuug Sʋgʋr la dagɔbʋg baba, 24 ka maal anzurifa zi'esa pisnaasi, ka dalammir wʋsa mɔr zi'esa ayi', 25 ka mɛ maal dalamma pisi Fuug Sʋgʋr la datiuŋ, 26 ka nɔk anzurifa maal zi'esa pisnaasi ka dalammir wʋsa mɔr zi'esa ayi'. 27 Ka maal dalamma ayuobʋ Fuug Sʋgʋr la nya'aŋ linɛ bɛ ya-tuona la. 28 Ka maal dalamma ayi' ka ba gban'ad Fuug Sʋgʋr la lɔdig wʋsa, 29 ka lɔdis dalamma la ta'al taab teŋiri dʋ zugin, ka baŋ yinne mɛ mɔri ba wʋsa. 30 Ka li paae dalamma anii nɛ li anzurifa zi'esa pii nɛ ayuobʋ, ka dalammir wʋsa mɔr zi'esa ayi'.
31 Ba da maal na'aziinr dapuuda anu banɛ na puug dalamma la Fuug Sʋgʋr la lʋgir yinne ni, 32 ka anu mɛ bɛ lʋgkaŋa la ni, ka anu mɛ bɛ dalamma linɛ bɛ Fuug sʋgʋr nya'aŋ ya-tuona baba. 33 Ba daa maal teŋsʋk dapuudir la ka li wa'ami paae dalamma la wʋsa. 34 Ka ba bulig dalamma la nɛ sanlima ka maal sanlima baans linɛ na nyaŋi mɔr dapuuda la, ka mɛ bulig daad la nɛ sanlima.
35 Ba da nɔk fuud linɛ an sʋ'ʋŋa ka an bʋlʋ nɛ bʋnsʋma banɛ an pipɛl-zɛn'ug nɛ bʋnzɛn'is n sɛɛn tɔ'ɔŋ taaba n maal fugɔbʋg, ka banɛ mi' ʋgʋb sʋ'ʋŋa ʋg Kerubnam la niŋ anina. 36 Ka mɛ maal na'aziinr daad anaasi ka bʋligi ba nɛ sanlima, ka ba ga'adis la an sanlima; ka nɔk anzurifa maal zi'esa anaasi ka daad la na zi'e ba zug. 37 Ka nɔk fuug linɛ an sʋ'ʋŋa ka an bʋlʋ nɛ bʋnsʋma banɛ an pipɛl-zɛn'ug nɛ bʋnzɛn'isi sɛn ka li vɛnl, ka ba zaŋi ligil Fuug Sʋgʋr la za'anɔɔr la. 38 Ba daa maal zan'antɔlis anu nɛ ba baans. Ka bʋligi ba zugin nɛ teŋir la nɛ sanlima ka nɔk kʋntzɛn'ugʋ maali ba zi'esa la.